അധ്യക്ഷനെ തീരുമാനിക്കാന്‍ ബിജെപി ഉന്നതതല യോഗം ഇന്ന് ഡല്‍ഹിയില്‍

 

ന്യൂഡല്‍ഹി: ബിജെപി ഭാരവാഹികളുടേയും സംസ്ഥാന അധ്യക്ഷന്‍മാരുടേയും യോഗം ഇന്ന് ന്യൂഡല്‍ഹിയില്‍ ചേരും. പാര്‍ട്ടിയുടെ പുതിയ അധ്യക്ഷനെ തീരുമാനിക്കുന്നതിനായാണ് യോഗം ചേരുന്നതെന്നാണ് വിവരം.

ആഭ്യന്തരമന്ത്രിയായി ചുമതലയേറ്റതിന്‍റെ പശ്ചാത്തലത്തില്‍ അമിത് ഷായ്ക്ക് പാര്‍ട്ടി അധ്യക്ഷ പദം ഒഴിയേണ്ടതിന്‍റെ സാഹചര്യമാണ് നിലവിലുള്ളത്. ഇതിന്‍റെ അടിസ്ഥാനത്തില്‍ കൂടിയാണ് പുതിയ അധ്യക്ഷനെ കണ്ടെത്താന്‍ ഇന്ന് യോഗം ചേരുന്നത്.

പുതിയ അധ്യക്ഷന്‍ ആരെന്നത് സംബന്ധിച്ച ചര്‍ച്ചകളും യോഗത്തില്‍ ഉണ്ടായേക്കുമെന്നാണ് സൂചന. അതേസമയം സംഘടനാ തെരഞ്ഞെടുപ്പ് പൂര്‍ത്തിയാകുന്നത് വരെ അമിത് ഷാ തന്നെ ദേശീയ അധ്യക്ഷ സ്ഥാനത്ത് തുടരുമെന്ന റിപ്പോര്‍ട്ടുകളും പുറത്ത് വരുന്നുണ്ട്.

അതേസമയം ബിജെപിയുടെ പാര്‍ലമെന്‍ററി പാര്‍ട്ടി യോഗവും ഉടന്‍ ചേരുമെന്നാണ് വിവരം. ഈ മാസം പതിനാറിന് യോഗം ചേരുമെന്നാണ് ലഭിക്കുന്ന വിവരം. പാര്‍ലമെന്‍റ് മന്ദിരത്തില്‍ വെച്ചാകും യോഗം ചേരുകയെന്നാണ് സൂചന.

You must be logged in to post a comment Login