ആർഎംപി വോട്ടുകൾ ലഭിച്ചത് എൽഡിഎഫിനെന്ന് പി ജയരാജൻ

കോഴിക്കോട്: വടകര ലോക്സഭാ മണ്ഡലത്തിൽ ആര്‍എംപി വോട്ടുകള്‍ ലഭിച്ചത് തനിക്കാണെന്ന് എൽഡിഎഫ് സ്ഥാനാര്‍ത്ഥി പി ജയരാജന്‍റെ അവകാശവാദം. കൊലപാതക രാഷ്ട്രീയം വടകരയിൽ ഫലം കണ്ടിട്ടില്ലെന്നും തന്നെ കൊലപാതകിയായി ചിത്രീകരിച്ചവര്‍ക്കെതിരെ നിയമ പോരാട്ടം തുടരുമെന്നും പി ജയരാജൻ പറഞ്ഞു. സിപിഎമ്മിനെതിരായ മുരളീധരന്‍റെ കള്ളവോട്ട് ആരോപണം പരാജയം ഉറപ്പാക്കിയതിനാലാണെന്നും അദ്ദേഹം കൂട്ടിച്ചേര്‍ത്തു.

ഇന്നലെ നടന്ന ലോക്സഭാ വോട്ടെടുപ്പിൽ 80 ശതമാനത്തിനു മുകളിലാണ് വടകര മണ്ഡലത്തിൽ പോളിങ് രേഖപ്പെടുത്തിയത്. മണ്ഡലത്തിൽ 82.48 ശതമാനം പോളിങ് രേഖപ്പെടുത്തിയതോടെ ഇത് തങ്ങള്‍ക്ക് അനുകൂലമാണെന്ന വിലയരുത്തലുമായി എൽഡിഎഫും യുഡിഎഫും രംഗത്തെത്തിയിട്ടുണ്ട്. കൊലപാതക രാഷ്ട്രീയം പ്രചാരണത്തിൽ ഏശിയിട്ടില്ലെന്ന് കരുതുന്ന ഇടതുമുന്നണി തലശ്ശേരി, കൂത്തുപറമ്പ് എന്നിവിടങ്ങളിലെ ഉയര്‍ന്ന പോളിങ് തെരഞ്ഞെടുപ്പ് ഫലം തങ്ങള്‍ക്ക് അനുകൂലമാണെന്ന വാദത്തിന് തെളിവായി ഉയര്‍ത്തിക്കാണിക്കുന്നു. ആര്‍എംപിയുടെ പിന്തുണയെക്കാളുപരി വെൽഫെയര്‍ പാര്‍ട്ടിയുടെയും ലോക്‍താന്ത്രിക് ജനതാദളിന്‍റെ പിന്തുണയും ഗുണം ചെയ്യുമെന്നാണ് എൽഡിഎഫ് വിലയിരുത്തൽ.

അതേസമയം, ലീഗ് കേന്ദ്രങ്ങളായ കുറ്റ്യാടി, പേരാമ്പ്ര, നാദാപുരം തുടങ്ങിയ കേന്ദ്രങ്ങളിൽ രേഖപ്പെടുത്തിയ ഉയര്‍ന്ന പോളിങ് തങ്ങള്‍ക്കനുകൂലമാണെന്നാണ് യുഡിഎഫിന്‍റെ വിലയിരുത്തൽ. ആര്‍എംപി വോട്ടുകളും തങ്ങള്‍ക്ക് അനുകൂലമാണെന്ന് യുഡിഎഫ് വാദിക്കുന്നു.

You must be logged in to post a comment Login