എംഎസ് ധോണിയുടെ വിരമിക്കൽ; ചീഫ് സെലക്ടർക്ക് പറയാനുള്ളത് ഇതാണ്

 

ന്യൂഡൽഹി: വെസ്റ്റ് ഇൻഡീസ് പര്യടനത്തിനുള്ള ഇന്ത്യൻ ക്രിക്കറ്റ് ടീമിനെ പ്രഖ്യാപിച്ച് കഴിഞ്ഞു. പാരാമിലിറ്ററി സേനയിൽ സേവനം അനുഷ്ഠിക്കുന്നതിനാൽ വരുന്ന രണ്ട് മാസത്തേക്ക് മുൻ ഇന്ത്യൻ നായകൻ എംഎസ് ധോണി ടീമിൽ തന്നെ പരിഗണിക്കരുതെന്ന് വ്യക്തമാക്കിയിരുന്നു. ധോണിക്ക് പകരം യുവതാരം ഋഷഭ് പന്തിനെ ഒന്നാം നമ്പർ വിക്കറ്റ് കീപ്പറാക്കിയാണ് ഇന്ത്യ മൂന്ന് ഫോർമാറ്റിലുമുള്ള ടീമിനെ പ്രഖ്യാപിച്ചത്.

ധോണിയുടെ വിരമിക്കലിൽ തീരുമാനം എടുക്കേണ്ടത് അദ്ദേഹം തന്നെയാണെന്നാണ് ഇന്ത്യൻ ചീഫ് സെലക്ടർ എംഎസ്കെ പ്രസാദ് പറഞ്ഞത്. ധോണിയെ പോലൊരു ഇതിഹാസ താരത്തിന് എപ്പോൾ വിരമിക്കണമെന്ന് വ്യക്തമായി അറിയാം. ഋഷഭ് പന്തിനെയാണ് ഇനി ഇന്ത്യ വിക്കറ്റ് കീപ്പർ സ്ഥാനത്ത് വളർത്തിയെടുക്കുന്നതെന്നും പ്രസാദ് കൂട്ടിച്ചേർത്തു.

“വിരമിക്കുകയെന്നത് തികച്ചും വ്യക്തിപരമായ തീരുമാനമാണ്. ധോണിയെ പോലൊരു ഇതിഹാസതാരത്തിന് അറിയാം എപ്പോൾ വിരമിക്കണമെന്ന്. ടീമിൻെറ ഭാവിപദ്ധതികളും മറ്റും തീരുമാനിക്കുന്നത് സെലക്ഷൻ കമ്മിറ്റിയാണ്. അദ്ദേഹത്തിൻെറ അസാന്നിധ്യത്തിൽ കൂടുതൽ കാര്യങ്ങൾ പറയേണ്ടതുണ്ടെന്ന് തോന്നുന്നില്ല. പുതുതാരങ്ങളെ നമ്മൾ വളർത്തിയെടുത്ത് തുടങ്ങിയിരിക്കുന്നു,” എംഎസ്കെ പ്രസാദ് പറഞ്ഞു.

വെസ്റ്റ് ഇൻഡീസ് പര്യടനത്തിനുള്ള ടീമിൽ രണ്ട് പുതുമുഖ താരങ്ങളുണ്ട്. രാഹുല്‍ ചാഹര്‍, നവ്ദീപ് സൈനി എന്നിവരാണ് ടീമില്‍ ഇടംനേടിയ പുതുമുഖങ്ങള്‍. ഓഗസ്റ്റ് മൂന്ന് മുതലാണ് ഇന്ത്യയുടെ വെസ്റ്റ് ഇന്‍ഡീസ് പര്യടനംആരംഭിക്കുന്നത്. ഏകദിന മത്സരങ്ങള്‍ക്കൊപ്പം മൂന്ന് ടി-ട്വന്‍റി മത്സരങ്ങളും രണ്ട് ടെസ്റ്റ് മത്സരങ്ങളും അടങ്ങുന്നതാണ് പര്യടനം.

അന്താരാഷ്ട്ര ക്രിക്കറ്റില്‍ നിന്ന് വിരമിക്കുന്നതുമായി ബന്ധപ്പെട്ട ഊഹാപോഹങ്ങള്‍ ശക്തമാകുന്നതിനിടെ വെസ്റ്റ് ഇന്‍ഡീസിനെതിരായ ഇന്ത്യന്‍ ടീമില്‍ നിന്ന് കഴിഞ്ഞ ദിവസമാണ് മഹേന്ദ്ര സിങ് ധോണി പിന്‍വാങ്ങുന്നതായി അറിയിച്ചത്. സ്വമേധയാ ടീമില്‍ നിന്ന് പിന്‍വാങ്ങുന്നതായി ധോണി ബിസിസിഐയെ അറിയിക്കുകയായിരുന്നു. രണ്ട് മാസക്കാലം ടെറിട്ടോറിയല്‍ ആര്‍മിയിലെ തന്‍റെ റെജിമെന്‍റിനൊപ്പം ചെലവഴിക്കാനാണ് ധോണിയുടെ തീരുമാനം.

You must be logged in to post a comment Login