ഒമാനിൽ ഒഴുക്കിൽപ്പെട്ട ആറംഗ പ്രവാസി കുടുംബത്തെ കണ്ടെത്താനായില്ല

 

മസ്കറ്റ്: ഒമാനിലെ കനത്ത മഴയിലും വെള്ളപ്പൊക്കത്തിലും കാണാതായ ഇന്ത്യൻ കുടുംബത്തിലെ ആറുപേരെയും കണ്ടെത്താനുള്ള ശ്രമങ്ങള്‍ തുടരുന്നു. ഇവര്‍ സഞ്ചരിച്ചിരുന്ന കാര്‍ കണ്ടെത്തിയെങ്കിലും ആറുപേരില്‍ ആരെയും ഇതുവരെ കണ്ടെത്താനായിട്ടില്ല. വിവിധ സുരക്ഷാ വിഭാഗങ്ങളും സന്നദ്ധസേവകരും ചേര്‍ന്നാണ് പ്രദേശത്ത് തെരച്ചിൽ നടത്തുന്നത്.

ഹൈദരാബാദ് സ്വദേശിയായ സര്‍ദാര്‍ ഫസൽ അഹമ്മദിന്‍റെ കുടുംബം സഞ്ചരിച്ച വാഹനമാണ് അപകടത്തിൽപ്പെട്ടത്. വാഹനത്തിൽ നിന്ന് ഉടൻ പുറത്തു ചാടിയ ഫസൽ അഹമ്മദ് സമീപത്തെ മരത്തിൽ പിടിച്ച് രക്ഷപെടുകയായിരുന്നു. എന്നാൽ ഇയാളുടെ ഭാര്യ അര്‍ശി, പിതാവ് ഖാൻ, മാതാവ് ശബാന, മകള്‍ സിദ്റ (4), മകൻ സൈദ് (രണ്ട്), ഒരു മാസം മാത്രം പ്രായമുള്ള മകൻ നൂഹ് എന്നിവരെ അപകടത്തിൽ കാണാതാകുകയായിരുന്നു.

കഴിഞ്ഞ മാസം ഫസലിന്‍റെ ഭാര്യ അര്‍ശി പ്രസവിച്ച ഇളയ മകൻ നൂഹിനെ കാണാനായി ഒമാനിൽ എത്തിയതായിരുന്നു ഫസലിന്‍റെ മാതാപിതാക്കള്‍. ഇബ്രയിലെ ഇബ്നു ഹൈതം ഫാര്‍മസിയിൽ ജോലി ചെയ്യുകയായിരുന്നു ഖാൻ. ഇബ്ര വിലായത്തിലായിരുന്നു കുടുംബം താമസിച്ചിരുന്നത്.

വാരാന്ത്യം ആഘോഷിക്കാനായി വിനോദസഞ്ചാര കേന്ദ്രമായ വാദി ബനീ ഖാലിദ് സഞ്ചരിച്ച് മടങ്ങുന്നതിനിടയിലായിരുന്നു ഇവര്‍ വാദിയിൽ വെച്ച് അപകടത്തിൽപ്പെട്ടത്.

You must be logged in to post a comment Login