ഓമനക്കുട്ടൻ നിരപരാധി; സസ്പെൻഷൻ പിൻവലിച്ച് സിപിഎം

ആലപ്പുഴ: ദുരിതാശ്വാസ ക്യാംപിൽ പ്രളയബാധിതകരോട് പണപ്പിരിവ് നടത്തിയെന്ന ആരോപണത്തിൽ കഴമ്പില്ലെന്ന് കണ്ട് സിപിഎം ലോക്കൽ കമ്മറ്റിയംഗം ഓമനക്കുട്ടന്‍റെ സസ്പെൻഷൻ പിൻവലിച്ച് പാര്‍ട്ടി. ഓമനക്കുട്ടനു നേ‍ര്‍ക്ക് നടന്നത് കുപ്രചാരണമെന്ന് ബോധ്യപ്പെട്ടതിനെ തുടര്‍ന്ന് അന്വേഷണ വിധേയമായി സസ്പെൻഡ് ചെയ്ത നടപടിയാണ് സിപിഎം ആലപ്പുഴ ജില്ലാ കമ്മിറ്റി പിൻവലിച്ചത്.

ക്യാംപിന്‍റെ സുഗമമായ നടത്തിപ്പിനാണ് ഓമനക്കുട്ടൻ പണപ്പിരിവ് നടത്തിയതെന്നും വസ്തുതകള്‍ പാര്‍ട്ടി നടത്തിയ അന്വേഷണത്തിൽ ബോധ്യപ്പെട്ടെന്നും ജില്ലാ കമ്മിറ്റി അറിയിച്ചു. ഓമനക്കുട്ടൻ ക്യാംപിൽ നിന്ന് പണം പിരിച്ചത് ക്യാംപിലെ അടിസ്ഥാന സൗകര്യങ്ങള്‍ക്ക് വേണ്ടിയാണെന്നാണ് വിശദീകരണം.

ചേര്‍ത്തല തെക്ക് ആറാം വാര്‍ഡിലെ അംബേദ്കര്‍ കമ്മ്യൂണിറ്റി ഹാളിലെ ദുരിതാശ്വാസ ക്യാംപിലായിരുന്നു പണപ്പിരിവ് നടന്നെന്ന ആരോപണം ഉയര്‍ന്നത്. ക്യാംപിൽ പ്രശ്നങ്ങളുണ്ടായിട്ടുണ്ടെന്നും അത് പരിഹരിക്കാനാണ് ഓമനക്കുട്ടൻ പണപ്പിരിവ് നടത്തിയതെന്നും സിപിഎം ജില്ലാ കമ്മിറ്റി പറയുന്നു. എന്നാൽ ഇക്കാര്യം യഥാസമയം ഉദ്യോഗസ്ഥരെ അറിയിച്ച് പരിഹാരം കാണാമായിരുന്നുവെന്നും പാര്‍ട്ടിയ്ക്ക് അഭിപ്രായമുണ്ട്. ആരോപണത്തെപ്പറ്റി ഓമനക്കുട്ടനോട് പാര്‍ട്ടി വിശദീകരണം ചോദിച്ചിരുന്നെന്നും എന്നാൽ നേരിട്ട് സംസാരിച്ചപ്പോള്‍ ഓമനക്കുട്ടന് തെറ്റ് പറ്റിയിട്ടിലലെന്ന് ബോധ്യപ്പെട്ടതനാൽ നടപടി പിൻവലിച്ചെന്നും ജില്ലാ സെക്രട്ടറി ആര്‍ നാസര്‍ അറിയിച്ചു.

ഓമനക്കുട്ടൻ പണപ്പിരിവ് നടത്തിയതല്ല. ക്യാംപിലെ ചെലവുകള്‍ അന്തേവാസികള്‍ പങ്കിടുന്ന രീതിയുടെ ഭാഗമായി പണം വാങ്ങിയതാണ്. കഴിഞ്ഞ തവണ ക്യാംപിലെ വൈദ്യുതി ബിൽ നല്‍കിയത് ലോക്കൽ കമ്മിറ്റി സെക്രട്ടറിയാണെന്നും സിപിഎം ജില്ലാ നേതൃത്വം വിശദീകരിക്കുന്നു.

ഓമനക്കുട്ടന്‍റെ നടപടിയിൽ തെറ്റില്ലെന്ന് ബോധ്യപ്പെട്ടതിനാൽ നിയമനടപടി പിൻവലിക്കുന്നതായും ക്ഷമ ചോദിക്കുന്നതായും റവന്യൂ വകുപ്പ് പ്രിൻസിപ്പിൽ സെക്രട്ടറിയും ദുരന്ത നിവാരണ തലവനുമായ ഡോ. വി വേണു ഇന്ന് അറിയിച്ചിരുന്നു. റവന്യൂ വകുപ്പ് പോലീസിൽ നല്‍കിയ പരാതിയും പിൻവലിക്കും.

അതേസമയം, തന്‍റെ നിരപരാധിത്വം ബോധ്യപ്പെട്ടതിൽ സംസ്ഥാന സര്‍ക്കാരിനോടും സിപിഎമ്മിനോടും ഓമനക്കുട്ടൻ നന്ദി പറഞ്ഞു. ഓമനക്കുട്ടനെ പിന്തുണച്ച് ക്യാംപിലെ അന്തേവാസികള്‍ മനോരമ ന്യൂസ് ചാനലിനോട് പ്രതികരിച്ചിരുന്നു.

You must be logged in to post a comment Login