കമലഹാസൻ്റെ പ്രസംഗം ഹിന്ദു വിരുദ്ധമാക്കി വ്യാഖ്യാനിച്ചുവെന്ന് മക്കൾ നീതി മയ്യം

ന്യൂഡൽഹി: കമലഹാസൻ്റെ ഗോഡ്സെ ഹിന്ദു തീവ്രവാദി പ്രസംഗം ഹിന്ദുവിരുദ്ധമാക്കി വ്യാഖ്യനിച്ചുവെന്ന് മക്കൾ നീതി മയ്യം. മതങ്ങളുടെ പേരിൽ സൃഷ്ടിക്കപ്പെടുന്ന തീവ്രവാദത്തെയാണ് അദ്ദേഹം വിമര്‍ശിച്ചതെന്നും പാര്‍ട്ടി വാര്‍ത്താ കുറിപ്പിൽ വ്യക്തമാക്കി.

അതേസമയം ഇന്നലെ കമൽ ഹാസനെതിരെ അരുവാകുറിച്ചി പോലീസ് കേസെടുത്തു. മതവികാരം വ്രണപ്പെടുത്തല്‍, വർഗീയ ധ്രുവീകരണം എന്നീ കുറ്റങ്ങളാണ് കമൽഹാസനെതിരെ ചുമത്തിയിരിക്കുന്നത്. നടനെതിരെ 153 A, 295 A വകുപ്പുകൾ പ്രകാരമാണ് കേസ് രജിസ്റ്റർ ചെയ്തിട്ടുള്ളത്. കമല്‍ ഹാസന് എതിരെ നടപടി ആവശ്യപ്പെട്ട് ബിജെപി നേതാവ് അശ്വിനി ഉപാധ്യായ നല്‍കിയ ഹര്‍ജി ദില്ലി ഹൈക്കോടതി തള്ളി.

തമിഴ്നാട്ടിലെ അരവകുറിച്ചി നിയമസഭാ മണ്ഡലത്തിലെ തെരഞ്ഞെടുപ്പ് റാലിയിൽ പ്രവർത്തകരെ അഭിസംബോധന ചെയ്യവെയാണ് കമൽഹാസൻ വിവാദ പരാമര്‍ശം നടത്തിയത്. സ്വതന്ത്ര ഇന്ത്യയിലെ ആദ്യ തീവ്രവാദി ഹിന്ദുവാണെന്നും അത് മഹാത്മാഗാന്ധിയെ കൊന്ന ഗോഡ്സേ ആണെന്നുമായിരുന്നു പ്രസംഗത്തിനിടെ കമൽ ഹാസൻ പറഞ്ഞിരുന്നത്. ഇതാണ് വിവാദമായത്.

You must be logged in to post a comment Login