കുല്‍ഭൂഷണ്‍ വധശിക്ഷയില്‍ അന്താരാഷ്ട്ര കോടതി വിധി പറയും

ന്യൂഡല്‍ഹി: ചാരന്‍ ആണെന്ന് ആരോപിച്ച് പാകിസ്ഥാന്‍ വധശിക്ഷയ്‍ക്ക് വിധിച്ച ഇന്ത്യന്‍ പൗരന്‍ കുല്‍ഭൂഷണ്‍ യാദവിന്‍റെ കേസില്‍ അന്താരാഷ്ട്ര നീതിന്യായ കോടതി (ഐസിജെ) ഇന്ന് വിധി പറഞ്ഞേക്കും. കുല്‍ഭൂഷണ്‍ യാദവിനെ വിട്ടയക്കണം എന്നാവശ്യപ്പെട്ടാണ് ഇന്ത്യ, ഐസിജെയില്‍ പരാതി നല്‍കിയത്.

ഇന്ത്യന്‍ നയതന്ത്ര പ്രതിനിധികള്‍ക്ക് കുല്‍ഭൂഷണ്‍ യാദവിനെ കാണാന്‍ പാകിസ്ഥാന്‍ അനുമതി നല്‍കിയിരുന്നില്ല. ഇത് വിയന്ന കരാര്‍ ലംഘനമാണെന്ന് ഇന്ത്യ വാദിച്ചിരുന്നു. ഇക്കാര്യത്തില്‍ പാകിസ്ഥാനെ കുറ്റക്കാരായി പ്രഖ്യാപിക്കണമെന്ന ഇന്ത്യയുടെ ആവശ്യവും കോടതി അംഗീകരിക്കുമെന്നാണ് കേന്ദ്ര സര്‍ക്കാര്‍ കരുതുന്നത്.

കുല്‍ഭൂഷണ്‍ യാദവിന് പട്ടാളവിചാരണ നേരിടേണ്ടി വന്നു. ഈ വിചാരണയിലാണ് വധശിക്ഷ ലഭിച്ചത്. സിവില്‍ കോടതിയില്‍ കുല്‍ഭൂഷണ്‍ വിചാരണ നേരിടാന്‍ ഒരുപക്ഷേ കോടതി പാകിസ്ഥാനോട് ആവശ്യപ്പെട്ടേക്കും. ഇന്ത്യന്‍ നയതന്ത്രജ്ഞരുടെയും നിയമ വിദഗ്‍ധരുടെയും സഹായവും ചാരനെന്ന് ആരോപിക്കുന്ന കുല്‍ഭൂഷണ് നല്‍കാന്‍ പാകിസ്ഥാന്‍ നിര്‍ബന്ധിതരായേക്കാനും സാധ്യതയുണ്ട്.

വിയന്ന കരാര്‍ പാകിസ്ഥാന്‍ ലംഘിച്ചു എന്നതില്‍ മുറുകെ പിടിക്കുകയാണ് ഇന്ത്യ. വധശിക്ഷ തന്നെ റദ്ദാക്കാന്‍ ഈ വാദം മാത്രം മതിയാകുമെന്നാണ് കണക്കുകൂട്ടല്‍. കുല്‍ഭൂഷണിനെ അറസ്റ്റ് ചെയ്‍തത് പാകിസ്ഥാന്‍ രഹസ്യമാക്കിവച്ചു. ഇന്ത്യന്‍ എംബസിയെ വിവരം അറിയിച്ചില്ല. സ്വാഭാവികമായി ഒരു പൗരന് ലഭിക്കേണ്ട ഒരു വിധത്തിലുള്ള നിയമസഹായവും ലഭിച്ചില്ല – ഇന്ത്യ വാദിച്ചു.

കുല്‍ഭൂഷണ്‍ വിഷയത്തില്‍ ഒരു ഞെട്ടിപ്പിക്കുന്ന വിധി ഇന്ത്യയും പ്രതീക്ഷിക്കുന്നില്ലെന്നതാണ് വാസ്‍തവം. വിയന്ന കരാര്‍ ലംഘിച്ചു എന്ന് വിധിക്കുകയല്ലാതെ തടവില്‍ നിന്ന് കുല്‍ഭൂഷണെ മോചിപ്പിക്കുന്നതിന് ഐസിജെ ശ്രമിച്ചേക്കില്ലെന്നാണ് ഇന്ത്യ കരുതുന്നത്. അങ്ങനെയാണെങ്കില്‍ പാകിസ്ഥാന്‍ ഹൈക്കോടതിയില്‍ ഇന്ത്യന്‍ നിയമസഹായത്തോടെ സിവില്‍ കേസ് ആയി കുല്‍ഭൂഷണിന്‍റെ കേസ് പരിഗണിക്കാന്‍ ഇന്ത്യ ആവശ്യപ്പെടും.

വിയന്ന കരാറിനെക്കാള്‍ 2008ലെ ഉഭയകക്ഷികരാര്‍ ആണ് തങ്ങള്‍ പ്രാധാന്യം കല്‍പ്പിക്കുന്നത് എന്നതാണ് പാകിസ്ഥാന്‍ സ്വീകരിച്ച നിലപാട്. ആഗോള നിയമം മറികടക്കാന്‍ ഈ വാദം പോരാതെ വരും എന്നതും പാകിസ്ഥാന്‍ തിരിച്ചറിയുമെന്നാണ് ഇന്ത്യ കരുതുന്നത്.

സമാനമായ മുന്‍ കേസുകള്‍ പരിഗണിച്ചാല്‍ കോടതി ഉത്തരവ് എല്ലായിപ്പോഴും പുനപരിശോധനയാണ്. പാകിസ്ഥാനില്‍ തന്നെ വീണ്ടും ഒരു വിചാരണ ഇന്ത്യ അംഗീകരിക്കില്ല. പാക് കോടതികള്‍ പക്ഷപാതമുള്ളതാണെന്നും പുനപരിശോധന അസാധ്യമാണെന്നും ഇന്ത്യ വാദിക്കും. അന്താരാഷ്ട്ര നീതിന്യായ കോടതി തന്നെ കുല്‍ഭൂഷണെ വിട്ടയക്കണമെന്ന് തീരുമാനിക്കുകയും വേണം. ഇതാകും ഇന്ത്യയുടെ പ്രതികരണം – ജനീവയില്‍ നിന്നുള്ള അന്താരാഷ്ട്ര അഭിഭാഷകന്‍ ശശാങ് പി കുമാര്‍ ടൈംസ് ഓഫ് ഇന്ത്യയോട് പറഞ്ഞു.

എന്താണ് കുല്‍ഭൂഷണ്‍ യാദവ് ഉള്‍പ്പെട്ട കേസ്?

മുന്‍ ഇന്ത്യന്‍ നാവിക ഉദ്യോഗസ്ഥനായിരുന്ന കുല്‍ഭൂഷണ്‍ യാദവ് 2016ല്‍ പാകിസ്ഥാനിലെ ബലോച്ചിസ്ഥാനില്‍ വച്ച് അറസ്റ്റിലായെന്നാണ് പാകിസ്ഥാന്‍ പറയുന്നത്. ഇയാള്‍ ഇന്ത്യയുടെ ചാരന്‍ ആണെന്ന് പാകിസ്ഥാന്‍ ആരോപിക്കുന്നു. ഇന്ത്യ ഇത് നിഷേധിച്ചു. ഇറാനില്‍ ഒരു കാര്‍ഗോ ബിസിനസ് നടത്തിയിരുന്ന കുല്‍ഭൂഷണ്‍, ഇന്ത്യന്‍ ചാരന്‍ ആണെന്നത് ചോദ്യം ചെയ്യലില്‍ സമ്മതിച്ചെന്നാണ് പാകിസ്ഥാന്‍ വാദം. ഇന്ത്യന്‍ പൗരന്മാര്‍ക്ക് ലഭിക്കേണ്ട നിയമസഹായമോ അന്താരാഷ്ട്ര കരാറുകള്‍ അനുസരിച്ചുള്ള ഇടപെടലിന് ഇന്ത്യന്‍ നയതന്ത്രജ്ഞരെയോ പാകിസ്ഥാന്‍ അനുവദിച്ചില്ല. 2017 ഏപ്രിലില്‍ കുല്‍ഭൂഷണ് വിചാരണക്കോടതി വധശിക്ഷ നല്‍കി. മെയ് മാസം അന്താരാഷ്ട്ര നീതിന്യായ കോടതി വധശിക്ഷ സ്റ്റേ ചെയ്‍തു.

You must be logged in to post a comment Login