കൂടത്തായി കേസ് സിനിമയാകുന്നു; അന്വേഷണ ഉദ്യോഗസ്ഥനായി മോഹൻലാൽ

 

തൃശൂര്‍: കേരളത്തെ ഞെട്ടിച്ച കൂടത്തായി കൊലപാതക പരമ്പര സിനിമയാകുന്നു. ജനശ്രദ്ധ പിടിച്ചു പറ്റിയ അന്വേഷണ ഉദ്യോഗസ്ഥനായി മോഹൻലാലാണ് എത്തുന്നത്. സിനിമയുടെ തിരക്കഥ, സംവിധാനം തുടങ്ങിയവയെ കുറിച്ചുള്ള വിവരങ്ങള്‍ പുറത്തുവന്നിട്ടില്ല.

നേരത്തെ മോഹൻലാലിനെ നായകനാക്കി നിര്‍മ്മിക്കാനുള്ള കുറ്റാന്വേഷണ സിനിമയുടെ കഥ തയ്യാറാക്കിയിരുന്നു. ഇതിന് പകരമായാണ് കൂടത്തായി കൊലപാതക പരമ്പര സിനിമയാക്കുന്നതെന്ന് നിര്‍മ്മാതാവ് ആൻ്റണി പെരുമ്പാവൂരിനെ ഉദ്ധരിച്ച് മലയാള മനോരമ റിപ്പോട്ട് ചെയ്തു. ആദ്യം തയ്യാറാക്കിയ കഥയുടെ ഭാഗങ്ങളും ചിത്രത്തിൽ ഉള്‍പ്പെടുത്തും. സിനിമയുടെ ചിത്രീകരണം ഫെബ്രുവരിയിൽ ആരംഭിക്കുമെന്നാണ് റിപ്പോര്‍ട്ട്.

കോഴിക്കോട്ടെ കൂടത്തായിലാണ് കേരളത്തെ ഞെട്ടിച്ച കൊലപാതക പരമ്പര നടക്കുന്നത്. 2002 മുതൽ 2016 വരെയുള്ള കാലയളവിൽ ഒരു കുടുംബത്തിലെ ആറ് പേര്‍ കൊല്ലപ്പെടുന്നതാണ് കേസ്. റിട്ടയേർഡ് വിദ്യാഭ്യാസ വകുപ്പ് ഉദ്യോഗസ്ഥൻ കൂടത്തായി പൊന്നാമറ്റം ടോം തോമസ്, ഭാര്യ റിട്ട അധ്യാപിക അന്നമ്മ, മകൻ റോയി തോമസ്, ബന്ധുവായ യുവതി, ഇവരുടെ പത്തുമാസം പ്രായമായ കുഞ്ഞ്, അന്നമ്മയുടെ സഹോദരൻ മാത്യു മഞ്ചാടിയിൽ എന്നിവരാണ് കൊലപ്പെടുന്നത്. 2002ൽ അന്നമ്മയാണ് ആദ്യം മരിച്ചത്. തുടർന്ന് വർഷങ്ങളുടെ ഇടവേളകളിലാണ് മറ്റുള്ളവരുടെ മരണം.

ആറ് വർഷം മുമ്പ് മരിച്ച റോയിയുടെ മൃതദേഹം ബന്ധുക്കൾ പറഞ്ഞതനുസരിച്ച് പോസ്റ്റ്‍മോര്‍ട്ടം നടത്തിയപ്പോൾ വിഷം ഉള്ളിൽച്ചെന്നതായി കണ്ടെത്തിയിരുന്നു. ടോം തോമസിന്റെ സ്വത്ത് മകൻ്റെ ഭാര്യയായ ജോളി വ്യാജ ഒസ്യത്തുപയോഗിച്ച് തട്ടിയെടുക്കാൻ ശ്രമിച്ചതോടെയാണ് ഇളയമകൻ റോജോ പരാതി നൽകുന്നത്. പരാതിക്കാരനെ കേസിൽ നിന്ന് പിന്തിരിപ്പിക്കാനും ജോളി ശ്രമിച്ചു. പിന്നീട് നടത്തിയ അന്വേഷണത്തിലാണ് കൊലപാതകങ്ങളിലെ ജോളിയുടെ പങ്ക് പോലീസ് കണ്ടെത്തുന്നത്. ഉടൻ തന്നെ ജോളിയെ പോലീസ് അറസ്റ്റ് ചെയ്തു.

നിലവിൽ കേസന്വേഷണം തുടരുകയാണ്. വടകര റൂറൽ എസ്പി കെ ജി സൈമണിൻ്റെ നേതൃത്വത്തിലാണ് അന്വേഷണം പുരോഗമിക്കുന്നത്. കേസിൽ രാഷ്ട്രീയ നേതാക്കളുടെ പങ്കും പോലീസ് കണ്ടെത്തിയിരുന്നു. അന്വേഷണ സംഘത്തെ ആറായി തിരിച്ച് ഓരോ മരണവും ഓരോ സംഘം അന്വേഷിക്കാനാണ് തീരുമാനിച്ചിരിക്കുന്നത്.

You must be logged in to post a comment Login