കേരള ഫുട്ബോള്‍ അസോസിയേഷന് പുതിയ പ്രസിഡണ്ട്

 

കൊച്ചി: നീണ്ട 34 വര്‍ഷത്തിന് ശേഷം കേരള ഫുട്ബോള്‍ അസോസിയേഷന് പുതിയ പ്രസിഡണ്ട്. 34 വര്‍ഷമായി കെഎഫ്എയുടെ പ്രസിഡണ്ടായി തുടര്‍ന്ന കെഎംഐ മേത്തര്‍ സ്ഥാനമൊഴിഞ്ഞതിന് പിന്നാലെയാണ് ടോം ജോസ് കുന്നേല്‍ പുതിയ പ്രസിഡണ്ടായി തെരഞ്ഞെടുക്കപ്പെട്ടിരിക്കുന്നത്. എതിരാളിയായി മത്സരിച്ച എ പ്രദീപ് കുമാർ എംഎൽഎയെ പരാജയപ്പെടുത്തിയാണ് ടോം ജോസ് പ്രസിഡന്‍റ് സ്ഥാനം സ്വന്തമാക്കിയത്. അതേസമയം കെഎംഐ മേത്തര്‍ ഓണററി പ്രസിഡണ്ടായി തുടരും.

മേത്തർ പക്ഷക്കാരനായ ടോം ജോസ് തുടക്കത്തിൽ അനായാസ വിജയം പ്രതീക്ഷിച്ചിരുന്നെങ്കിലും എതിര്‍സ്ഥാനാര്‍ത്ഥിയായി എത്തിയ കോഴിക്കോട് എംഎല്‍എ എ പ്രദീപ് കടുത്ത മത്സരം കാഴ്ച വെച്ചു. ടോം ജോസ് 29 വോട്ട് സ്വന്തമാക്കിയപ്പോള്‍ പ്രദീപ് കുമാറിന് 11 വോട്ട് ലഭിച്ചു. ഇടുക്കി ജില്ല ഫുട്ബോൾ അസോസിയേഷൻ അംഗമാണ് ടോം ജോസ് കുന്നേൽ. ജോയിന്‍റ് സെക്രട്ടറിമാരായി കോട്ടയത്ത് നിന്ന് എസ്. അച്ചു, കാസര്‍ഡോഡ് നിന്ന് മുഹമ്മദ് റഫീഖ് എന്നിവർ വിജയിച്ചു. അതേസമയം എം ശിവകുമാറിനെ ട്രഷറർ സ്ഥാനത്തേക്ക് നേരത്തേ തന്നെ എതിരില്ലാതെ തെരഞ്ഞെടുത്തിരുന്നു.

പ്രദീപ് കുമാറും ടോം ജോസും നേരത്തേ കെഎഫ്എയുടെ വൈസ് പ്രസിഡന്റുമാരായിരുന്നു. പ്രദീപ് കുമാറിനായി സിപിഎം സജീവമായി രംഗത്തെത്തിയതോടെ മത്സരം കടുക്കുമെന്നുറപ്പായിരുന്നു. എന്നാല്‍ പ്രസിഡണ്ട് സ്ഥാനത്തേക്ക് ജയിച്ച് കയറാന്‍ പ്രദീപിനായില്ല. ഇതേ പക്ഷത്തുനിന്ന് ജോയന്റ് സെക്രട്ടറി സ്ഥാനത്തേക്ക് തിരുവനന്തപുരത്തുനിന്നുള്ള ഗീവർഗീസും മത്സരിച്ചെങ്കിലും പരാജയപ്പെട്ടു. യോഗത്തിൽ മേത്തറെ ഈ സ്ഥാനത്തേക്ക് തിരഞ്ഞെടുക്കുന്നതായിരുന്നു ആദ്യത്തെ അജൻഡ. വിവിധ ജില്ലാ അസോസിഷേയനുകളില്‍ നിന്നും ജനറൽ ബോഡി അംഗങ്ങളായി മൂന്ന് പേരാണുള്ളത്. ഇത്തരത്തിൽ 14 ജില്ലകളില്‍ നിന്നുള്ള 42 പ്രതിനിധികള്‍ക്കാണ് തെരഞ്ഞെടുപ്പില്‍ വോട്ടവകാശം ഉണ്ടായിരുന്നത്.

You must be logged in to post a comment Login