Breaking News

കോടികളുടെ തട്ടിപ്പ്, ആഡംബര ജീവിതം, വിപുലമായ ബന്ധങ്ങള്‍; നടി ലീന മരിയ പോളിന്റെ ജീവിതം ഇങ്ങനെ

കൊച്ചി: കോടികളുടെ തട്ടിപ്പ്, അതിനായുള്ള ആസൂത്രണം, ആഡംബര ജീവിതം, വിപുലമായ ബന്ധങ്ങള്‍… ലീന മരിയ പോളിന്റെ ജീവിതം ആരേയും ഞെട്ടിക്കുന്നതാണ്. തട്ടിപ്പുകളും കേസുകളും പിന്നാലെയുണ്ടെങ്കിലും അതിലൊന്നിലും കുലുങ്ങാത്ത പ്രകൃതം. എപ്പോഴും രണ്ട് അംഗരക്ഷകരുടെ കൂടെയാണു നടപ്പ്. സിനിമാക്കഥ പോലെ തന്നെയായിരുന്നു ലീനയുടെ ജീവിതം.

പത്തുകോടിയുടെ തട്ടിപ്പു കേസില്‍ മലയാളി നടി ലീനയും ബിസിനസ് പങ്കാളി സുകാഷ് ചന്ദ്രശേഖറും നാലു കൂട്ടാളികളും 2015ലാണ് അറസ്റ്റിലാകുന്നത്. സാമ്പത്തിക കുറ്റകൃത്യവിഭാഗമാണ് (ഇക്കണോമിക് ഒഫന്‍സസ് വിങ്) ഇവരെ പിടികൂടിയത്. ചുരുങ്ങിയ കാലംകൊണ്ടു നിക്ഷേപത്തിന്റെ പത്തിരട്ടി തിരിച്ചുനല്‍കുമെന്നു വാഗ്ദാനം ചെയ്തായിരുന്നു തട്ടിപ്പ്.

ചെന്നൈയില്‍ 19 കോടി രൂപയുടെ തട്ടിപ്പുകേസിലും ലീനയെയും ശേഖറിനെയും അറസ്റ്റ് ചെയ്തിരുന്നു. 2013ലായിരുന്നു ഇത്. ചെന്നൈ അമ്പത്തൂരിലെ കാനറ ബാങ്കിന്റെ ശാഖയില്‍നിന്നു 19 കോടി രൂപ തട്ടിപ്പു നടത്തിയ കേസില്‍ സിബിഐ അന്വേഷണവും ആരംഭിച്ചു. ബാങ്ക് തട്ടിപ്പുമായി ബന്ധപ്പെട്ട് അന്വേഷണം നടത്തുന്ന സിബിഐയുടെ ബെംഗളൂരു യൂണിറ്റിനായിരുന്നു അന്വേഷണച്ചുമതല. ബാങ്ക് സമര്‍പ്പിച്ച ഹര്‍ജിയില്‍ അന്വേഷണം സിബിഐയ്ക്കു കൈമാറാന്‍ മദ്രാസ് ഹൈക്കോടതിയാണ് ഉത്തരവിട്ടത്.

2013 ജൂണിലാണ് ഇരുവരെയും ചെന്നൈ സെന്‍ട്രല്‍ ക്രൈം ബ്രാഞ്ച് (സിസിബി) അറസ്റ്റ് ചെയ്യുന്നത്. പിന്നീട് കോടതി ജാമ്യം നല്‍കി. ഇവര്‍ക്കെതിരെ എന്‍ഫോഴ്‌സ്‌മെന്റ് ഡയറക്ടറേറ്റിന്റെയും അന്വേഷണമുണ്ട്. വെന്‍ഡിങ് മെഷീനുകള്‍ ഉള്‍പ്പെടെയുള്ള ഉപകരണങ്ങള്‍ നിര്‍മിച്ചു നല്‍കുന്ന ചെന്നൈയിലെ സ്വകാര്യ കമ്പനിയായ ഫ്യൂച്ചര്‍ ടെക്‌നിക്‌സ് പ്രൈവറ്റ് ലിമിറ്റഡ് കമ്പനിയെ ഉപയോഗിച്ചാണ് സുകാഷ് ബാങ്കില്‍ തട്ടിപ്പു നടത്തിയത്.

കര്‍ണാടക സര്‍ക്കാരില്‍നിന്ന് ഇവര്‍ക്കു 30,000 വെന്‍ഡിങ് മെഷീനുകളുടെ ഓര്‍ഡര്‍ നല്‍കാമെന്നു പറഞ്ഞായിരുന്നു തട്ടിപ്പ്. കേസില്‍ ബാങ്ക് മാനേജര്‍ ജഗദീഷ്, കമ്പനി എംഡി: എം.ബാലസുബ്രഹ്മണ്യന്‍, ഭാര്യ ചിത്ര എന്നിവരെ അറസ്റ്റ് ചെയ്തിരുന്നു.

കാനറാ ബാങ്ക് അധികൃതരുടെ പരാതി അന്വേഷിച്ച ക്രൈംബ്രാഞ്ച്, ഡല്‍ഹിയില്‍ സുകാഷിന്റെ കൂട്ടാളിയും നടിയുമായ ലീന മരിയ പോളിനെ അറസ്റ്റു ചെയ്തതോടെയാണു തട്ടിപ്പുവിവരങ്ങള്‍ ലഭിക്കുന്നത്. കര്‍ണാടക സര്‍ക്കാര്‍ വെന്‍ഡിങ് മെഷിനുകള്‍ക്ക് ടെന്‍ഡര്‍ ക്ഷണിച്ച് പരസ്യം സര്‍ക്കാര്‍ വെബ്‌സൈറ്റില്‍ പ്രസിദ്ധീകരിച്ചിരുന്നു. ഇതില്‍ ഒപ്പുവച്ചത് ജയകുമാര്‍ എന്ന ഉന്നത ഐഎഎസ് ഉദ്യോഗസ്ഥനാണ്.

ടെന്‍ഡര്‍ വിവരങ്ങള്‍ മനസ്സിലാക്കിയ സുകാഷ്, ജയകുമാര്‍ ഐഎഎസ് എന്ന പേരില്‍ ഫ്യൂച്ചര്‍ ടെക്‌നിക്‌സ് പ്രൈവറ്റ് ലിമിറ്റഡ് ഉടമകളെ ഫോണില്‍ വിളിച്ച് 132 കോടി രൂപയുടെ കരാര്‍ നല്‍കാമെന്നു പറഞ്ഞു. ഇതിനായി കമ്പനി ഉടമകള്‍ വായ്പയ്ക്കായി ബാങ്കിനെ സമീപിച്ചു. ഇവര്‍ക്കു വായ്പ നല്‍കുന്നതിനായി ബാങ്ക് മാനേജര്‍ വി.ജഗദീഷയെ, ജയകുമാര്‍ എന്നപേരില്‍ ഫോണ്‍ ചെയ്ത സുകാഷ്, വായ്പ നല്‍കാന്‍ ശുപാര്‍ശ ചെയ്തു.

തുടര്‍ന്നു ജഗദീഷ 19 കോടി രൂപ കമ്പനി അധികൃതരുടെ അക്കൗണ്ടിലേക്കു മാറ്റി. ഇവര്‍ പിന്നീട് സുകാഷ് നല്‍കിയ അക്കൗണ്ടുകളിലേക്കും പണം മാറ്റി. എന്നാല്‍, എന്‍ഫോഴ്‌സ്‌മെന്റ് നടത്തിയ പരിശോധനയില്‍ സുകാഷ് നല്‍കിയ അക്കൗണ്ടുകള്‍ വ്യാജമാണെന്നു കണ്ടെത്തി.

ഈ അക്കൗണ്ടുകള്‍ ക്രൈം ബ്രാഞ്ച് മരവിപ്പിച്ചിരുന്നു. കാനറ ബാങ്കില്‍ നിന്നു തട്ടിപ്പു നടത്തിയ പണം ഉപയോഗിച്ചാണ് സുകാഷ് ആഡംബര കാറുകളും സ്വര്‍ണാഭരണങ്ങളും വൈരക്കല്ലുകളും വാങ്ങിയതെന്നും ക്രൈം ബ്രാഞ്ച് കണ്ടെത്തി. സേലയൂരിലെ വസ്ത്ര വ്യാപാരിയില്‍നിന്നു 72 ലക്ഷം രൂപ തട്ടിയ കേസിലും കാനറാ ബാങ്കിന്റെ അമ്പത്തൂര്‍ ശാഖയില്‍ 19 കോടി രൂപ തട്ടിപ്പു നടത്തിയ കേസിലുമായാണു ലീനയെ ഡല്‍ഹിയില്‍ സെന്‍ട്രല്‍ ക്രൈം ബ്രാഞ്ച് അറസ്റ്റ് ചെയ്തത്.

ബെംഗളൂരുവില്‍ ഡെന്റല്‍ കോളജില്‍ പഠിക്കുകയും മോഡലിങ് ചെയ്യുകയും ചെയ്യുന്ന സമയത്താണു ലീന സുകാഷുമായി അടുക്കുന്നത്. സിനിമയിലും മോഡലിങ് രംഗത്തും കൂടുതല്‍ അവസരങ്ങള്‍ ലഭിക്കാന്‍ സഹായിക്കാമെന്നു പറഞ്ഞാണു ലീനയെ ആകര്‍ഷിച്ചതെന്നാണു പൊലീസ് പറയുന്നത്. വിവാഹം കഴിക്കാമെന്നും വാഗ്ദാനമുണ്ടായിരുന്നു.

ചെന്നൈയിലെ പ്രമുഖ നൃത്ത സംവിധായകനെയും ബോളിവുഡിലെ പ്രമുഖ സംവിധായകനെയും സുകാഷ് ലീനയ്ക്കു പരിചയപ്പെടുത്തിയിരുന്നു. ഇതോടെ സുകാഷിനെ വിശ്വസിച്ച ലീന അയാള്‍ നടത്തുന്ന തട്ടിപ്പുകള്‍ക്കു കൂട്ടുനില്‍ക്കുകയായിരുന്നു.

ലീന താമസിച്ചിരുന്ന ഫാം ഹൗസില്‍ നിന്നു പിടിച്ചെടുത്ത ആഡംബര കാറുകളിലൊന്നിന്റെ നമ്പര്‍ വ്യാജമാണെന്നും കണ്ടെത്തിയിരുന്നു. 9 ആഡംബര കാറുകളും 81 വിലപിടിപ്പുള്ള റിസ്റ്റ് വാച്ചുകളുമാണു കണ്ടെടുത്തത്. റോള്‍സ് റോയ്‌സ് ഫാന്റം, ആസ്റ്റന്‍ മാര്‍ട്ടിന്‍, ബിഎംഡബ്ല്യു, റേഞ്ച് റോവര്‍, ഔഡി തുടങ്ങിയ കാറുകളാണു പിടിച്ചെടുത്തത്. ഇതില്‍ റോള്‍സ് റോയ്‌സ് ഫാന്റത്തിന്റെ നമ്പറാണു വ്യാജമാണെന്നു കണ്ടെത്തിയത്.

You must be logged in to post a comment Login