ഖത്തറിലെ കാൽനടക്കാരുടെ ശ്രദ്ധയ്ക്ക്; ഇക്കാര്യങ്ങൾ ശ്രദ്ധിച്ചില്ലെങ്കിൽ പിടിവീഴും

 

ദോഹ: നിരത്തുകളിൽ കാൽനട യാത്രക്കാർ വരുത്തുന്ന പിഴവുകൾക്ക് പിഴ ഈടാക്കിത്തുടങ്ങിയെങ്കിലും പലർക്കും ഇപ്പോഴും ഇക്കാര്യത്തേക്കുറിച്ച് വലിയ ധാരണയില്ല. അനുവദിക്കപ്പെടാത്ത മേഖലയിൽ ഇപ്പോഴും ആളുകൾ റോഡ് മുറിച്ചുകടക്കുന്നത് തുടരുകയാണ്. കാൽനടക്കാരുടെ നിയമ ലംഘനങ്ങൾക്ക് ആഭ്യന്തര മന്ത്രാലയം പിഴ ഈടാക്കാൻ തുടങ്ങിയെങ്കിലും നിയമലംഘനം തുടരുകയാണ്.

ഗതാഗത നിയമം പാലിക്കുന്നതിന്റെ പ്രാധാന്യവും നിയമലംഘനത്തിന്റെ അനന്തര ഫലങ്ങളും ബോധ്യപ്പെടുത്തുന്നതിനായി വിവിധ ഭാഷകളിൽ ബോധവത്കരണം തുടരേണ്ട സാഹചര്യം നിലവിലുണ്ട്. രാജ്യത്ത് ലക്ഷക്കണക്കിന് വിദേശികളുള്ളതിനാൽ ബോധവത്കരണം തുടരേണ്ട സാഹചര്യം ഉണ്ടെന്ന് ‘ദ പെനിൻസുല’ പത്രം റിപ്പോർട്ട് ചെയ്തു.

പ്രധാനമന്ത്രി നരേന്ദ്ര മോദി ഇന്ന് അബുദാബിയിൽ; നാളെ ബഹ്റൈനിൽ

നിയമ ലംഘനം, പിഴ

ഡിവൈഡറിനു മധ്യത്തിലൂടെയോ വശങ്ങളിലൂടെയോ നടപ്പാത ഉപയോഗിക്കാതെ നടന്നാൽ 100 റിയാൽ പിഴ ഈടാക്കും. ആവശ്യമായ മുൻകരുതലില്ലാതെയും സീബ്രാ ലൈൻ ഉപയോഗിക്കാതെയും റോഡ് മുറിച്ചുകടന്നാൽ 200 റിയാൽ പിഴ. ഗതാഗത സിഗ്നലുകൾ ശ്രദ്ധിക്കാതെ റോഡ് മുറിച്ചുകടക്കുകയോ സൈനിക പരേഡുകളുമായി ബന്ധപ്പെട്ട് റോഡുകളിൽ നിയന്ത്രണം ഉള്ളപ്പോൾ റോഡ് കുറുകേ കടന്നാൽ 500 റിയാൽ ആയിരിക്കും പിഴ ചുമത്തുക.

എന്തൊക്കെ ശ്രദ്ധിക്കണം?

  • സീബ്രാ ലൈൻ, നടപ്പാലം, ഗതാഗത ഇന്റർസെക്ഷനുകൾ, എന്നിവ ഉപയോഗിക്കുക. ഇടത്തുനിന്നോ വലത്തുനിന്നോ വാഹനം വരുന്നില്ലെന്ന് ഉറപ്പാക്കുക. വാഹനം പൂർണ്ണമായും നിർത്തിയ ശേഷം മാത്രം റോഡ് മുറിച്ചുകടക്കുക.
  • കാൽനടക്കാർക്കുവേണ്ടിയുള്ള സിഗ്നലുകൾ പാലിച്ചുമാത്രമേ റോഡ് മുറിച്ചുകടക്കാവൂ. ഇന്റർ സെക്ഷനുകളിലെ തൂണുകളിലെ ക്രോസ് വാക്ക് ബട്ടണിൽ അമർത്തുക. കാൽനടയാത്രികർക്കുവേണ്ടിയുള്ള പച്ച ലൈറ്റ് തെളിഞ്ഞതിനു ശേഷംമാത്രം റോഡ് കുറുകേ കടക്കാനുള്ള സീബ്രാ ലൈൻ ഉപയോഗിക്കുക.
  • മൊബൈൽ ഉപയോഗിക്കാതെ ജാഗ്രതയോടെ റോഡ് മുറിച്ചുകടക്കുക.
  • മുമ്പിലെത്തുന്ന വാഹനത്തിന്റെ വേഗവും ദുരവും പരിഗണിച്ചശേഷം മാത്രമേ റോഡ് മുറിച്ചുകടക്കാവൂ.

You must be logged in to post a comment Login