‘ഞങ്ങൾ വിവാഹിതരാകാൻ തീരുമാനിച്ചു; പക്ഷേ ഒരു നിബന്ധനയുണ്ടായിരുന്നു’: ലെന


ലയാളത്തിലെ ചുരുക്കം ചില ബോൾഡ് നായികമാരിൽ മുൻ പന്തിയിൽ നിൽക്കുന്ന നടിയാണ് ലെന. സ്നേഹം എന്ന ജയരാജ് ചിത്രത്തിലൂടെ മലയാള സിനിമയിലേക്ക് ചുവടുവെച്ചെത്തിയ ലെന ഇന്ന് മലയാള സിനിമയുടെ അവിഭാജ്യ ഘടകമായി മാറിക്കഴിഞ്ഞു. ഏത് പ്രായത്തിലുള്ള വേഷവും വളരെ തന്മയത്വത്തോടെ അഭിനയിച്ച് പ്രതിഫലിപ്പിക്കാൻ കഴിയുന്ന അത്യപൂര്‍വ്വം മലയാളി നടിമാരിൽ ഒരാൾ കൂടിയാണ് ലെന. അടുത്തിടെ നൽകിയ ഒരു അഭിമുഖത്തിൽ താരം സിനിമയിലേക്ക് വരാനുണ്ടായ സാഹചര്യവും ഇടക്കിടെ കരിയറിൽ മനപ്പൂര്‍വ്വം എടുക്കാറുള്ള ബ്രേക്കുകളെക്കുറിച്ചും മനസു തുറന്നു സംസാരിച്ചു. ജമേഷ് ഷോ എന്ന അഭിമുഖ പരിപാടിയിലാണ് താരം പഴയ ചില കാര്യങ്ങളെ പറ്റി വാചാലയായത്.

താൻ സിനിമയിലേക്കെത്തിയത് മനപ്പൂർവ്വമല്ല, വളരെ യാദൃശ്ചികമായിരുന്നു. ആദ്യചിത്രം സ്നേഹമായിരുന്നു. ആദ്യ സിനിമയ്ക്ക് ശേഷം വിളി വന്നപ്പോഴെല്ലാം മനസ്സിൽ വല്ലാത്തൊരു സംഘർഷം നടക്കുന്നുണ്ടായിരുന്നു. പതിനാറ് വയസ്സേ അന്നുണ്ടായിരുന്നുള്ളൂ. സിനിമയിലെടുത്തല്ലോ, ഇനി തൻ്റെ സ്വകാര്യത പോകുമല്ലോ എന്നൊക്കെ ചിന്തിച്ചിരുന്നുവെന്നും പിന്നീട് അത് പ്രായത്തിൻ്റെ പ്രശ്നങ്ങളാകുമെന്ന് കരുതി. ചുറ്റുമുണ്ടായിരുന്നവരെല്ലാം സിനിമയെക്കുറിച്ച് മോശം കാര്യങ്ങളാണ് പറഞ്ഞു തന്നിരുന്നത്.

അതിന് ശേഷം ഒരുപാട് പ്രഗത്ഭ സംവിധായകർ വിളിച്ചിരുന്നു. ജയരാജ് ചിത്രങ്ങളായ കരുണം, ശാന്തം എന്നീ സിനിമകൾ പിന്നീട് ചെയ്തു. എംടിയുടെ ചിത്രമായ ഒരു ചെറുപുഞ്ചിരി, പിന്നീട് കൊച്ചുകൊച്ചു സന്തോഷങ്ങൾ, ദേവദൂതൻ, രണ്ടാം ഭാവം എന്നീ ചിത്രങ്ങളിലാണ് പിന്നീട് അഭിനയിച്ചത്. പല തവണ സിനിമ വേണ്ടെന്ന് വെച്ച് ഒളിച്ചോടിയിട്ടുണ്ടെന്നും നടി വെളിപ്പെടുത്തി. പക്ഷേ എല്ലാത്തിനും ഒടുവില്‍ താൻ തിരികെ ഇവിടെത്തന്നെയെത്തിയെന്നും ഇന്നെനിക്ക് സിനിമയെന്തെന്ന് അറിയാമെന്നും സിനിമയെ ഗൗരവമായിത്തന്നെയാണ് കാണുന്നതെന്നും ലെന പറഞ്ഞു.

മികച്ച സംവിധായകർക്കൊപ്പം പ്രവർത്തിച്ചിട്ടും തനിക്ക് അതിൻ്റെ വില മനസ്സിലായില്ലെന്നും പഠിച്ചാലേ നമുക്കെന്തെങ്കിലും ആകാൻ പറ്റൂ എന്നായിരുന്നു തൻ്റെ വിചാരമെന്നും നടി പറയുന്നു. താൻ നല്ല പഠിപ്പിസ്റ്റ് ആയിരുന്നു. അങ്ങനെ ഡിഗ്രിക്ക് സൈക്കോളജിക്ക് ചേർന്നു. പിജി ചെയ്യാൻ മുംബൈയിലേക്ക് പോയി. ഒരുപാട് നല്ല കഥാപാത്രങ്ങൾ വരുന്ന സമയമായിരുന്നു അത്. പിജി കഴിഞ്ഞ് ഇൻ്റേൺഷിപ്പ് ആയപ്പോഴാണ് പുസ്തകത്തിൽ കാണുന്നതല്ല ചുറ്റുമുള്ളതെന്ന് മനസ്സിലായത്, നടി പറഞ്ഞു.

2003ല്‍ മുംബൈ ജെജെ ആശുപത്രിയിൽ ജോലി ചെയ്തിരുന്നു. അപ്പോഴും നിരാശയായിരുന്നു. നമ്മുടെ ഇവിടുത്തെ ഹെൽത്ത് സെൻ്ററുകളുടെ കാര്യമൊക്കെ വളരെ മോശമാണ്. ഭയങ്കര നിരാശ തോന്നിയിരുന്നു. ഞാനൊരു കലാകാരിയാണെന്നും സെൻസിറ്റീവ് ആണെന്നും ഒക്കെ അന്നാണ് തനിക്ക് മനസ്സിലായത്. എന്നെ യഥാർഥ ജീവിതം എന്തെന്ന് പഠിപ്പിച്ചത് മുംബൈയിലെ ജീവിതത്തിൻ്റെ കാലയളവാണ്. ആ സമയത്താണ് ഒരിക്കൽ സിനിമ വേണ്ടെന്നു വെച്ചത്.

പിന്നീടൊരിക്കൽ ഒരു രോഗി മുറിയിലേക്ക് വന്ന സമയത്ത് കേരള നമ്പറിൽ നിന്നൊരു ഫോൺ കോൾ വന്നു. കൂട്ട് എന്ന സിനിമയിൽ അരവിന്ദിൻ്റെ നായികയായി അഭിനയിക്കുമോ എന്നായിരുന്നു മറുതലയ്ക്കലെ ചോദ്യം. ആ തീരുമാനം അബദ്ധമായോ എന്ന് തോന്നുന്നത് അപ്പോഴാണ്. പിന്നീട് ഉടൻ തന്നെ ഞാനിതാ വരുന്നൂ എന്ന് പറഞ്ഞ് ഇവിടേക്കെത്തി. അപ്പോഴാണ് സിനിമയുടെ വില മനസ്സിലാകുന്നത്. കൂട്ട് കഴിഞ്ഞ് വേറെ ഓഫർ ഒന്നും വന്നില്ല, സൈക്കോളജിയിലേക്ക് തിരികെ പോകാൻ സാധിക്കില്ല, അച്ഛൻ്റെയും അമ്മയുടെയും പക്കൽ വെറുതെ ഒന്നും ചെയ്യാതെ ഇരിക്കാനും മടിയായിത്തുടങ്ങി.

ചെറുപ്പകാലം മുതലുള്ള സുഹൃത്താണ് അഭിലാഷ്. ആ സമയത്ത് അഭിലാഷിന് ബാംഗ്ലൂരിൽ ജോലിയുണ്ട്. എന്നാൽ കല്യാണം കഴിച്ചാലോ എന്ന് ഞങ്ങൾ തീരുമാനിച്ചു. പക്ഷേ കല്യാണം കഴിഞ്ഞാൽ പിന്നെ അഭിനയിക്കാൻ പറ്റില്ല എന്ന് അഭിലാഷ് ഒരു നിബന്ധന വെച്ചു. അങ്ങനെ കല്യാണത്തിന് വേണ്ടി വീണ്ടും സിനിമയിൽ നിന്ന് ഒളിച്ചോടി.

You must be logged in to post a comment Login