ദിലീപ് കോടതിയിൽ ഹാജരാകില്ല ; നടി ആക്രമിക്കപ്പെട്ട കേസിന്‍റെ വിചാരണ നടപടികൾ ഇന്ന് ആരംഭിക്കും

കൊച്ചി: കൊച്ചിയിലെ പ്രത്യേക കോടതിയിൽ ഇന്ന് നടി ആക്രമിക്കപ്പെട്ട കേസിന്റെ വിചാരണ നടപടികൾ ആരംഭിക്കും. പ്രതിഭാഗം ഇന്ന് വാദം ആരംഭിക്കും. നടൻ ദിലീപ് ഇന്ന് കോടതിയിൽ ഹാജരാകില്ല എന്ന് ഏഷ്യാനെറ്റ് ന്യൂസ് റിപ്പോർട്ട് ചെയ്തു.

ഒമ്പതാം പ്രതിയായ സനിൽകുമാറിന്റെ ജാമ്യം നേരത്തെ വിചാരണക്കോടതി റദ്ദ് ചെയ്തിരുന്നു. തുടർച്ചയായി മൂന്നാം തവണയും വിചാരണക്ക് ഹാജരാകാതിരുന്നതിനെ തുടർന്നാണ് ജാമ്യം റദ്ദ് ചെയ്തത്. പോലീസ് കോടതിയിൽ സമർപ്പിച്ച കുറ്റപത്രത്തിന്മേൽ പ്രോസിക്യൂഷൻ നേരത്തെ വാദം പൂർത്തിയാക്കിയിരുന്നു.

കേസിന്റെ വിചാരണ ഇനി വൈകിക്കൂടാ എന്നും ആറ് മാസത്തിനുള്ളിൽ വിചാരണ പൂർത്തിയാക്കണമെന്നും സുപ്രീം കോടതി കഴിഞ്ഞ ദിവസം നിർദേശം നൽകുകയും ചെയ്തിരുന്നു. നടി ആക്രമണ കേസിലെ നിർണായക രേഖയായ മെമ്മറി കാർഡും അതിലെ ദൃശ്യങ്ങളും ആവശ്യപ്പെട്ട് ദിലീപ് സുപ്രീം കോടതിയെ സമീപിച്ചിരുന്നു. എന്നാൽ ദിലീപിന്റെ ആവശ്യം സുപ്രീം കോടതി തള്ളി.

അഭിഭാഷകർക്കൊപ്പം ഇരുന്ന് ദൃശ്യങ്ങൾ കാണാൻ സുപ്രീം കോടതി ദിലീപിന് അനുമതി നൽകി. എന്നാൽ, മെമ്മറി കാർഡ് ദിലീപിന് നൽകില്ലെന്ന് സുപ്രീം കോടതി വ്യക്തമാക്കി. ദിലീപിന് അവ നൽകരുതെന്ന നടിയുടെ അപേക്ഷ സ്വീകരിച്ചാണ് സുപ്രീം കോടതിയുടെ നിർദേശം വന്നത്. ദിലീപിനോ അഭിഭാഷകർക്കോ വിദഗ്ധർക്കോ അതിലെ ദൃശ്യങ്ങൾ പരിശോധിക്കാം എന്നാണ് സുപ്രീം കോടതി നൽകിയ ഉത്തരവ്.

നടിയെ ആക്രമിക്കുന്ന ദൃശ്യങ്ങളുടെ പകര്‍പ്പ് സിആര്‍പിസി നിയമത്തിലെ 201-ാം വകുപ്പ് പ്രകാരം തനിക്ക് അവകാശപ്പെട്ടതാണ് എന്നതായിരുന്നു ദിലീപ് കോടതിയിൽ ചൂണ്ടിക്കാട്ടിയത്. ഈ രേഖകള്‍ ലഭിച്ചാൽ മാത്രമേ തൻ്റെ നിരപരാധിത്വം തെളിയിക്കാൻ സാധിക്കൂവെന്നും ദിലീപ് കോടതിയിൽ വാദിച്ചിരുന്നു.

ദൃശ്യങ്ങള്‍ ചോരാതിരിക്കാൻ വാട്ടര്‍മാര്‍ക്ക് ഇടാമെന്നും സിഡാക്കിനെ ഇതിൻ്റെ ചുമതലകള്‍ ഏൽപ്പിക്കാമെന്നും കോടതിയെ ദിലീപ് അറിയിച്ചു. എന്നാൽ ദിലീപിൻ്റെ എല്ലാ വാദങ്ങളും സുപ്രീംകോടതി തള്ളി. മുതിര്‍ന്ന അഭിഭാഷകൻ മുകുൾ റോത്തഗിയാണ് ദിലീപിന് വേണ്ടി സുപ്രീംകോടതിയിൽ ഹാജരായത്.

നടിയുടെ സ്വകാര്യത പരിഗണിച്ചുകൊണ്ടാണ് ദൃശ്യങ്ങൾ രേഖകളാണെങ്കിലും കൈമാറേണ്ടതില്ലെന്ന നിലപാടിലേക്ക് കോടതി എത്തിയത്. മെമ്മറി കാർഡിലെ ദൃശ്യങ്ങൾ രഹസ്യമായി തന്നെ സൂക്ഷിക്കണമെന്നും കോടതി ചൂണ്ടിക്കാട്ടി.

സ്വകാര്യത കണക്കിലെടുത്ത് ദിലീപിന് ദൃശ്യങ്ങള്‍ കൈമാറരുതെന്ന് സംസ്ഥാന സര്‍ക്കാരും ആക്രമണത്തിന് ഇരയായ നടിയും കോടതിയോട് അഭ്യര്‍ത്ഥിച്ചിരുന്നു. മെമ്മറി കാർഡ് രേഖയാണെങ്കിൽ പ്രതിക്ക് നൽകേണ്ടതാണെന്നും തൊണ്ടിമുതലാണെങ്കിൽ നൽകാനാവില്ലെന്നും കേസിൽ വാദമുയർന്നിരുന്നു. സെപ്റ്റംബർ 17 ന് ദിലീപ് സമർപ്പിച്ച ഹർജിയിൽ വാദം പൂർത്തിയായശേഷം വിധി പറയാൻ മാറ്റിവയ്ക്കുകയായിരുന്നു.

You must be logged in to post a comment Login