വ്യക്തിഗത സ്കോര്‍ 31ല്‍ നില്‍ക്കെ അസേല ഗുണരത്നെ സ്ലിപ്പില്‍ കൈവിട്ടശേഷം തിരഞ്ഞുനോക്കാതിരുന്ന ധവാന്‍ ഏകദിന ശൈലിയില്‍ ബാറ്റ് വീശിയാണ് അര്‍ധ സെഞ്ചുറിയിലെത്തിയത് 62 പന്തില്‍ അര്‍ധ സെഞ്ചുറിയിലെത്തിയ ധവാന്‍ 110 പന്തിലാണ് സെഞ്ചുറിയിലെത്തിയത്. സെഞ്ചുറിക്ക് ശേഷം ധവാന്‍ ടോപ് ഗിയറിലായി.

സെഞ്ചുറി പിന്നിട്ടശേഷം 37 പന്തില്‍ 50 റണ്‍സ് കൂടി അടിച്ച ധവാന്‍ 147 പന്തിലാണ് 150 കടന്നത്. പിന്നീട് 20 പന്തില്‍ 40 റണ്‍സ് കൂടി കൂട്ടിച്ചേര്‍ത്ത് ഡബിള്‍ സെഞ്ചുറിയിലേക്ക് നീങ്ങിയ ധവാനെ അമിതാവേശം ചതിച്ചു. 168 പന്തില്‍ 190 റണ്‍സുമായി ധവാന്‍ മടങ്ങിയശേഷം ക്രീസിലെത്തിയ ക്യാപ്റ്റന്‍ വിരാട് കോലിക്ക് അല്‍പായുസേ ഉണ്ടായിരുന്നുള്ളു. 8 പന്തില്‍ 3 റണ്‍സെടുത്ത് കോലി വീണശേഷം രഹാനെയെ കൂട്ടുപിടിച്ച് ഇന്നിംഗ്സ് കെട്ടിപ്പടുത്ത പൂജാര കൂടുതല്‍ നഷ്ടങ്ങളില്ലാതെ ഇന്ത്യയെ 400ന് തൊട്ടടുത്ത് എത്തിച്ചു. 173 പന്തില്‍ സെഞ്ചുറിയിലെത്തിയ പൂജാര 244 പന്തിലാണ് 144 റണ്‍സെടുത്തത്. ലങ്കയ്ക്കായി നുവാന്‍ പ്രദീപാണ് ഇന്ത്യന്‍ നിരയില്‍ വീണ മൂന്നു വിക്കറ്റുകളും സ്വന്തമാക്കിയത്.