നടിയെ ആക്രമിച്ച കേസില്‍ തൊണ്ടി മുതലാണ് മെമ്മറി കാര്‍ഡ്; ദിലീപിന് നല്‍കരുതെന്ന് സര്‍ക്കാര്‍ സുപ്രിം കോടതിയില്‍

ന്യൂഡല്‍ഹി: നടിയെ ആക്രമിച്ച കേസില്‍ മെമ്മറി കാര്‍ഡ് ദിലീപിന് നല്‍കരുതെന്ന് വാദിച്ച് സര്‍ക്കാര്‍ സുപ്രിം കോടതിയില്‍. മെമ്മറി കാര്‍ഡിലെ ദൃശ്യങ്ങള്‍ രേഖകള്‍ തന്നെയാണ്. ഇരയുടെ സ്വകാര്യതയും സുരക്ഷയും കണക്കിലെടുക്കണമെന്നും മെമ്മറി കാര്‍ഡ് ദിലീപ് നല്‍കിയാല്‍ ചിലപ്പോള്‍ സമൂഹമാധ്യമങ്ങളില്‍ പ്രചരിപ്പിച്ചേക്കാമെന്നും സര്‍ക്കാര്‍ സുപ്രിം കോടതിയെ അറിയിച്ചു. മെമ്മറി കാര്‍ഡിലെ ദൃശ്യങ്ങള്‍ രേഖയാണെങ്കില്‍ അത് തനിയ്ക്ക് കിട്ടാന്‍ അവകാശമുണ്ടെന്ന് ദിലീപിന് വേണ്ടി ഹാജരായ അഭിഭാഷകന്‍ കോടതിയില്‍ വാദിച്ചു.

മെമ്മറി കാര്‍ഡ് കേസിലെ തൊണ്ടിമുതലാണോ രേഖയാണോ എന്ന് സുപ്രീംകോടതി ഇന്നലെ ചോദിച്ചിരുന്നു. കേസിലെ തൊണ്ടിമുതലാണ് മെമ്മറി കാര്‍ഡ്, അതിലെ ദൃശ്യങ്ങള്‍ രേഖകളാണെന്നും സര്‍ക്കാര്‍ സുപ്രീംകോടതിയെ അറിയിച്ചു. മെമ്മറി കാര്‍ഡ് നല്‍കുന്നത് ഗുരുതരമായ പ്രത്യാഘാതങ്ങളുണ്ടാക്കുമെന്നും ദൃശ്യങ്ങള്‍ പ്രതിയ്ക്ക് കൈമാറാതെ രേഖകള്‍ പരിശോധിക്കാനുള്ള നടപടിക്രമങ്ങള്‍ വേണമെന്നും നടി ആവശ്യപ്പെട്ടു. തന്റെ സ്വകാര്യതെ ഒരിക്കലും ബാധിക്കരുതെന്ന് നടി പറഞ്ഞു. ജസ്റ്റിസ് എ എന്‍ ഖാന്‍വില്‍ക്കര്‍ അധ്യക്ഷനായ ബഞ്ചാണ് കേസ് പരിഗണിക്കുന്നത്.

കേസിലെ നിര്‍ണ്ണായക തെളിവായ മെമ്മറി കാര്‍ഡ് പ്രതിയായ ദിലീപിന് നല്‍കരുതെന്ന് ആവശ്യപ്പെട്ട് കഴിഞ്ഞ ദിവസമാണ് നടി സുപ്രിം കോടതിയെ സമീപിച്ചത്.

You must be logged in to post a comment Login