നഷ്ടത്തിലായ 10 ഇ-ബസ് ഓട്ടം നിർത്തി; 1500 എണ്ണം നിരത്തിലിറക്കാൻകെഎസ്ആര്‍ടിസി

 

തിരുവനന്തപുരം: പരീക്ഷണാര്‍ത്ഥം നിരത്തിലിറക്കിയ 10 ഇലക്ട്രിക് ബസുകള്‍ നഷ്ടം മൂലം ഓട്ടം നിര്‍ത്തിയതിനു പിന്നാലെ വാടക അടിസ്ഥാനത്തിൽ 1500 വൈദ്യുത ബസുകള്‍ കൂടി പുറത്തിറക്കാനുള്ള നീക്കവുമായി കെഎസ്ആര്‍ടിസി. സര്‍വീസ് നഷ്ടത്തിലാണെന്നതിനു പുറമെ ബസുകള്‍ക്ക് വാടക നല്‍കുന്നതിൽ കെഎസ്ആര്‍ടിസി വീഴ്ച വരുത്തിയതോടെയാണ് ബസുകള്‍ വാടകയ്ക്ക് നല്‍കുന്ന കമ്പനി സര്‍വീസ് നിര്‍ത്തിയത്.

വൈദ്യുത ബസ് സര്‍വീസിനെക്കുറിച്ച് പഠിക്കാനായി ഗതാഗതമന്ത്രി എ കെ ശശീന്ദ്രന്‍റെ നേതൃത്വത്തിലുള്ള സംഘം ലണ്ടനിലേയ്ക്ക് പുറപ്പെടുന്നതിനിടയിലാണ് കെഎസ്ആര്‍ടിസിയുടെ സാഹസിക നീക്കം. തിരുവനന്തപുരം, കൊച്ചി, കോഴിക്കോട് സോണുകളിലേയ്ക്ക് 500 ബസ് വീതം നല്‍കാനായാണ് കോര്‍പ്പറേഷൻ വൈദ്യുത ബസുകള്‍ക്കായി ടെൻഡര്‍ വിളിച്ചിരിക്കുന്നത്. എന്നാൽ മൂന്ന് മാസം മുൻപ് കൊട്ടിഘോഷിച്ച് സര്‍വീസ് ആരംഭിച്ച പത്ത് ബസുകള്‍ ഒരു മാസം കൊണ്ട് 10-15 ലക്ഷം രൂപ നഷ്ടമുണ്ടാക്കിയെന്നാണ് കോര്‍പ്പറേഷന്‍റെ കണക്ക്. വൈദ്യുത ബസുകള്‍ മാര്‍ച്ചിൽ 15 ലക്ഷവും ഏപ്രിലിൽ 12 ലക്ഷവുമാണ് നഷ്ടമുണ്ടാക്കിയത്. കിലോമീറ്ററിന് 43.20 പൈസയാണ് ബസുകളുടെ വാടക. ഇതു പ്രകാരം ഒരു ബസിന് പ്രതിദിനം 18144 രൂപ വാടക നല്‍കേണ്ടതുണ്ട്. എന്നാൽ ഇതിനുള്ള വരുമാനം സര്‍വീസിൽ നിന്ന് ലഭിക്കുന്നില്ല. ഇതോടെ കരാര്‍ പ്രകാരം നല്‍കേണ്ട വാടകയിൽ കോര്‍പ്പറേഷൻ വീഴ്ച വരുത്തുകയായിരുന്നു. മാര്‍ച്ച് 15ന് നികുതി അടയ്ക്കേണ്ട സമയപരിധി കഴിഞ്ഞെന്നും വാടക ലഭിക്കാതെ തുടരാനാവില്ലെന്നും ചൂണ്ടിക്കാട്ടി വൈദ്യുത ബസ് കമ്പനി പത്ത് ബസുകളുടെയും സര്‍വീസ് അവസാനിപ്പിക്കുകയായിരുന്നു. എന്നാൽ ഇതിനു ശേഷവും കെഎസ്ആര്‍ടിസി പ്രശ്നപരിഹാരത്തിന് ശ്രമിച്ചിട്ടില്ല.

ഇതിനിടെ ഇ – മൊബിളിറ്റിയുടെ സാധ്യത പഠിക്കാനായി ഗതാഗതമന്ത്രിയുടെ നേതൃത്വത്തിലുള്ള സംഘം അടുത്ത മാസം ലണ്ടൻ സന്ദര്‍ശിക്കുന്നുണ്ട്. വിരമിക്കാൻ ഒരു മാസം മാത്രമാണ് ബാക്കിയുള്ളതെങ്കിലും കെഎസ്ആര്‍ടിസി എംഡി ദിനേശിനെയും യാത്രാസംഘത്തിൽ ഉള്‍പ്പെടുത്തിയിട്ടുണ്ട്. ഇദ്ദേഹത്തെ വീണ്ടും നിയമിക്കുന്നത് സംബന്ധിച്ച് സര്‍ക്കാര്‍ ഉത്തരവുകളൊന്നും ഇറക്കിയിട്ടില്ല.

You must be logged in to post a comment Login