നീണ്ടകരയിൽ നിന്ന് കാണാതായ ഒരു മത്സ്യത്തൊഴിലാളിയുടെ മൃതദേഹം കണ്ടെത്തി

 

തിരുവനന്തപുരം: കൊല്ലം നീണ്ടകരയിൽ നിന്ന് മത്സ്യബന്ധനത്തിനു പോയവരിൽ കാണാതായ ഒരു മത്സ്യത്തൊഴിലാളിയുടെ മൃതദേഹം കണ്ടെത്തി. തമിഴ്‍‍നാട് സ്വദേശി സഹായ രാജിന്‍റെ മൃതദേഹമാണ് കണ്ടെത്തിയത്. തിരുവനന്തപുരം അഞ്ചു തെങ്ങിൽ നിന്നാണ് മൃതദേഹം കണ്ടെത്തിയത്. ശേഷിക്കുന്ന രണ്ടു പേര്‍ക്കായി തെരച്ചിൽ തുടരുകയാണ്.

കോസ്റ്റ്ഗാര്‍ഡിനു പുറമെ നാവികസേനയും കാണാതായവര്‍ക്കു വേണ്ടി തെരച്ചിൽ നടത്തുന്നുണ്ട്. ഇന്നലെ രാവിലെ കൊച്ചിയിൽ നിന്നെത്തിയ കോസ്റ്റ് ഗാര്‍ഡിന്‍റെ ഡോണിയര്‍ വിമാനം തങ്കശ്ശേരി, നീണ്ടകര, ഇരവിപുരം, വര്‍ക്കല ഭാഗങ്ങളിൽ തെരച്ചിൽ നടത്തിയ ശേഷം ഉച്ചയോടെ മടങ്ങി. തുടര്‍ന്ന് കൊച്ചിയിൽ നിന്നെന്നിയ നാവികസേനയുടെ ഹെലികോപ്റ്റര്‍ വൈകിട്ട് അഞ്ച് വരെ തെരച്ചിൽ നടത്തി.

വെള്ളിയാഴ്ചയാണ് നീണ്ടകരയിൽ നിന്ന് മത്സ്യബന്ധനത്തിനായി അഞ്ചു പേര്‍ പോയ വള്ളം മുങ്ങിയത്. സ്റ്റാലിൻ, നിക്കോളാസ്, രാജു, ജോൺ ബോസ്കോ, സഹായ രാജ് എന്നിവരായിരുന്നു വള്ളത്തിലുണ്ടായിരുന്നത്. ഇതിൽ സ്റ്റാലിനും നിക്കോളാസും 12 കിലോമീറ്ററോളം നീന്തി വൈകിട്ട് മൂന്നരയോടെ കരയ്ക്കെത്തിയിരുന്നു. എന്നാൽ മൂന്നു പേരെ കുറിച്ച് വിവരം ലഭിച്ചില്ല. കന്യാകുമാരി നിരോടിൽ നിന്നുള്ളവരാണ് അപകടത്തിൽപ്പെട്ട എല്ലാവരും.

തുറമുഖത്തു നിന്ന് ഒന്നര നോട്ടിക്കൽ മൈൽ അകലെയാണ് വള്ളം മറിഞ്ഞതെന്നാണ് റിപ്പോര്‍ട്ടുകള്‍. മരിച്ചെന്ന് സ്ഥിരീകരിച്ച സഹായരാജുവും കാണാതായ രാജുവും ജോൺ ബോസ്കോയും തീരത്തിനടത്തു വരെ തങ്ങളോടൊപ്പം തീരത്തിനടുത്തു വരെ നീന്തിയെങ്കിലും ശക്തമായ തിരയിൽ കാണാതായെന്നാണ് രക്ഷപെട്ടവര്‍ അറിയിച്ചത്. സ്റ്റാലിന്‍റെ ഉടമസ്ഥതയിലുള്ളതാണ് മറിഞ്ഞ വള്ളം. ഈ വള്ളം തകര്‍ന്ന നിലയിൽ മരുത്തടി ഭാഗത്തു നിന്ന് കണ്ടെത്തിയിരുന്നു.

കാണാതായ മൂന്നു പേര്‍ക്കായി കോസ്റ്റ് ഗാര്‍ഡിന്‍റെയും മത്സ്യത്തൊഴിലാളികളുടെയും നേതൃത്വത്തിൽ ഇന്നലെ വ്യാപകമായ തെരച്ചിൽ നടത്തിയിരുന്നു. കോസ്റ്റ് ഗാര്‍ഡിന്‍റെ കപ്പലും മറൈൻ എൻഫോഴ്സ്മെന്‍റിന്‍റെ രണ്ട് ബോട്ടുകളും അഞ്ച് മത്സ്യത്തൊഴിലാളി വള്ളങ്ങളുമാണ് തെരച്ചിലിൽ ഏര്‍പ്പെട്ടത്.

You must be logged in to post a comment Login