നെയ്യാറ്റിന്‍കര മരണങ്ങള്‍ക്ക് പിന്നില്‍ ഭര്‍ത്താവ്: ആത്മഹത്യക്കുറിപ്പ്

തിരുവനന്തപുരം: നെയ്യാറ്റിൻകര മാരായമുട്ടത്ത് അമ്മയും മകളും ആത്മഹത്യ ചെയ്‍ത സംഭവത്തിന് പിന്നില്‍ ഭര്‍ത്താവും ബന്ധുക്കളുമെന്ന് പോലീസ്. കുടുംബ പ്രശ്‍നങ്ങളാണ് ആത്മഹത്യയ്‍ക്ക് പിന്നിലെന്ന് കാണിച്ച് എഴുതിയ ആത്മഹത്യക്കുറിപ്പ് പോലീസ് കണ്ടെടുത്തു.

ഭര്‍ത്താവ് ചന്ദ്രന്‍, ചന്ദ്രന്‍റെ അമ്മ മറ്റു രണ്ട് ബന്ധുക്കള്‍ എന്നിവരെ പോലീസ് പിടികൂടി.

കനറ ബാങ്കിൻെറ ജപ്‍തി ഭീഷണിയെ തുടര്‍ന്നാണ് നെയ്യാറ്റിന്‍കര മാരായമുട്ടത്ത് ലേഖ (40), മകൾ വൈഷ്ണവി (19) എന്നിവര്‍ തീകൊളുത്തി മരിക്കാന്‍ കാരണം. എന്നാല്‍ വായ്‍പയ്‍ക്ക് പുറമെ കുടുംബത്തില്‍ ഉണ്ടായിരുന്ന പീഡനങ്ങളും ഇവരുടെ മരണത്തിന് കാരണമായെന്നാണ് ആത്മഹത്യക്കുറിപ്പില്‍ നിന്ന് വ്യക്തമാകുന്നത്.

സ്ത്രീധനത്തിന്‍റെ പേരില്‍ പീഡിപ്പിച്ചതായും ഭര്‍ത്താവ് വായ്‍പ തിരിച്ചടയ്‍ക്കാന്‍ ഒന്നും ചെയ്‍തില്ലെന്നുമുള്ള വെളിപ്പെടുത്തലുകള്‍ ആത്മഹത്യ കത്തിലുണ്ട്. ഇതിന് പുറമെ പോലീസ് ഇപ്പോള്‍ പിടികൂടിയിട്ടുള്ള പ്രതികളുടെ പേര് പ്രത്യേകം പരാമര്‍ശിച്ച് ആത്മഹത്യ ചെയ്‍ത മുറിയുടെ ചുവരില്‍ ഇവര്‍ എഴുതുകയും ചെയ്‍തിട്ടുണ്ട്.

ഇന്നലെ വൈകീട്ട് മൂന്ന് മണിയോടെയാണ് രണ്ടുപേരും ആത്മഹത്യ ചെയ്‍തത്. നെയ്യാറ്റിൻകര കനറാ ബാങ്കിൽ നിന്ന് 15 വർഷം മുമ്പ് അഞ്ച് ലക്ഷം രൂപയാണ് ഇവർ വായ്‍പ എടുത്തത്. പലിശസഹിതം ആറ് ലക്ഷത്തി എൺപതിനായിരം രൂപയാണ് തിരിച്ചടയ്‍ക്കേണ്ടിയിരുന്നത്.

വീടും വസ്തുവകകളും ജപ്‍തി ചെയ്യുമെന്ന് ബാങ്കിൽ നിന്ന് നോട്ടീസ് വന്നു. വായ്‍പ തിരിച്ചടയ്‍ക്കാന്‍ വീട്ടുകാർ സാവകാശം ചോദിച്ചിരുന്നു. മെയ് പത്താം തീയതി ബാങ്ക് അധികൃതർ വീട്ടിലെത്തിയപ്പോഴാണ് സാവകാശം ചോദിച്ചത്. ഒടുവിൽ മെയ് 15 വരെയാണ് സാവകാശം ലഭിച്ചിരുന്നത്.

ആത്മഹത്യ ചെയ്‍ത അമ്മയുടെയും മകളുടെയും പോസ്റ്റ്‍മോര്‍ട്ടം നടന്നു. ഇന്‍ക്വസ്റ്റിന് ശേഷം മൃതദേഹങ്ങള്‍ ബന്ധുക്കള്‍ക്ക് വിട്ടുനല്‍കി.

You must be logged in to post a comment Login