നെഹ്റു കുടുംബത്തിന്‍റെ എസ്‍പിജി സുരക്ഷ പിന്‍വലിക്കാൻ കേന്ദ്രത്തിന്‍റെ തീരുമാനം

ന്യൂഡൽഹി: നെഹ്റു കുടുംബത്തിന് നൽകി വരുന്ന എസ്‍പിജി സുരക്ഷ പിന്‍വലിക്കാൻ കേന്ദ്ര സർക്കാർ തീരുമാനം. കോൺഗ്രസ് അധ്യക്ഷ സോണിയ ഗാന്ധി, മക്കളായ രാഹുൽ ഗാന്ധി, പ്രിയങ്ക ഗാന്ധി എന്നിവരുടെ സെഡ് പ്ലസ് സുരക്ഷ പിൻവലിക്കാനാണ് തീരുമാനമെന്നാണ് റിപ്പോർട്ടുകൾ.

സ്പെഷ്യല്‍ പ്രൊട്ടക്ഷന്‍ ഗ്രൂപ്പിന്‍റെ സുരക്ഷ പിന്‍വലിച്ച് സിആർപിഎഫിന്‍റെ സുരക്ഷ നൽകാനാണ് കേന്ദ്ര ആഭ്യന്തര മന്ത്രാലയത്തിന്‍റെ നീക്കമെന്നാണ് സർക്കാർ വൃത്തങ്ങൾ നൽകുന്ന സൂചന.

രാജ്യത്തിന്‍റെ പ്രധാനമന്ത്രിമാരായിരുന്ന ഇന്ദിരാ ഗാന്ധിയും രാജീവ് ഗാന്ധിയും കൊല്ലപ്പെട്ടതോടെയായിരുന്നു കുടുംബത്തിന് പ്രത്യേക സുരക്ഷ ഏർപ്പെടുത്തിയത്. നിലവിലെ സാഹചര്യത്തില്‍ നെഹ്റു കുടുംബം സുരക്ഷാഭീഷണി നേരിടുന്നില്ലെന്ന വിലയിരുത്തലാണ് പുതിയ നീക്കത്തിന് പിന്നിൽ.

നിലവിൽ പ്രധാനമന്ത്രിക്കും നെഹ്റു കുടുംബത്തിനും മാത്രമാണ് എസ്പിജി സുരക്ഷയുള്ളത്. നെഹ്റു കുടുംബത്തിന്‍റെ എസ്പിജി സുരക്ഷ പിൻവലിച്ചാൽ നരേന്ദ്ര മോദിയ്ക്ക് മാത്രമാകും സെഡ് പ്ലസ് സുരക്ഷ ലഭിക്കുക. അടുത്തിടെ മുന്‍ പ്രധാനമന്ത്രി ഡോ മന്‍മോഹന്‍ സിങ്ങിന്‍റെ എസ്പിജി സുരക്ഷയും ഒഴിവാക്കിയിരുന്നു. ഇദ്ദേഹത്തിന് സെഡ് പ്ലസ് സുരക്ഷയാണ് നിലവിൽ.

You must be logged in to post a comment Login