പാലാരിവട്ടം പാലം പൊളിക്കുന്നത് വൈകും; കരാറില്ലാതെ പണി അരുതെന്ന് സ്വകാര്യ കമ്പനികൾ

 

കൊച്ചി: ഗുരുതരമായ നിര്‍മാണത്തകരാര്‍ കണ്ടെത്തിയ പാലാരിവട്ടം പാലം പൊളിച്ച് പുതിയ പാലം നിര്‍മിക്കുന്ന പ്രവൃത്തി വൈകിയേക്കും. മേൽപ്പാലം പൊളിച്ചു പണിയാനുള്ള ജോലി ഊരാളുങ്കൽ ലേബര്‍ കോൺട്രാക്റ്റ് സഹകരണ സൊസൈറ്റിയ്ക്ക് നല്‍കുന്നതിനെതിരെ സ്വകാര്യ കരാറുകാര്‍ ഹൈക്കോടതിയെ സമീപിച്ചതോടെ ഹൈക്കോടതി നിര്‍മാണം വിലക്കുകയായിരുന്നു. ഊരാളുങ്കൽ ലേബര്‍ കോൺട്രാക്റ്റ് സൊസൈറ്റിയ്ക്കും തൃശ്ശൂര്‍ ഡിസ്ട്രിക്റ്റ് ലേബര്‍ സഹകരണ സൊസൈറ്റിയ്ക്കും ടെൻഡറില്ലാതെ പ്രവൃത്തികള്‍ നല്‍കുന്നതിനെതിരെ ആറു സ്വകാര്യ നിര്‍മാണ കമ്പനികള്‍ ഹൈക്കോടതിയെ സമീപിക്കുകയായിരുന്നു.

അക്രഡിറ്റ‍ഡ് ഏജൻസികള്‍ക്ക് സര്‍ക്കാര്‍ കരാറില്ലാതെ നിര്‍മാണ കരാറുകള്‍ നൽകുന്നതിനെതിരെയായിരുന്നു സ്വകാര്യ കരാറുകാര്‍ ഹൈക്കോടതിയെ സമീപിച്ചത്. ഊരാളുങ്കൽ സൊസൈറ്റിയടക്കം കേരളത്തിൽ ആകെ 20 അക്രഡിറ്റഡ് ഏജൻസികളാണ് സംസ്ഥാനത്ത് പ്രവര്‍ത്തിക്കുന്നത്. ഇവര്‍ക്ക് സര്‍ക്കാര്‍ കരാറില്ലാതെ നിര്‍മാണ ജോലികള്‍ ഏൽപ്പിച്ചിരുന്നു. ഇതുപ്രകാരമായിരുന്നു ഊരാളുങ്കൽ ലേബര്‍ സൊസൈറ്റിയെ പാലാരിവട്ടം മേൽപ്പാലം പൊളിച്ചു നിര്‍മിക്കുന്ന ചുമതല ഏൽപ്പിക്കാൻ സര്‍ക്കാര്‍ തീരുമാനിച്ചത്. ഇവരുമായി ഇ ശ്രീധരനടക്കമുള്ള ഉന്നത ഉദ്യോഗസ്ഥരും സര്‍ക്കാര്‍ പ്രതിനിധികളും ചര്‍ച്ച നടത്തുകയും ചെയ്തിരുന്നു. ഒക്ടോബര്‍ ഒന്നിന് നിര്‍മാണം തുടങ്ങാനായിരുന്നു സര്‍ക്കാര്‍ ലക്ഷ്യമിട്ടത്. എന്നാൽ സര്‍ക്കാര്‍ ഉത്തരവ് ഒഴികെയുള്ള എല്ലാ നടപടികളും പൂര്‍ത്തിയാക്കിയതിനു പിന്നാലയായിരുന്നു നിയമ നടപടി. ഒക്ടോബര്‍ 10 വരെയാണ് മേൽപ്പാലം പൊളിക്കുന്നത് ഹൈക്കോടതി വിലക്കിയിട്ടുള്ളത്. ഒക്ടോബര്‍ 10ന് മുൻപ് പാലം പൊളിക്കരുതെന്ന് ഹൈക്കോടതി മുൻപും നിര്‍ദ്ദേശിച്ചിരുന്നുവെങ്കിലും സര്‍ക്കാര്‍ നടപടിക്രമങ്ങളുമായി മുന്നോട്ടു പോകുന്നതിൽ തടസ്സമുണ്ടായിരുന്നില്ല. എന്നാൽ പുതിയ വിധിയുടെ പശ്ചാത്തലത്തിൽ പാലം പുനര്‍നിര്‍മാണവുമായി ബന്ധപ്പെട്ട നടപടികള്‍ സര്‍ക്കാരിന് നിര്‍ത്തി വയ്ക്കേണ്ടി വരും.

അക്രഡിറ്റഡ് ഏജൻസികള്‍ക്ക് കരാറില്ലാതെ നിര്‍മാണ ജോലികള്‍ നല്‍കുന്നതിൽ സ്വകാര്യ കരാറുകാര്‍ക്ക് വര്‍ഷങ്ങളായി എതിര്‍പ്പുണ്ട്. അക്രഡിറ്റഡ് ഏജൻസികള്‍ക്ക് കരാറുകള്‍ നല്‍കുന്നതിൽ പ്രത്യേക പരിഗണന സര്‍ക്കാര്‍ നല്‍കുന്നുണ്ട്. അക്രഡിറ്റഡ് ഏജൻസികള്‍ ടെൻഡറിൽ കാണിക്കുന്ന തുകയിൽ നിന്ന് 10 ശതമാനം കുറഞ്ഞ തുകയിൽ നിര്‍മാണം ഏറ്റെടുക്കാമെങ്കിൽ മാത്രമേ സ്വകാര്യ കരാറുകാര്‍ക്ക് പ്രവൃത്തി ലഭിക്കൂ.

മുൻപ് അമ്പലപ്പുഴ – പൊടിയാടി റോഡിന്‍റെ നിര്‍മാണച്ചുമതല ഊരാളുങ്കൽ ലേബര്‍ സൊസൈറ്റിയ്ക്ക് കരാറില്ലാതെ നല്‍കിയിരുന്നു. 69 കോടി രൂപയ്ക്കായിരുന്നു പ്രവൃത്തി ഏൽപ്പിക്കാൻ തീരുമാനിച്ചത്. എന്നാൽ സ്വകാര്യ കരാറുകാര്‍ ഇതിനെതിരെ ഹൈക്കോടതിയെ സമീപിച്ചതോടെ ടെൻഡറിലൂടെ പ്രവൃത്തി ഏൽപ്പിക്കാൻ ഉത്തരവായി. തുടര്‍ന്ന് ഊരാളുങ്കൽ ലേബര്‍ സൊസൈറ്റി തന്നെ ഇതേ ജോലി 54 കോടി രൂപയ്ക്ക് കരാറെടുത്തതും ഹര്‍ജിക്കാര്‍ ഹൈക്കോടതിയിൽ ചൂണ്ടിക്കാട്ടി.

You must be logged in to post a comment Login