പിഎംസി ബാങ്ക് തട്ടിപ്പ്; മുൻ മാനേജിങ് ഡയറക്ടറായ മലയാളി അറസ്റ്റിൽ

മുംബൈ: പഞ്ചാബ് ആൻഡ് മഹാരാഷ്ട്ര സഹകരണ ബാങ്ക് തട്ടിപ്പുമായി ബന്ധപ്പെട്ട് മുൻ മാനേജിങ് ഡയറക്ടറും മലയാളിയുമായ ജോയ് തോമസ് അറസ്റ്റിൽ. മുംബൈ സാമ്പത്തിക കുറ്റാന്വേഷണ വിഭാഗമാണ് ഇയാളെ അറസ്റ്റ് ചെയ്തത്. അഴിമതി ആരോപണം ഉയർന്നതിനെത്തുടർന്ന് ജോയ് തോമസിനെ സസ്പെന്റ് ചെയ്തിരുന്നു.

ഒളിവിലായിരുന്ന ജോയ് തോമസിനെ അറസ്റ്റ് ചെയ്തതായി മുംബൈ പോലീസ് വക്താവ് വ്യക്തമാക്കി. ഇയാളെ ചോദ്യം ചെയ്തുവരികയാണെന്നും കൂടുതൽ വിവരങ്ങൾ വരും ദിവസങ്ങളിൽ വ്യക്തമാകുമെന്നും പോലീസ് പറഞ്ഞു.

എച്ച്ഡിഐഎല്ലിന് നൽകിയ 4335 കോടി വായ്പ മൂന്ന് വർഷമായി തിരിച്ചടവ് മുടങ്ങിയിട്ടും നിഷ്ക്രിയ ആസ്തിയായി മാറ്റാതിരുന്നതാണ് റിസർവ് ബാങ്ക് നടപടികളിലേക്ക് നയിച്ചത്. കോർ ബാങ്കിങ് സംവിധാനത്തിൽ ഉൾപ്പെടുത്താതെ 21,049 വ്യാജ അക്കൗണ്ട് വഴി ഈ വായ്പാ വിവരം ഓഡിറ്റർമാരിൽനിന്നും മറച്ചുവെച്ചു. ഈ കേസുമായി ബന്ധപ്പെട്ട് എച്ച്ഡിഎല്ലിന്റെ രണ്ട് ഡയറക്ടർമാരെ വ്യാഴാഴ്ച അറസ്റ്റ് ചെയ്തു.

റിയൽ എസ്റ്റേറ്റ് സ്ഥാപനമായ എച്ച്ഡിഎല്ലിന്റെ 3500 കോടിയോളം വരുന്ന ആസ്തി മരവിപ്പിച്ചിട്ടുണ്ട്. എക്സിക്യൂട്ടീവ് ചെയർമാൻ രാകേഷ് കുമാർ വാധാവൻ, മാനേജിങ് ഡയറക്ടർ സാരംഗ് വാധാവൻ എന്നിവരാണ് വ്യാഴാഴ്ച അറസ്റ്റിലായത്.

You must be logged in to post a comment Login