‘പൂതനമാര്‍ക്ക് ജയിക്കാനുള്ള സ്ഥലമല്ല അരൂർ’; വിവാദ പരാമർശവുമായി മന്ത്രി ജി സുധാകരൻ

 

ആലപ്പുഴ: അരൂരിൽ എൽഡിഎഫ് സ്ഥാനാർത്ഥിയുടെ തെരഞ്ഞെടുപ്പ് പ്രചാരണത്തിനിടെ യുഡിഎഫ് സ്ഥാനാർത്ഥിയ്ക്കെതിരെ വിവാദ പരാമർശവുമായി മന്ത്രി ജി സുധാകരൻ. ‘പൂതനമാർക്ക് ജയിക്കാനുള്ള സ്ഥലമല്ല അരൂരെന്നാണ്’ മന്ത്രിയുടെ പ്രസ്താവന. തൈക്കാട്ടുശേരിയിലെ കുടുംബയോഗത്തിലായിരുന്നു പ്രതിപക്ഷത്തെ വിമർശിക്കുന്നതിനിടെ മന്ത്രി വിവാദ പ്രസ്താവന നടത്തിയത്.

കള്ളം പറഞ്ഞും മുതലക്കണ്ണീര്‍ ഒഴുക്കിയുമാണ് യുഡിഎഫ് ജയിക്കാന്‍ ശ്രമിക്കുന്നതെന്നും ജി സുധാകരൻ പറഞ്ഞു. ‘കഴിഞ്ഞ തവണ 38000 വോട്ടിന് തോറ്റപ്പോഴും സി.ആര്‍ ജയപ്രകാശ് കള്ളം പറഞ്ഞ് വോട്ട് ചോദിച്ചിരുന്നില്ല. ഇത്തവണ എറണാകുളത്ത് നിന്ന് കുറച്ച് സുഹൃത്തുക്കളെ കൊണ്ടുവന്ന് കള്ളപ്രചാരണം നടത്തുകയാണ്.’ മന്ത്രി പറഞ്ഞു. മാതൃഭൂമി ഡോട്ട് കോമാണ് ഇക്കാര്യം റിപ്പോർട്ട് ചെയ്തിരിക്കുന്നത്.

അഞ്ച് നിയമസഭാ മണ്ഡലങ്ങളിലേക്ക് നടക്കുന്ന ഉപതെരഞ്ഞെടുപ്പിൽ സിപിഎമ്മിന്‍റെ ഏക സിറ്റിങ് സീറ്റാണ് അരൂരിലേത്. ഡിവൈഎഫ്ഐ നേതാവ് മനു സി പുളിക്കലാണ് മണ്ഡലത്തിലെ ഇടതു സ്ഥാനാർത്ഥി. തെരഞ്ഞെടുപ്പ് പ്രചാരണവുമായി ബന്ധപ്പെട്ട കുടുംബയോഗത്തിൽ സംസാരിക്കവെയാണ് ജില്ലയിലെ മുതിർന്ന സിപിഎം നേതാവ് കൂടിയായ ജി സുധാകരന്‍റെ പരാമർശങ്ങൾ.

അരൂരിൽ ഒരു വികസനവുമില്ലെന്ന് പറയുന്ന ഷാനിമോള്‍ ഉസ്മാന്‍ എങ്ങനെയാണ് വികസനം കൊണ്ടുവരികയെന്നും മന്ത്രി ജി സുധാകരൻ ചോദിച്ചു. ഒരിക്കൽകൂടി അരൂരിൽ ഇടത് എംഎൽഎയാണ് ഉണ്ടാകേണ്ടതെന്നും അദ്ദേഹം പറഞ്ഞു.

You must be logged in to post a comment Login