ബിനോയ് കോടിയേരിയെ തേടി മുംബൈ പോലീസ് കണ്ണൂരില്‍  

 

തലശ്ശേരി: ബിനോയ് കോടിയേരിക്കെതിരായ പീഡനപരാതിയുമായി ബന്ധപ്പെട്ട് മുംബൈ പോലീസ് കണ്ണൂരിലെത്തിയതായി സൂചന. പെണ്‍കുട്ടി നല്‍കി പരാതി അന്വേഷിക്കുന്ന ഉദ്യോഗസ്ഥരാണ് കണ്ണൂരില്‍ എത്തിയത്. പരാതിയില്‍ ബിനോയ് കോടിയേരിയുടെ കണ്ണൂരിലെ വീട്ടുവിലാസമാണ് പെണ്‍കുട്ടി രേഖപ്പെടുത്തിയിരിക്കുന്നത്. ഇതിന്‍റെ അടിസ്ഥാനത്തിലാണ് അന്വേഷണ ഉദ്യോഗസ്ഥര്‍ ബിനോയിയെ തേടി കണ്ണൂരിലെത്തിയത്. കണ്ണൂര്‍ ജില്ലാ പോലീസ് ആസ്ഥാനത്തെത്തിയ ഉദ്യോഗസ്ഥര്‍ ജില്ലാ പോലീസ് സൂപ്രണ്ടുമായി കൂടിക്കാഴ്ച നടത്തിയ ശേഷമാകും തുടര്‍നടപടികള്‍ സ്വീകരിക്കുക.

അതേസമയം പെണ്‍കുട്ടി നല്‍കിയ പരാതിയുടെ അടിസ്ഥാനത്തില്‍ മുംബൈ പോലീസ് കേസെടുത്ത് അന്വേഷണ നടപടികള്‍ ആരംഭിച്ചു. കേസിലെ കുറ്റപത്രം പോലീസ് ഇന്ന് കോടതിയില്‍ സമര്‍പ്പിച്ചു. മുംബൈ അന്ധേരി കോടതിയിലാണ് കുറ്റപത്രം സമര്‍പ്പിച്ചിരിക്കുന്നത്. പെണ്‍കുട്ടിയുടെ മൊഴി അന്വേഷണ ഉദ്യോഗസ്ഥര്‍ ഉടന്‍ രേഖപ്പെടുത്തും.

ബിനോയ് കോടിയേരിയോടും ചോദ്യം ചെയ്യലിന് ഹാജരാകണമെന്ന് മുംബൈ പോലീസ് ആവശ്യപ്പെട്ടിരുന്നു. യുവതിയുടെ പരാതിയിൽ ഓഷിവാര പോലീസാണ് ബിനോയ് കോടിയേരിക്ക് നിര്‍ദ്ദേശം നൽകിയതെന്നാണ് റിപ്പോര്‍ട്ട്.

ഓഷിവാര പോലീസ് ബിനോയിയുമായി ഫോണിൽ ബന്ധപ്പെട്ടുവെന്നാണ് സൂചന. മൂന്ന് ദിവസത്തിനുള്ളിൽ ഹാജരാകണമെന്നാണ് പോലീസ് നിര്‍ദ്ദേശം. യുവതിയുടെ പക്കലുള്ള ഡിജിറ്റൽ തെളിവുകളും പോലീസ് പരിശോധിക്കും. ബിനോയിയോടൊപ്പമുള്ള ചിത്രങ്ങളും വാട്സപ്പ് സന്ദേശങ്ങളും തൻ്റെ കൈയിലുണ്ടെന്ന് യുവതി അവകാശപ്പെട്ടിരുന്നു. അതേസമയം ബിനോയ് കോടിയേരി മുൻകൂര്‍ ജാമ്യത്തിനുള്ള ശ്രമം തുടങ്ങിയെന്ന സൂചനകളും പുറത്തുവരുന്നുണ്ട്.

2009 മുതൽ 2018 വരെയുള്ള കാലത്ത് പല തവണ താൻ പീഡിപ്പിക്കപ്പെട്ടെന്നും തന്നെ വിവാഹം ചെയ്യാമെന്ന് ബിനോയ് വാക്ക് തന്നിരുന്നുവെന്നുമാണ് യുവതിയുടെ പരാതി. ബലാത്സംഗം, വഞ്ചന എന്നീ കുറ്റങ്ങള്‍ ചുമത്തിയാണ് ബിനോയ് കോടിയേരിയ്ക്കെതിരെ പോലീസ് കേസെടുത്തിരിക്കുന്നത്. ഈ മാസം 13നാണ് മുംബൈ ഓഷിവാര പോലീസ് സ്റ്റേഷനിൽ എഫ്ഐആര്‍ രജിസ്റ്റര്‍ ചെയ്തിരിക്കുന്നത്.

അതേസമയം നിയമം നിയമത്തിൻ്റെ വഴിക്ക് പോകട്ടെയെന്നും പാര്‍ട്ടി ഇതിൽ ഇടപെടില്ലെന്നുമാണ് സിപിഎം വ്യക്തമാക്കുന്നത്. സിപിഎമ്മിനെതിരെ പ്രതിപക്ഷം രംഗത്തെത്തിയിട്ടുണ്ട്. സംഭവത്തിൽ പ്രതികരിക്കാൻ മുഖ്യമന്ത്രി പിണറായി വിജയനും കോടിയേരി ബാലകൃഷ്ണനും തയ്യാറായിട്ടില്ല.

Malayalam News App ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക

Web Title mumbai police reached kannur to question binoy kodiyeri

( News from Malayalam , TIL Network)

You must be logged in to post a comment Login