ഭവന വായ്‍പ, വാഹന വായ്‍പ പലിശ നിരക്ക് കുറയും: കേന്ദ്ര ധനമന്ത്രി

ന്യൂഡല്‍ഹി: ഇന്ത്യ സാമ്പത്തിക മാന്ദ്യത്തിലേക്ക് പോകുന്നു എന്ന അഭ്യൂഹങ്ങള്‍ക്കിടെ വാഹന വായ്‍പകള്‍, ഭവന വായ്‍പകള്‍, ഉപയോഗ വസ്‍തുക്കള്‍ക്കുള്ള വായ്‍പ കുറയുമെന്ന് പ്രഖ്യാപിച്ച് കേന്ദ്ര ധനമന്ത്രി നിര്‍മ്മല സീതാരാമന്‍.

ബാങ്കുകളില്‍ നിന്നും ബാങ്ക് ഇതര ധനകാര്യ സ്ഥാപനങ്ങളില്‍ നിന്നുമുള്ള വായ്‍പ ബാധ്യത കുറയും. റിസര്‍വ്
ബാങ്ക് എംസിഎല്‍ആര്‍ നിരക്ക് കുറച്ചിട്ടുണ്ട്. ഇത് ബാങ്കുകള്‍ ഉപയോക്താക്കള്‍ക്ക് കൈമാറും. ഇതോടെ വായ്‍പാഭാരം കുറയും – ധനകാര്യമന്ത്രി വാര്‍ത്താ സമ്മേളനത്തില്‍ അറിയിച്ചു.

റിപ്പോ നിരക്കും, മറ്റുള്ള ലോണ്‍ അധിഷ്‍ഠിത ഉല്‍പ്പന്നങ്ങളും ബാങ്കുകള്‍ അവതരിപ്പിക്കും. ഇതോടെ വാഹന, ഭവന, റീട്ടെയ്ല്‍ ലോണുകള്‍ക്കുള്ള തിരിച്ചടവ് തവണകള്‍ വളരെ ലളിതമാകും എന്നാണ് നിര്‍മ്മല സീതാരാമന്‍ പറയുന്നത്.

ഇന്ത്യയിലെ വാഹന നിര്‍മ്മാണ മേഖലയും റീട്ടെയ്ല്‍ കമ്പനികളും കടുത്ത സാമ്പത്തിക നഷ്‍ടത്തിലൂടെയാണ് കടന്നു പോകുന്നതെന്ന് റിപ്പോര്‍ട്ടുകളുണ്ടായിരുന്നു. കേന്ദ്രസര്‍ക്കാര്‍ വിപണിയില്‍ ഇടപെടണമെന്ന് പലരും ആവശ്യപ്പെടുകയും ചെയ്‍തു.

ഇന്ത്യയിലെ ഏറ്റവും വലിയ ഇരുചക്ര വാഹന നിര്‍മ്മാണക്കമ്പനി ഹീറോമോട്ടോകോര്‍പ് നിര്‍മ്മാണം ഇടയ്‍ക്ക് നിറുത്തിയിരുന്നു. സമാനമായി ബിസ്‍കറ്റ് നിര്‍മ്മാണക്കമ്പനികള്‍ പാര്‍ലെ, ബ്രിട്ടാനിയ എന്നിവ തൊഴിലുകള്‍ വെട്ടിച്ചുരുക്കേണ്ടി വരുമെന്ന് മുന്നറിയിപ്പും നല്‍കി.

ഇതിന് പിന്നാലെയാണ് ആശ്വാസ പാക്കേജ് അവതരിപ്പിക്കാന്‍ സര്‍ക്കാര്‍ തീരുമാനിച്ചത്. പ്രതിപക്ഷവും ഇത് സാമ്പത്തിക തളര്‍ച്ച ആയുധമാക്കിയിരുന്നു.

മാര്‍ച്ച് 2020 വരെ വാങ്ങുന്ന എല്ലാ ബിഎസ്-4 വാഹനങ്ങളും രജിസ്ട്രേഷന്‍ കാലാവധി കഴിയുന്നത് വരെ ഉപയോഗിക്കാന്‍ കഴിയുമെന്ന് ധനമന്ത്രി അറിയിച്ചു. പുതിയ വാഹനങ്ങള്‍ വാങ്ങിക്കരുത് എന്ന നിര്‍ദേശം സര്‍ക്കാര്‍ സ്ഥാപനങ്ങള്‍ക്ക് നല്‍കിയത് പിന്‍വലിക്കും. ഇലക്ട്രിക് വാഹനങ്ങളും ഇന്‍റേണല്‍ കംമ്പസ്റ്റിന്‍ വാഹനങ്ങളും രജിസ്റ്റര്‍ ചെയ്യാന്‍ അവസരം നല്‍കും.

എന്തെങ്കിലും ഉത്തേകപാക്കേജ് പ്രഖ്യാപിക്കണമെന്ന് നിര്‍മ്മാതാക്കള്‍ ആവശ്യപ്പെട്ടിരുന്നു. ജിഎസ്‍ടി ഒഴിവാക്കുകയെങ്കിലും വേണം എന്നതായിരുന്നു ആവശ്യം. കഴിഞ്ഞ ഒരു വര്‍ഷമായി പാസഞ്ചര്‍ വാഹനങ്ങളുടെ വില്‍പ്പനയില്‍ ഓരോ മാസവും ഇടിവ് ആണ് രേഖപ്പെടുത്തിയത്.

കമ്പനികളുടെ സിഎസ്‍ആര്‍ പ്രവര്‍ത്തനങ്ങള്‍ മുടങ്ങിയാല്‍ ഇനി മുതല്‍ ക്രിമിനല്‍ കേസിന് പകരം സിവില്‍ കേസ് മാത്രമായി പരിഗണിക്കും.

You must be logged in to post a comment Login