മഞ്ചേശ്വരം തെരഞ്ഞെടുപ്പ് കേസ് അവസാനിപ്പിച്ച് ഹൈക്കോടതി

 

കൊച്ചി: മഞ്ചേശ്വരം തെരഞ്ഞെടുപ്പ് കേസുമായി ബന്ധപ്പെട്ട നടപടികള്‍ അവസാനിപ്പിച്ച് കേരള ഹൈക്കോടതി. മഞ്ചേശ്വരം സ്ഥാനാര്‍ത്ഥിയായിരുന്ന കെ സുരേന്ദ്രന്‍റെ ഹര്‍ജി പരിഗണിച്ചാണ് കോടതി കേസ് അവസാനിപ്പിച്ചത്. കേസിലെ കക്ഷിയായ അബ്ദുള്‍ റസാഖ് എം എൽ എയുടെ മരണത്തിന് പിന്നാലെ കേസ് അവസാനിപ്പിക്കാൻ കോടതി സുരേന്ദ്രന് നേരത്തെ അനുമതി നല്‍കിയിരുന്നു.

ഹര്‍ജി പിൻവലിക്കുന്നതിൽ ആക്ഷേപമുണ്ടെങ്കിൽ അറിയിക്കാൻ കോടതി നല്‍കിയ പത്ത് ദിവസത്തെ സമയപരിധി അവസാനിച്ചിരുന്നു. നിയമസഭാ തെരഞ്ഞെടുപ്പിൽ യു ഡി എഫ് സ്ഥാനാര്‍ത്ഥിയായിരുന്ന അബ്ദുള്‍ റസാഖ് വിജയിച്ചത് കള്ളവോട്ടിലൂടെയായിരുന്നുവെന്നാണ് കെ സുരേന്ദ്രൻ ഹര്‍ജിയിൽ ആരോപിച്ചത്. 259 പേര്‍ കള്ളവോട്ട് ചെയ്താണ് അബ്ദുള്‍ റസാഖ് വിജയിച്ചതെന്നാണ് കെ സുരേന്ദ്രന്‍റെ ആരോപണം. കള്ളവോട്ടിലൂടെയുള്ള അബ്ദുള്‍ റസാഖിന്‍റെ വിജയം അസാധുവാക്കണമെന്നും രണ്ടാം സ്ഥാനത്തുള്ള തന്നെ വിജയിയായി പ്രഖ്യാപിക്കണമെന്നുമായിരുന്നു സുരേന്ദ്രന്‍റെ ആവശ്യം. 89 വോട്ടിന്‍റെ ഭൂരിപക്ഷത്തിനായിരുന്നു കെ സുരേന്ദ്രനെ തോൽപ്പിച്ച് അബ്ദുള്‍ റസാഖ് മഞ്ചേശ്വരത്ത് വിജയം കൊയ്തത്.

എന്നാൽ കേസിലെ കക്ഷികളിൽ മിക്കവരും വിദേശത്തായതിനാൽ സമൻസ് എത്തിക്കാൻ പോലും സാധിക്കില്ലെന്നും മുഴുവൻ സാക്ഷികളെയും വിസ്തരിക്കാൻ കഴിയില്ലെന്നും ചൂണ്ടിക്കാട്ടി സുരേന്ദ്രൻ ഹര്‍ജി പിൻവലിക്കാൻ അപേക്ഷ നല്‍കുകയായിരുന്നു. ഈ ആവശ്യം കോടതി അംഗീകരിക്കുകയായിരുന്നു. കേസിന്‍റെ ഭാഗമായി വോട്ടിങ് മെഷീനുകള്‍ എത്തിച്ചതിന് ചെലവായ 42000 രൂപ സുരേന്ദ്രൻ നല്‍കണമെന്ന് കോടതി നിര്‍ദ്ദേശിച്ചിട്ടുണ്ട്.

അബ്ദുള്‍ റസാഖിന്‍റെ മരണത്തിന് പിന്നാലെ ഹര്‍ജി പിൻവലിക്കുന്നുണ്ടോ എന്ന് കോടതി ആരാഞ്ഞെങ്കിലും സുരേന്ദ്രൻ അനുകൂലമായ മറുപടി നല്‍കിയിരുന്നില്ല. എന്നാൽ ലോക്സഭാ തെരഞ്ഞെടുപ്പിൽ പത്തനംതിട്ട മണ്ഡലത്തിൽ സുരേന്ദ്രൻ സ്ഥാനാര്‍ത്ഥിയാകുമെന്ന സാധ്യത തെളിഞ്ഞതോടെ കേസ് പിൻവലിക്കാൻ ഹൈക്കോടതിയെ സമീപിക്കുകയായിരുന്നു. രണ്ട് ദിവസത്തിനകം മറുപടി നല്‍കാമെന്ന് അറിയിച്ചിരുന്നെങ്കിലും നാല് മാസത്തിനു ശേഷമായിരുന്നു സുരേന്ദ്രൻ മറുപടി അറിയിച്ചത്. എന്നാൽ പത്തനംതിട്ട മണ്ഡലത്തിൽ എൻ ഡി എ സ്ഥാനാര്‍ത്ഥിയായി മത്സരിച്ച കെ സുരേന്ദ്രൻ പരാജയപ്പെട്ടു.

അതേസമയം, കേസിൽ വിധി പ്രതികൂലമാകുമെന്ന് ഉറപ്പായതിനാലാണ് കെ സുരേന്ദ്രൻ കേസിൽ നിന്ന് പിൻമാറിയതെന്നാണ് അനുമാനം.89 വോട്ടിന്‍റെ ഭൂരിപക്ഷമായിരുന്നു മഞ്ചേശ്വരത്ത് അബ്ദുള്‍ റസാഖിന് ഉണ്ടായിരുന്നത്. 291 പേര്‍ അബ്ദുള്‍ റസാഖിനു വേണ്ടി കള്ളവോട്ട് ചെയ്തെന്നായിരുന്നു സുരേന്ദ്രന്‍റെ ആദ്യ ഹര്‍ജി. എന്നാൽ ബി ജെ പി സംശയിച്ചവരിൽ 32 പേര്‍ ബി ജെ പിയുടെ പോഷകസംഘടനയായ ന്യൂനപക്ഷ മോര്‍ച്ചയുടെ അംഗങ്ങളാണെന്ന് തിരിച്ചറിഞ്ഞതിനെത്തുടര്‍ന്ന് 259 പേര്‍ എന്ന് തിരുത്തി കോടതിയിൽ ഹര്‍ജി സമര്‍പ്പിച്ചു. എന്നാൽ ഇതിൽ 175 പേരെ മുസ്ലീം ലീഗ് കോടതിയിലെത്തിച്ച് നാട്ടിലുള്ളവരാണെന്ന് ബോധ്യപ്പെടുത്തി. 11 പേരുടെ മരണസര്‍ട്ടിഫിക്കറ്റും ഹാജരാക്കി. ശേഷിച്ച 186 പേരിൽ 65 പേര്‍ വിദേശത്താണെന്ന് അറിയിച്ചു. ഇവരെ ഹാജരാക്കാൻ ഒരാള്‍ക്ക് 47000 രൂപ വീതം കോടതിയിൽ കെട്ടിവെയ്ക്കണമെന്ന് സുരേന്ദ്രനോട് ആവശ്യപ്പെട്ടെങ്കിലും സുരേന്ദ്രൻ വിസമ്മതിച്ചു. ബാക്കിയുള്ള 73 വോട്ടുകള്‍ കള്ളവോട്ടാണെന്ന് തെളിഞ്ഞാലും വിധി തനിക്കെതിരാകുമെന്ന തിരിച്ചറിവിലാണ് കെ സുരേന്ദ്രൻ കേസിൽ നിന്ന് പിൻമാറിയതെന്നാണ് അനുമാനം.

You must be logged in to post a comment Login