മരട് ഫ്ലാറ്റ് പൊളിക്കൽ: സർക്കാർ എ.ജിയെ സമീപിക്കും

 

കൊച്ചി: ചട്ടംലംഘിച്ച് നിര്‍മ്മിച്ച എറണാകുളം മരട് നഗരസഭയിലെ ഫ്ലാറ്റുകള്‍ പൊളിക്കാതിരിക്കാന്‍ സര്‍ക്കാര്‍ ഇടപെടല്‍. ഫ്ലാറ്റുകള്‍ പൊളിച്ചുനീക്കാന്‍ നിര്‍ദേശിച്ച സുപ്രീംകോടതി ഉത്തരവില്‍ അറ്റോണി ജനറലിനോട് സര്‍ക്കാര്‍ നിയമോപദേശം തേടും. സര്‍വ്വകക്ഷിയോഗത്തില്‍ ആണ് തീരുമാനം.

സര്‍വ്വകക്ഷി സംഘത്തെ ഡല്‍ഹിയിലേക്ക് അയക്കണമെന്ന് പ്രതിപക്ഷ നേതാവ് രമേശ് ചെന്നിത്തല യോഗത്തില്‍ ആവശ്യപ്പെട്ടു. സിപിഐ സംസ്ഥാന സെക്രട്ടറി കാനം രാജേന്ദ്രന്‍ സര്‍ക്കാര്‍ തീരുമാനം എതിര്‍ത്തു. ഫ്ലാറ്റുകള്‍ പൊളിച്ചുനീക്കണമെന്ന മുന്‍ അഭിപ്രായത്തില്‍ കാനം ഉറച്ചുനിന്നു.

സെപ്റ്റംബര്‍ 20ന് മുന്‍പ് ഫ്ലാറ്റുകള്‍ പൊളിച്ചുനീക്കണം എന്ന കര്‍ശന നിര്‍ദേശമാണ് സുപ്രീംകോടതി നല്‍കിയിട്ടുള്ളത്. വില്‍പ്പന നടത്തിയ മരടിലെ ഫ്ലാറ്റുകളുടെ കാര്യത്തില്‍ ഇനി ഉത്തരവാദിത്തമില്ലെന്നാണ് നിര്‍മാതാക്കള്‍ വാദിക്കുന്നത്. ഇത് കാണിച്ച് മരട് നഗരസഭയ്ക്ക് ഇവര്‍ കത്ത് നല്‍കിയിരുന്നു.

ഇതിനിടെ മരടിലെ ഫ്ലാറ്റുകള്‍ക്ക് നഗരസഭ അനുമതി നല്‍കിയത് കോടതി ഉത്തരവ് ഉണ്ടായാല്‍ ഫ്ലാറ്റുകള്‍ ഒഴിയുകയോ പൊളിച്ചുകളയുകയോ വേണ്ടിവരുമെന്ന മുന്നറിയിപ്പോടെയാണെന്ന് വ്യക്തമാക്കുന്ന രേഖകള്‍ വാര്‍ത്താ ചാനലുകള്‍ പുറത്തുവിട്ടിരുന്നു.

ഹോളിഡേ ഹെറിറ്റേജ്, ഹോളി ഫെയ്ത്ത്, ജെയ്ന്‍ ഹൗസിങ്, കായലോരം അപ്പാര്‍ട്ട്‌മെന്‍റ്‍, ആല്‍ഫാ വെഞ്ചേഴ്‌സ് എന്നിവ പൊളിച്ചു മാറ്റനാണ് കോടതി ഉത്തരവിട്ടത്. 350ഓളം കുടുംബങ്ങള്‍ ഫ്ലാറ്റുകളില്‍ താമസമുണ്ടെന്നാണ് കണക്ക്.

You must be logged in to post a comment Login