മരട് ഫ്ളാറ്റ് പൊളിക്കൽ; സുപ്രീം കോടതിയുടെത് കടുത്ത മുന്നറിയിപ്പ്

കൊച്ചി: തീരദേശ പരിപാലന നിയമം ലംഘിച്ച് മരടില്‍ നിര്‍മ്മിച്ച അഞ്ച് കെട്ടിടങ്ങള്‍ പൊളിക്കുന്ന കാര്യത്തില്‍ പുനപരിശോധനയില്ലെന്ന് സുപ്രീംകോടതി. ഇതോടെ 500 ഫ്ലാറ്റുകള്‍ പൊളിച്ചുമാറ്റേണ്ടി വരും. ഏകദേശം 400 കുടുംബങ്ങള്‍ക്കാണ് മേല്‍ക്കൂര നഷ്‍ടമാകുക.

ജസ്റ്റിസ് അരുണ്‍ മിശ്ര അധ്യക്ഷനായ ബെഞ്ച് ആണ് ഫ്ളാറ്റ് നിര്‍മ്മാണ കമ്പനികള്‍ നല്‍കിയ റിവ്യൂ ഹര്‍ജികള്‍ തള്ളിയത്. മെയ് എട്ടിന് കെട്ടിടങ്ങള്‍ പൊളിച്ചുനീക്കാന്‍ ഇറക്കിയ ആദ്യ ഉത്തരവിന് അവധിക്കാല ബെഞ്ചില്‍ നിന്ന് ആറാഴ്‍ച്ച സാവകാശം വാങ്ങിയതും സുപ്രീംകോടതി വിമര്‍ശിച്ചു. ഫ്ളാറ്റ് ഉടമകളും അഭിഭാഷകരും കോടതിയെ കബളിപ്പിക്കാന്‍ ശ്രമിച്ചെന്നായിരുന്നു പരാമര്‍ശം.

ഹോളിഡേ ഹെറിറ്റേജ്, ഹോളി ഫെയ്ത്ത്, ജെയ്ന്‍ ഹൗസിങ്, കായലോരം അപ്പാര്‍ട്ട്‌മെന്‍റ്‍, ആല്‍ഫാ വെഞ്ചേഴ്‌സ് എന്നീ കെട്ടിടങ്ങള്‍ പൊളിച്ചു മാറ്റാനാണ് ഉത്തരവ്. തീരദേശ പരിപാലന അഥോറിറ്റിയാണ് കെട്ടിടങ്ങള്‍ പൊളിച്ചുനീക്കണം എന്നാവശ്യപ്പെട്ട് കോടതിയെ സമീപിച്ചത്.

മരട് പഞ്ചായത്ത് മുനിസിപ്പാലിറ്റിയാക്കുന്നതിന് മുന്‍പാണ് ഈ കെട്ടിടങ്ങള്‍ക്ക് അനുമതി നല്‍കിയത്. അന്ന് തന്നെ കേരളത്തിലെ തീരദേശ പരിപാലന ചട്ടം ലംഘിച്ചാണ് ഭവനസമുച്ചയങ്ങള്‍ നിര്‍മ്മിച്ചതെന്ന് കോടതി കണ്ടെത്തിയിരുന്നു.

You must be logged in to post a comment Login