മഴക്കാലത്ത് ഭക്ഷണം കേടാകാതെ സൂക്ഷിക്കാനുള്ള പൊടിക്കൈകൾ

ഇടവപ്പാതിയും കർക്കിടകവും തിരിമുറിയാതെ പെയ്യാൻ തുടങ്ങുകയാണ്. ഒപ്പം മഴക്കാലരോഗങ്ങളും പടികടന്നെത്തി. മഴക്കാലത്ത് ഭക്ഷണ കാര്യത്തിൽ പ്രത്യേക ശ്രദ്ധ വേണം. പ്രത്യേകിച്ചും കുടിവെള്ളത്തിൽ. കാരണം ജലജന്യരോഗങ്ങൾ എളുപ്പത്തിൽ ശരീരത്തിലെത്തും. പലപ്പോഴും രോഗം പൊട്ടിപ്പുറപ്പെട്ട് വളരെപ്പെട്ടന്ന് പകരുകയാണ് ചെയ്യുന്നത്.

നല്ല രീതിയിലുള്ള മുൻ കരുതൽ എടുത്താൽ മാത്രമേ ഇതിനെ തടയാനാവൂ. കുട്ടികളും മുതിര്‍ന്നവരും ഒരുപോലെ ശ്രദ്ധിക്കേണ്ട കാലം കൂടിയാണ് മഴക്കാലം. പെട്ടെന്ന് തണുക്കുന്നതിനാലും ഈ‍ർപ്പം പടരുന്നതിനാലും ഭക്ഷണം സൂക്ഷിക്കാൻ ചില വിദ്യകൾ ഉപയോഗിക്കാം. പഴങ്ങളും പച്ചക്കറികളും ധാന്യപ്പൊടിയും മസാലകളുമൊക്കെ ശരിയായ രീതിയില്‍ സൂക്ഷിച്ചു ഉപയോഗിക്കാം

ഒന്നാമത്തെ കാര്യം പച്ചക്കറികളും പഴവര്‍ഗങ്ങളുമൊക്കെ മഴക്കാലത്ത് അളവിൽ കൂടുതൽ വാങ്ങരുത്. കഴുകിത്തുടച്ച പച്ചക്കറികള്‍ ന്യൂസ്‌പേപ്പറില്‍ പൊതിഞ്ഞ് വായുകടക്കാത്ത ബാഗിലാക്കി ഫ്രിഡ്ജില്‍ സൂക്ഷിക്കുക. പൊളിത്തീൻ കവറിലാക്കിയും ഫ്രിഡ്ജിൽ സൂക്ഷിക്കാം. പഴവര്‍ഗങ്ങള്‍ നന്നായി കഴുകിത്തുടച്ച് ഫ്രിഡ്ജില്‍ സൂക്ഷിക്കാം

സൂക്ഷിച്ചുവെച്ച ധാന്യങ്ങള്‍ ആഴ്ചയില്‍ ഒരിക്കലെങ്കിലും വെയില്‍ കൊള്ളിക്കാന്‍ ശ്രമിക്കുക. കാരണം അന്തരീക്ഷത്തിലെ ജലാംശം ധാന്യങ്ങളിലും മസാലപ്പൊടികളിലും കീടങ്ങളെ വളർത്തും. ധാന്യങ്ങൾ ഗ്ലാസ് ജാറുകളിൽ സൂക്ഷിക്കുന്നതാണ് നല്ലത്. ഒരു ചെറിയ കഷണം കര്‍പ്പൂരം ഇട്ടുവെക്കുന്നത് നല്ലതാണ്

വായുകടക്കാത്ത കുപ്പിയിലാക്കുന്നതിനുമുന്‍പ് പാനില്‍ ഇട്ട് ചെറുതായി ചൂടാക്കിയശേഷം പൊടികള്‍ സൂക്ഷിക്കുക. മസാലപ്പൊടി ഒരിക്കലും നനഞ്ഞ സ്പൂണ്‍ ഉപയോഗിച്ച് എടുക്കരുത്. ഇത് പൂപ്പല്‍ ഉണ്ടാകാന്‍ ഇടയാക്കും.

ഉപ്പ്, പഞ്ചസാര എന്നിവ മഴക്കാലത്ത് അലിഞ്ഞുപോകാനുള്ള സാധ്യത കൂടുതലാണ്. ഇത് സൂക്ഷിക്കുന്നതിന് പ്ലാസ്റ്റിക് പാത്രങ്ങള്‍ ഉപയോഗിക്കുന്നതിന് പകരം വായുകടക്കാത്ത ഗ്ലാസ് ജാറുകള്‍ ഉപയോഗിക്കുക

ജലം മലിനമാവാനുള്ള സാധ്യത കൂടിയതിനാല്‍ കുടിക്കാനും കുളിക്കാനും ശുദ്ധജലം തന്നെയെന്ന് ഉറപ്പുവരുത്തണം. മഴക്കാലത്ത് മുക്കുടിയും മോരുകാച്ചിയതും ഉപയോഗിക്കാം. എരിവ് അധികമുള്ള ആഹാരം നല്ലതല്ല.

തലേ ദിവസം രാത്രിയുള്ള ഭക്ഷണം ചൂടാക്കി കഴിക്കുന്നത് മിക്കവരുടെയും ശീലമാണ്. എന്നാൽ അത് രോഗങ്ങൾ ക്ഷണിച്ച് വരുത്തലാണ് ഇളം ചൂടോടു കൂടി ഭക്ഷണം കഴിക്കുക. ഭക്ഷണം തണുത്ത ശേഷം കഴിക്കുന്ന ശീലം പരമാവധി ഒഴിവാക്കുക.

ഭക്ഷണപദാർത്ഥങ്ങൾ അടച്ച് വയ്ക്കുക. ഭക്ഷണം പാകം ചെയ്യുന്ന സ്ഥലവും സൂക്ഷിക്കുന്ന സ്ഥലവും വൃത്തിയുള്ളതായിരിക്കണം

വലിച്ചുവാരി ഭക്ഷണം കഴിക്കാതിരിക്കുക. എളുപ്പം ദഹിക്കുന്ന ഭക്ഷണങ്ങൾ കഴിക്കുക.എണ്ണപലഹാരങ്ങൾ കുറയ്ക്കുക

മഴയത്തും പഴച്ചാറുകൾ നല്ലതാണ്. ഐസ് ഇടരുത്. ഉണ്ടാക്കിയാലുടൻ കുടിക്കണം. ഏറെ നേരം ഫ്രിഡ്ജിലോ പുറത്തോ വെക്കരുത്. തണുപ്പായതിനാൽ ഏതു നേരവും കാപ്പിയും ചായയും ആവാം എന്ന രീതി നന്നല്ല.

ക്യാരറ്റ് തൈര്, പപ്പായ, ചീര, വെളുത്തുള്ളി, ഇഞ്ചി ഇവയൊക്കെ അടങ്ങുന്ന ഭക്ഷണം കഴിക്കുന്നത് രോഗപ്രതിരോധ ശേഷി വര്‍ധിപ്പിക്കാന്‍ സഹായിക്കും. കുട്ടികളും മുതിർന്നവരും ബീറ്റ് റൂട്ട് ജ്യൂസ് കഴിക്കുന്നത് നല്ലതാണ്.

മുറിച്ച തേങ്ങ ചീത്തയാവാതെ ഇരിക്കാന്‍ തേങ്ങയില്‍ അല്‍പം ഉപ്പോ വിനാഗിരിയോ പുരട്ടി വെക്കാവുന്നതാണ്. മുറിച്ച്‌ വെച്ച തേങ്ങ ചിരകിയതിനു ശേഷമുണ്ടെങ്കില്‍ അത് തണുത്ത വെള്ളത്തില്‍ ഇട്ട് വെയ്ക്കാം.

തേങ്ങ ചിരട്ടയോടെ ഉപ്പു വെള്ളത്തില്‍ കമിഴ്ത്തി വെയ്ക്കുന്നത് തേങ്ങ കേടു കൂടാതെ ഇരിക്കുന്നതിന് സഹായിക്കുന്നു. തേങ്ങ പൊട്ടിച്ച്‌ കഴിഞ്ഞാല്‍ ആദ്യം ഉപയോഗിക്കേണ്ടത് കണ്ണുള്ള ഭാഗമാണ്. ഈ ഭാഗമാണ് പെട്ടെന്ന് ചീത്തയാവുന്നത്. അതുകൊണ്ട് ഈ ഭാഗം ഉപയോഗിച്ച്‌ കഴിഞ്ഞതിനു ശേഷം മാത്രം മറ്റേഭാഗം ഉപയോഗിക്കാന്‍ ശ്രമിക്കുക.

ഇലക്കറികൾ 1-2 ദിവസത്തിനകം പാചകം ചെയ്യുന്നതാണ് പുതുമ ഉറപ്പാക്കുന്നതിന് നല്ലത്. എന്നാൽ ചിലപ്പോൾ കുറച്ചു ദിവസങ്ങൾ സൂക്ഷിക്കേണ്ടി വരികയാണെങ്കിൽ ഒരു പേപ്പർ ഒരു പേപ്പർ ടവ്വലിൽ പൊതിഞ്ഞു സൂക്ഷിക്കുന്നതാണ് നല്ലത്. പേപ്പർ ടവൽ കിട്ടിയില്ലെങ്കിൽ, കട്ടിയുള്ള പത്രക്കടലാസിൽ പൊതിഞ്ഞു സൂക്ഷിക്കാം. അധികമുള്ള ഈർപ്പം ടവ്വൽ ആഗിരണം ചെയ്യുകയും അതു വഴി പുതുമ കുറച്ചു ദിവസത്തേക്ക് നിലനിൽക്കുകയും ചെയ്യും

പച്ചമുളക് കേടാകാതെ സൂക്ഷിക്കാൻ ഒരു പാത്രത്തിന്റെ അടിയിൽ ടിഷ്യു പേപ്പർ വിരിച്ചിട്ട് പച്ചമുളക് ഞെട്ടു കളഞ്ഞ് നിരത്തുക. കാറ്റു കേറാതെ അടച്ച് ഫ്രിഡ്ജിൽ സൂക്ഷിക്കാം. വളരെ നാൾ പുതുമയോടെ ഇരിക്കും. വെള്ളമയം ഒട്ടും ഉണ്ടാകരുത്.

ഇറച്ചി വാങ്ങുമ്പോള്‍ ഏറ്റവും ഫ്രഷായത് വാങ്ങുക. അപ്പോള്‍ രുചികൂടും എന്ന് മാത്രമല്ല, കൂടുതല്‍കാലം കാലം ഇരിക്കും. പുതിയ മത്സ്യം നോക്കി വാങ്ങുക. ചില കാര്യങ്ങള്‍ ശ്രദ്ധിച്ചാല്‍ മത്സ്യം പുതിയതാണോ എന്ന് ഉറപ്പിക്കാനാവും. പച്ച മത്സ്യത്തിന്‍റെ കണ്ണിന് നല്ല തിളക്കമുണ്ടായിരിക്കും. തൊട്ടുനോക്കിയാല്‍ ടല്‍ ഉറച്ചിരിക്കും. വാലിന് നല്ല ബലമുണ്ടാവും. ദുര്‍ഗന്ധമുണ്ടാവില്ല

മുട്ട പുതിയത് നോക്കി വാങ്ങുക. വാങ്ങിയ മുട്ടയുടെ പുറം നന്നായി കഴുകാതെ ഉപയോഗിക്കുകയോ ഫ്രിഡ്ജില്‍ സൂക്ഷിക്കുകയോ ചെയ്യരുത്. അത്തരം സാഹചര്യത്തില്‍ ബാക്ടീരിയല്‍ അണുബാധക്ക് സാധ്യതയുണ്ട്

You must be logged in to post a comment Login