മഴയുടെ തീവ്രത കുറയും; സംസ്ഥാനത്ത് ഇതുവരെ മരിച്ചത് 86 പേർ

തിരുവനന്തപുരം: സംസ്ഥാനത്ത് മഴയുടെ തീവ്രത കുറയുമെന്ന് കാലാവസ്ഥാ നിരീക്ഷണ കേന്ദ്രം. ഇന്ന് ആലപ്പുഴ, എറണാകുളം, ഇടുക്കി, മലപ്പുറം, വയനാട് ,കണ്ണൂർ എന്നീ ജില്ലകളിൽ ഓറഞ്ച് അലര്‍ട്ടും പത്തനംതിട്ട, തൃശൂർ, പാലക്കാട്, കോഴിക്കോട്, കാസർഗോഡ് എന്നീ ജില്ലകളിൽ യെല്ലോ അലര്‍ട്ടും പ്രഖ്യാപിച്ചതായി കാലാവസ്ഥാ നിരീക്ഷണം കേന്ദ്രം അറിയിച്ചു. എല്ലാ വിദ്യാഭ്യാസ സ്ഥാപനങ്ങൾക്കും ഇന്ന് അവധി പ്രഖ്യാപിച്ചിട്ടുണ്ട്.

മഴക്കെടുതിയിൽ ഇതുവരെ 86 പേര്‍ മരിച്ചു. ഇന്നലെ മലപ്പുറം ജില്ലയിലെ കവളപ്പാറയിൽ നിന്ന് ആറ് മൃതദേഹങ്ങള്‍ കണ്ടെത്തി. ഇതോടെ കവളപ്പാറയിൽ നിന്ന് കണ്ടെത്തിയ മൃതദേഹങ്ങളുടെ എണ്ണം 19 ആയി. ഇനി പ്രദേശത്തുനിന്ന് 40 പേരെ കൂടി കണ്ടെത്താനുണ്ടെന്നാണ് അധികൃതര്‍ വ്യക്തമാക്കുന്നത്. വയനാട്ടിലെ പുത്തുമലയിലും തെരച്ചിൽ നടപടികള്‍ തുടരുകയാണ്. ഇന്നലെ നടന്ന തെരച്ചിലിൽ ആരെയും കണ്ടെത്താൻ സാധിച്ചിരുന്നില്ല. സംസ്ഥാനത്തെ 1,654 ദുരിതാശ്വാസ ക്യാമ്പുകളിലേക്ക് 83,274 കുടുംബങ്ങളില്‍പ്പെട്ട 2,87,585 പേരെയാണ് മാറ്റിപ്പാര്‍പ്പിച്ചിരിക്കുന്നത്. മഴ കുറഞ്ഞ സാഹചര്യത്തിൽ വിവിധ ജില്ലകളിലെ ക്യാമ്പുകള്‍ പിരിച്ചുവിടുന്നുണ്ട്.

സംസ്ഥാനത്തെ ദുരിതബാധിത പ്രദേശങ്ങള്‍ മുഖ്യമന്ത്രി പിണറായി വിജയൻ ഇന്ന് സന്ദര്‍ശിക്കും. വയനാടും മലപ്പുറം ജില്ലയിലെ പ്രദേശങ്ങളാണ് സന്ദര്‍ശിക്കുക. മന്ത്രി ഇ ചന്ദ്രശേഖരൻ, ഡിജിപി ലോക്നാഥ് ബെഹ്റ തുടങ്ങിയവർ മുഖ്യമന്ത്രിയെ അനുഗമിക്കും. ഇന്നലെ മുഖ്യമന്ത്രി വിവിധ ജില്ലാ കളക്ടര്‍മാരുമായി മഴക്കെടുതിയെ തുടർന്നുള്ള സ്ഥിതിഗതികൾ വിലയിരുത്തിയിരുന്നു.

ആലപ്പുഴ ജില്ലയിലെ കുട്ടനാട് മേഖലകളിൽ മടവീഴ്ച രൂക്ഷമാകുകയാണ്. ഇതേത്തുടർന്ന് വീടുകളിൽ വെള്ളം കയറിയതിനാൽ കൂടുതൽ പേരെ ദുരിതാശ്വാസ ക്യാമ്പുകളിലേക്ക് മാറ്റിപ്പാർപ്പിച്ചു. കിഴക്കൻ വെള്ളത്തിൻ്റെ വരവ് ശക്തമല്ലെങ്കിലും വീടുകളിൽ വെള്ളക്കെട്ട് തുടരുകയാണ്. ആലപ്പുഴ-ചങ്ങനാശേരി റോഡിൽ വെള്ളം കയറിയതിനെ തുടർന്ന് മൂന്നാം ദിവസവും ഗതാഗതം തടസപ്പെട്ടു.

തിരുവനന്തപുരം അരുവിക്കര ഡാമിൻ്റെ ഷട്ടറുകൾ ഇന്ന് ഒൻപത് മണിയോടെ തുറക്കും. 10 മണിക്ക് നെയ്യാർ ഡാമിൻ്റെ ഷട്ടറുകളും തുറക്കുമെന്ന് ജില്ലാ കളക്ടർ അറിയിച്ചു. ജില്ലയിൽ കനത്ത മഴ പെയ്യാൻ സാധ്യതയുണ്ടെന്ന കാലാവസ്ഥാ പ്രവചനം മുൻനിർത്തിയാണ് ഷട്ടറുകൾ തുറക്കാൻ തീരുമാനിച്ചത്. ജലനിരപ്പ് പെട്ടെന്ന് ഉയരുന്ന സാഹചര്യം ഉണ്ടാകില്ലെന്നും ജനങ്ങൾ ആശങ്കപ്പെടേണ്ടെന്നും കളക്ടർ വ്യക്തമാക്കി.

അതേസമയം കേരള തീരത്ത് തെക്ക് പടിഞ്ഞാറൻ ദിശയിൽ നിന്ന് മണിക്കൂറിൽ 45 മുതൽ 55 കിലോമീറ്റർ വരെ വേഗതയിൽ ശക്തമായ കാറ്റ് വീശാൻ സാധ്യതയുണ്ട്. ആയതിനാൽ മത്സ്യത്തൊഴിലാളികൾ കടലിൽ പോകരുതെന്ന് ദുരന്ത നിവാരണ അതോറിറ്റി മുന്നറിയിപ്പ് നൽകി.

കോട്ടയം, കണ്ണൂർ, തൃശൂർ, കോഴിക്കോട്, വയനാട്,എറണാകുളം, ആലപ്പുഴ,മലപ്പുറം, പത്തനംതിട്ട ജില്ലകളിലെ എല്ലാ വിദ്യാഭ്യാസ സ്ഥാപനങ്ങൾക്കും ഇന്ന് കളക്ടര്‍മാര്‍ അവധി പ്രഖ്യാപിച്ചു. കേരള, എംജി സർവകലാശാലകൾ ഇന്ന് നടത്താനിരുന്ന എല്ലാ പരീക്ഷകളും മാറ്റിവെച്ചു. ഇന്നും നാളെയും നടത്താനിരുന്ന പാരാ മെഡിക്കൽ ഡിപ്ലോമ പരീക്ഷകൾ എന്നിവയും കാലിക്കറ്റ് സർവകലാശാല ഓഗസ്റ്റ് 16 വരെ നടത്താനിരുന്ന പരീക്ഷകളും മാറ്റിവെച്ചിട്ടുണ്ട്.

You must be logged in to post a comment Login