“മാറി നിക്ക്”; ഉയർന്ന പോളിങിനെക്കുറിച്ച് ചോദ്യം ചോദ്യച്ച മാധ്യമപ്രവര്‍ത്തകരോട് ക്ഷോഭിച്ച് മുഖ്യമന്ത്രി

 

കൊച്ചി: കേരളത്തിൽ ലോക്സഭാ പോളിങ് അവസാനിച്ച ശേഷം മാധ്യമപ്രവര്‍ത്തകരുടെ ചോദ്യങ്ങള്‍ക്ക് മറുപടി പറയാതെ ക്ഷുഭിതനായി മുഖ്യമന്ത്രി പിണറായി വിജയൻ. കേരളത്തിൽ പോളിങ് ശതമാനം ഉയര്‍ന്നതിനെപ്പറ്റി ചോദിച്ച മാധ്യമപ്രവര്‍ത്തകര്‍ക്ക് മാറി നിക്കങ്ങോട്ട് എന്നായിരുന്നു മുഖ്യമന്ത്രിയുടെ മറുപടി. മറ്റൊന്നും പറയാതെ വാഹനത്തിൽ കയറി പോകുകയും ചെയ്തു.

എറണാകുളം ഗവൺമെന്‍റ് ഗസ്റ്റ് ഹൗസിൽ മുഖ്യമന്ത്രിയെ കാണാനെത്തിയ മാധ്യമപ്രവര്‍ത്തകര്‍ക്കാണ് ദുരനുഭവം ഉണ്ടായത്. ഏറെ നേരം കാത്തുനിന്ന ശേഷമായിരുന്നു മുഖ്യമന്ത്രി പുറത്തെത്തിയത്. കേരളത്തിൽ ലോക്സഭാ തെരഞ്ഞെടുപ്പിൽ റെക്കോഡ് പോളിങ് രേഖപ്പെടുത്തിയതിനെക്കുറിച്ചായിരുന്നു ചോദ്യം. എന്നാൽ “മാറി നിക്കങ്ങോട്ട്” എന്ന ഒറ്റ മറുപടി കൊണ്ട് മുഖ്യൻ മാധ്യമങ്ങളുടെ വായടപ്പിച്ചു. ക്ഷുഭിതനായി കാറിൽ കയറി പോകുകയും ചെയ്തു.

ഇന്നലെ നടന്ന ലോക്സഭാ പോളിങിൽ 77.68 ശതമാനമായിരുന്നു സംസ്ഥാനത്തെ ശരാശരി പോളിങ്. എട്ട് ലോക്സഭാ മണ്ഡലങ്ങളിൽ 80 ശതമാനത്തിലധികം പോളിങ് രേഖപ്പെടുത്തി. ഉയര്‍ന്ന പോളിങ് തങ്ങള്‍ക്ക് അനുകൂലമാകുമെന്ന വാദവുമായി മൂന്ന് മുന്നണികളിലെയും നേതാക്കള്‍ രംഗത്തെത്തിയതിനു പിന്നാലെയായിരുന്നു മുഖ്യമന്ത്രിയോടുള്ള ചോദ്യം.

ഇതിനു മുൻപും മുഖ്യമന്ത്രിയുടെ മാധ്യമപ്രവര്‍ത്തകരോടുള്ള ക്ഷോഭം വാര്‍ത്തകളിൽ ഇടം പിടിച്ചിട്ടുണ്ട്. മുഖ്യമന്ത്രി പിണറായി വിജയന്‍റെ “കടക്കു പുറത്ത്” എന്ന പരാമര്‍ശം വിവാദമായിരുന്നു.

You must be logged in to post a comment Login