മിയോ മുസ്ലീങ്ങള്‍ ക്രിമിനലുകളാണ്; ഹിന്ദു പെണ്‍കുട്ടികളെ കെണയില്‍പ്പെടുത്തുമെന്ന് രാജസ്ഥാന്‍ ബിജെപി എംഎല്‍എ

രാജസ്ഥാന്‍: മേവാത് മേഖലയിലുള്ള മിയോ ഗോത്രവിഭാഗത്തില്‍പ്പെട്ട ഭൂരിഭാഗം മുസ്ലീങ്ങളും കുറ്റവാളികളാണെന്ന് ബിജെപി അല്‍വാര്‍ എംഎല്‍എ ബന്‍വാരി ലാല്‍ സിംഗാള്‍. അവരോട് താന്‍ ഒരിക്കലും വോട്ട് ചോദിക്കില്ലെന്നും ബന്‍വാരിലാല്‍ പറഞ്ഞു.

”മിയോ വിഭാഗത്തില്‍ നിന്നുള്ള മുസ്ലീങ്ങളില്‍ ഭൂരിഭാഗവും ക്രിമിനലുകളാണെന്ന കാര്യത്തില്‍ ഒരു സംശയവുമില്ല. ലൗ ജിഹാദ് ആസൂത്രണം ചെയ്ത് അവര്‍ ഹിന്ദു പെണ്‍കുട്ടികളെ കെണിയിലകപ്പെടുത്തും. ഞാന്‍ ഒരിക്കലും അവരോട് വോട്ട് ചോദിച്ചിട്ടില്ല. ഇനി ഒരിക്കലും ചോദിക്കുകയുമില്ല. അല്ലാത്ത പക്ഷം അവരെ കുറ്റകൃത്യങ്ങളില്‍ നിന്നും നിയമവിരുദ്ധ പ്രവൃത്തികളിലും നിന്നും സംരക്ഷിക്കാന്‍ ഞാന്‍ ധാര്‍മ്മികമായി ബാധ്യതപ്പെട്ടയാളാകുമായിരുന്നു”, സിംഗാള്‍ പറഞ്ഞു.

തന്റെ മണ്ഡലത്തില്‍ നേരിടുന്ന ഏറ്റവും വലിയ പ്രശ്‌നം ”ലൗ ജിഹാദ്” ആണെന്ന് നേരത്തെ സിംഗാള്‍ പറഞ്ഞിരുന്നു. അതിനായി പ്രവര്‍ത്തിക്കുന്നത് മിയോ മുസ്ലീങ്ങളാണെന്നായിരുന്നു അദ്ദേഹത്തിന്റെ ആരോപണം. ആ വിഭാഗവുമായി ഒരു അകലം താന്‍ എപ്പോഴും പാലിക്കാറുണ്ടെന്നും സിംഗാള്‍ വെളിപ്പെടുത്തിയിരുന്നു.

”വിദ്യാഭ്യാസമില്ലാത്ത ഒരു മുസ്ലീം പെണ്‍കുട്ടിക്ക് അറിയാം ഒരു ഹിന്ദുവിനെ സ്‌നേഹിക്കുന്നതും വിവാഹം കഴിക്കുന്നതും തന്റെ സമുദായത്തില്‍ അനുവദനീയമല്ലെന്ന്. എന്നാല്‍ വിദ്യാഭ്യാസവും വിവരം കഴിവുമുള്ള ഹിന്ദു പെണ്‍കുട്ടികള്‍ പിന്നീട് അവിശ്വാസിയാകുകയും മിയോ മുസ്ലീങ്ങളുടെ കൂടെ പോകുകയും ചെയ്യുന്നു. ആ പുരുഷനെ കുറിച്ച് ഒന്നും മനസിലാക്കാതെയാകും ഇത്തരം പെണ്‍കുട്ടികള്‍ പോകുന്നത്”, സിംഗാള്‍ പറഞ്ഞു.

പിന്നീട് മിയോ കുടുംബങ്ങളില്‍ നിന്ന് പുറത്താക്കുന്ന ഹിന്ദു പെണ്‍കുട്ടികള്‍ തന്നെ പോലുള്ള രാഷ്ട്രീയക്കാരുടെ സഹായം തേടിയെത്താറുണ്ടെന്നും അദ്ദേഹം അവകാശപ്പെട്ടു.

”ഞാന്‍ പറഞ്ഞ കാര്യത്തില്‍ ഉറച്ചുനില്‍ക്കുകയാണ്. മിയോ മുസ്ലീങ്ങള്‍ ഹിന്ദു കുടുംബങ്ങളില്‍ സൗഹൃദം സ്ഥാപിക്കുകയും ലൗ ജിഹാദിലൂടെ ഹിന്ദു പെണ്‍കുട്ടികളെ സ്‌നേഹം നടിച്ച് കടത്തിക്കൊണ്ടുപോകുകയും ചെയ്യും. അല്‍വാറിലുള്ള മിയോ മുസ്ലീങ്ങള്‍ മാത്രമാണ് ഇങ്ങനെ ചെയ്യുന്നത്. അല്ലാതെ എല്ലാ മുസ്ലീങ്ങളും ഇങ്ങനെ ചെയ്യുന്നവരാണെന്ന് ഞാന്‍ പറയില്ല. ഒരു ഹിന്ദു എന്ന നിലയില്‍ ഞാന്‍ ഹിന്ദുക്കള്‍ക്ക് വേണ്ടി സംസാരിക്കണ്ടേ?”, സിംഗാള്‍ ചോദിച്ചു.

സിംഗാളിന്റെ വാക്കുകള്‍ തള്ളിക്കളയുന്നതായി മിയോ മുസ്ലീം വിഭാഗം വ്യക്തമാക്കി. ഹിന്ദുത്വ കാര്‍ഡ് ഉപയോഗിച്ച് വോട്ട് നേടാനുള്ള ഒരു തന്ത്രം മാത്രമാണ് ഇത്. കാരണം ഇത്തവണ വോട്ട് ലഭിക്കില്ലെന്ന് സിംഗാളിന് അറിയാം. മിയോ വിഭാഗത്തിനെതിരെ ഉന്നയിച്ച ആരോപണങ്ങള്‍ തെളിയിക്കാന്‍ സിംഗാളിനെ താന്‍ വെല്ലുവിളിക്കുകയാണെന്ന് മിയോ പഞ്ചായത്ത് പ്രസിഡന്റ് ഷെര്‍ മുഹമ്മദ് പറഞ്ഞു.

You must be logged in to post a comment Login