യുപിഎ ഭരണകാലത്തും ഇന്ത്യ പാകിസ്താനില്‍ സര്‍ജിക്കല്‍ ആക്രമണം നടത്തി; 2011 ല്‍ നടത്തിയ ഓപ്പറേഷന്‍ ജിഞ്ചറിന്റെ രേഖകള്‍ പുറത്ത്

cന്യൂഡല്‍ഹി: ഉറി ഭീകരാക്രമണത്തിന് പിന്നാലെ ഇന്ത്യ അതിര്‍ത്തി കടന്ന് പാകിസ്താനില്‍ സര്‍ജിക്കല്‍ ആക്രമണം നടത്തിയെന്ന വെളിപ്പെടുത്തലിനെ തുടര്‍ന്നുണ്ടായ വിവാദങ്ങള്‍ക്കിടെ ആദ്യമായല്ല ഇന്ത്യ പാക് മണ്ണില്‍ സര്‍ജിക്കല്‍ ആക്രമണം നടത്തുന്നതെന്ന് വ്യക്തമാക്കുന്ന ഔദ്യോഗിക രേഖകള്‍ പുറത്ത്. 2011 ല്‍ യുപിഎ ഭരണകാലത്ത് ഓപ്പറേഷന്‍ ജിഞ്ചര്‍ എന്നു പേരിട്ട ഇന്ത്യ നടത്തിയ സര്‍ജിക്കല്‍ സ്‌ട്രൈക്കിന്റെ രേഖകള്‍ വീഡിയോ സഹിതം കൈവശമുണ്ടെന്ന ദേശീയ ദിനപത്രമായ ഹിന്ദുവാണ് റിപ്പോര്‍ട്ട് ചെയ്തിരിക്കുന്നത്.

2011 ല്‍ കുപ്‌വാരയില്‍ സൈനിക പോസ്റ്റിനു നേരെ നടന്ന ആക്രമണത്തിന്റെ തിരിച്ചടിയായായിരുന്നു ഇന്ത്യയുടെ ആദ്യ സര്‍ജിക്കല്‍ ആക്രമണം. ഇരു രാജ്യങ്ങളും നടത്തിയ സര്‍ജിക്കല്‍ സ്‌ട്രൈക്കില്‍ 13 സൈനികരാണ് കൊല്ലപ്പെട്ടത്. ഇതില്‍ രണ്ടു പാകിസ്താന്‍ സൈനികരുടെയും മൂന്ന് ഇന്ത്യന്‍ സൈനികരുടെയും ശിരസുകള്‍ അറുത്തെടുത്ത് ആക്രമണ ശേഷം കൊണ്ടുപോയെന്നാണ് റിപ്പോര്‍ട്ടുകള്‍. റിട്ട. മേജര്‍ ജനറല്‍ എസ്.കെ ചക്രവര്‍ത്തിയുടെ നേതൃത്വത്തിലാണ് ഇന്ത്യ പാകിസ്താനില്‍ സര്‍ജിക്കല്‍ സ്‌ട്രൈക്ക് നടത്തിയത്. അതെസമയം സര്‍ജിക്കല്‍ സ്‌ട്രൈക്കിനെക്കുറിച്ചുളള കൂടുതല്‍ വിവരങ്ങള്‍ ചര്‍ച്ച ചെയ്യുവാന്‍ അദ്ദേഹം താത്പര്യം പ്രകടിപ്പിച്ചില്ലെന്നും ഹിന്ദു വ്യക്തമാക്കുന്നു. സര്‍ജിക്കല്‍ സ്‌ട്രൈക്കിന്റെ ഔദ്യോഗിക രേഖകള്‍, വീഡിയോ, ഫോട്ടോകള്‍ എന്നിവ തങ്ങള്‍ക്ക് ലഭിച്ചതായാണ് ഹിന്ദു അവകാശപ്പെടുന്നത്.

d

2011 ജൂലൈ 30നാണ് കുപ്‌വാരയിലെ ഗുഗാല്‍ദാര്‍ റിഡ്ജിലെ സൈനിക പോസ്റ്റിന് നേരെ പാകിസ്താന്റെ മിന്നല്‍ ആക്രമണം ഉണ്ടാകുന്നത്. സൈനിക പോസ്റ്റിലെ ബറ്റാലിയനുകളുടെ പരസ്പരമുളള മാറ്റത്തിനിടെയാണ് പാകിസ്താനി ബോര്‍ഡര്‍ ആക്ഷന്‍ ടീമിന്റെ അപ്രതീക്ഷിതമായ ആക്രമണം ഉണ്ടാകുന്നത്. ആക്രമണത്തിനുശേഷം ഹവില്‍ദാര്‍ ജയ്പാല്‍ സിങ് അധികാരി, ലാന്‍സ് നായിക് ദേവേന്ദര്‍ സിങ് എന്നിവരുടെ ശിരസ് പാകിസ്താന്‍ സൈന്യം മുറിച്ചെടുക്കുകയും ചെയ്തു. ആക്രമണത്തില്‍ പരുക്കേറ്റ മറ്റൊരു സൈനികനാകട്ടെ ഹോസ്പിറ്റലില്‍ മരണമടയുകയും ചെയ്തു.

ഈ ആക്രമണത്തിനുളള തിരിച്ചടിയായിട്ടാണ് ഇന്ത്യ ഓപ്പറേഷന്‍ ജിഞ്ചര്‍ എന്നുപേരിട്ട സര്‍ജിക്കല്‍ സ്‌ട്രൈക്ക് നടത്തിയത്. പാകിസ്താനില്‍ ജോറിനടുത്തുളള ഹിഫാസത്, ലാഷ്ദത്ത് എന്നിവയുള്‍പ്പെടെയുളള സൈനിക പോസ്റ്റുകള്‍ പതിയിരുന്ന് ആക്രമിക്കാനും പരമാവധി പ്രഹരമേല്‍പ്പിക്കാനും തീരുമാനിച്ചത്. തുടര്‍ന്നാണ് 2011 ആഗസ്റ്റ് 30ന് എല്ലാ മുന്നൊരുക്കങ്ങളോടെയും ഇന്ത്യ പാക് അതിര്‍ത്തി മറികടന്ന് ആക്രമണം നടത്തുന്നത്.

e

കാര്‍ഗില്‍ വിജയത്തിനുശേഷം മറ്റൊരു യുദ്ധവിജയം അനുഭവിച്ച ദിവസമായിരുന്നു അതെന്നാണ് ആ ദിവസത്തെ കുറിച്ച് ഓപ്പറേഷന്‍ ജിഞ്ചറില്‍ പങ്കെടുത്ത ഒരു സൈനികന്‍ വ്യക്തമാക്കിയത്. പാകിസ്താന്‍ ഒട്ടും പ്രതീക്ഷിക്കാത്ത ചെറിയ പെരുന്നാളിന്റെ തലേദിവസമാണ് പകരം വീട്ടാനായി തെരഞ്ഞെടുത്തതെന്നും അദ്ദേഹം പറഞ്ഞു. 25 കമാന്‍ഡര്‍മാര്‍ അടങ്ങുന്ന മൂന്നു സംഘങ്ങളാണ് ആഗസ്റ്റ് 29 പുലര്‍ച്ചെ മൂന്നുമണിക്ക് നിയന്ത്രണ രേഖ മറികടന്ന് ആക്രമണം നടത്തിയത്. ആക്രമണം നടത്തിയശേഷം കൊല്ലപ്പെട്ട പാക് സൈനികരുടെ ശിരസ് മുറിക്കുകയും ആയുധങ്ങളും അവരുടെ ഐഡി കാര്‍ഡുകളും അടക്കമുളളവ ഇന്ത്യന്‍ സൈന്യം കൈവശപ്പെടുത്തുകയും ചെയ്തു. 45 മിനിറ്റ് നീണ്ടു നിന്ന ഓപ്പറേഷനുശേഷം നിയന്ത്രണ രേഖയില്‍ പുലര്‍ച്ചെ ഏഴുമണിക്കാണ് ഇവര്‍ എത്തിച്ചേര്‍ന്നത്. പാക് സൈന്യത്തിലെ വിദഗ്ധ പരിശീലനം നേടിയ എട്ടോളം പേരെ കൊലപ്പെടുത്തിയ ഇന്ത്യന്‍ സേന മൂന്നുപേര്‍ക്ക് ഗുരുതരമായി പരുക്കേല്‍പ്പിച്ചെന്നുമാണ് വിവരങ്ങള്‍. കൂടാതെ ഓപ്പറേഷന്‍ ജിഞ്ചറില്‍ സുബേദാര്‍ പര്‍വേശ്, ഹവില്‍ദാര്‍ അഫ്താബ്, നായിക് ഇമ്രാന്‍ എന്നിങ്ങനെ മൂന്നുപേരുടെ ശിരസുകളാണ് ഇന്ത്യന്‍ സൈന്യം ഛേദിച്ചതെന്നും പിടിച്ചെടുത്ത ആയുധങ്ങളുടെ വിവരങ്ങളും പുറത്തുവന്ന രേഖകളിലുണ്ട്.

ഉറി ആക്രമണത്തെ തുടര്‍ന്നുള്ള ആക്രമണത്തെ ഇന്ത്യന്‍ സൈന്യത്തിന്റെ ആദ്യ സര്‍ജിക്കല്‍ ആക്രമണം എന്നായിരുന്നു വിശേഷിപ്പിച്ചത്. ഇന്ത്യന്‍ സൈന്യം ഇതിനു മുമ്പും സര്‍ജിക്കല്‍ ആക്രമണം നടത്തിയിട്ടുണ്ടെന്നും പക്ഷേ ഇതെല്ലാം വളരെ രഹസ്യമായിരുന്നുവെന്നും അവകാശപ്പെട്ട് കോണ്‍ഗ്രസ് നേതാക്കള്‍ നേരത്തെ രംഗത്തുവന്നിരുന്നു.

You must be logged in to post a comment Login