രാജ്യം സാമ്പത്തിക പ്രതിസന്ധിയിലേക്കെന്ന സൂചനയുമായി രതിൻ റോയ്

 

ന്യൂഡൽഹി: രാജ്യം കടുത്ത സാമ്പത്തിക പ്രതിസന്ധിയിലേക്ക് നീങ്ങുന്നുവെന്നതിന്റെ സൂചനയുമായി മോദിയുടെ സാമ്പത്തിക ഉപദേഷ്ടാവ്. ഇന്ത്യൻ സമ്പദ് വ്യവസ്ഥ ഘടനാപരമായി പ്രതിസന്ധി നേരിടുന്നുവെന്ന് പ്രധാനമന്ത്രിയുടെ ഉപദേശക കൌൺസിൽ അംഗവും നാഷ്ണൽ പബ്ലിക്ക് ഫിനാൻസ് ഡയറക്ടറുമായ രതിൻ റോയ് എൻഡിടിവിക്ക് നൽകിയ അഭിമുഖത്തിൽ പറഞ്ഞു.

കയറ്റുമതിയിലെ ഇടിവും നിക്ഷേപത്തിലെ പ്രശ്നങ്ങളും ഉപഭോഗത്തിലുണ്ടായ കുറവും സമ്പദ് വ്യവസ്ഥയിൽ തകർച്ച ഉണ്ടാക്കി. വരും വർഷങ്ങളിൽ സാമ്പത്തിക പ്രതിസന്ധി വർദ്ധിക്കുമെന്നും രതിൻ റോയ് മുന്നറിയിപ്പ് നൽകി. 1991 മുതൽ ഇന്ത്യ ഘടനാപരമായ തകർച്ച നേരിടുന്നുണ്ടെന്നും അദ്ദേഹം വ്യക്തമാക്കി.

ബ്രസീൽ, ദക്ഷിണാഫ്രിക്ക തുടങ്ങിയ രാജ്യങ്ങൾക്ക് സമാനമാണ് ഇന്ത്യൻ സമ്പദ് വ്യവസ്ഥ. ജനസംഖ്യ അധികവും എന്നാൽ വരുമാനം കുറഞ്ഞതുമായ സമ്പദ് വ്യവസ്ഥയാണ് ഇന്ത്യയുടേത്. പ്രതിശീർഷ വരുമാനം വർദ്ധിപ്പിക്കുകയാണ് സാമ്പത്തിക പ്രതിസന്ധി പരിഹരിക്കുന്നതിനുള്ള ഏക മർഗ്ഗമെന്നും രതിൻ റോയ് പറഞ്ഞു.

അടുത്ത അഞ്ച് വർഷത്തേക്ക് സമ്പദ് വ്യവസ്ഥ 5 മുതൽ 6 ശതമാനംവരെ വളരും എന്നാൽ നിശ്ചിത പോയന്റിലെത്തുമ്പോൾ നിലയ്ക്കും. ഇത് രാജ്യത്തെ കടുത്ത സാമ്പത്തിക പ്രതിസന്ധിയിലേക്കായിരിക്കും നയിക്കുക. രാജ്യത്തെ സാമ്പത്തിക സ്ഥിതിയെക്കുറിച്ച് സർക്കാരിന് മുന്നറിയിപ്പുകൊടുത്തിട്ടുണ്ടെന്നും അദ്ദേഹം പറഞ്ഞു.

You must be logged in to post a comment Login