ലയനം വിനയായി; എസ്‍ബിഐക്ക് 2,416 കോടിരൂപ നഷ്‍ടം

 

 

 

ന്യൂഡല്‍ഹി: ഇന്ത്യയിലെ ഏറ്റവും വലിയ പൊതുമേഖല ബാങ്ക് ആയ സ്റ്റേറ്റ് ബാങ്ക് ഓഫ് ഇന്ത്യ (എസ്‍ബിഐ) 2416 കോടി രൂപയുടെ നഷ്‍ടം. 2017 ഡിസംബറില്‍ അവസാനിച്ച മൂന്നാംപാദ സാമ്പത്തിക ഫലങ്ങളിലാണ് കമ്പനി നഷ്‍ടം രേഖപ്പെടുത്തിയത്. മുന്‍പ് രണ്ടാം പാദഫലത്തില്‍ 1581 കോടിരൂപയുടെ ലാഭം എസ്‍ബി‍ഐ നേടിയിരുന്നു.

കിട്ടാക്കടം പെരുകിയതാണ് നഷ്‍ടത്തിന് പ്രധാനകാരണം. നോണ്‍ പെര്‍ഫോമിങ് അസറ്റ് വിഭാഗത്തില്‍പ്പെടുന്ന ആസ്‍തികളാണ് നഷ്ടത്തിന്‍റെ തോത് കൂട്ടിയത്. 1.99 ലക്ഷം കോടി രൂപയുടെ കിട്ടാക്കടമാണ് ബാങ്കിനുള്ളത്. കഴിഞ്ഞ പാദത്തില്‍ ഇത് 1.86 ലക്ഷംകോടിയായിരുന്നു.

കിട്ടാക്കടത്തിന്‍റെ അനുപാതം 5.61 ശതമാനം വര്‍ധിച്ചിട്ടുണ്ടെന്നും വാര്‍ത്താ ഏജന്‍സികള്‍ റിപ്പോര്‍ട്ട് ചെയ്യുന്നു. കഴിഞ്ഞ നാല് വര്‍ഷങ്ങളിലായി ഇന്ത്യന്‍ പൊതുമേഖല ബാങ്കുകളിലെ കിട്ടാക്കടം ഇരട്ടിയായിട്ടുണ്ട്. രാജ്യത്തെ 21 പൊതുമേഖല ബാങ്കുകള്‍ക്ക് 9.46 ലക്ഷം കോടിരൂപയുടെ വായ്‍പകളാണ് തിരികെ ലഭിക്കാനുള്ളത്.

കഴിഞ്ഞവര്‍ഷം എസ്‍ബിടി ഉള്‍പ്പെടെ അഞ്ച് അസോഷ്യേറ്റ് ബാങ്കുകളെ സ്റ്റേറ്റ് ബാങ്കില്‍ ലയിപ്പിച്ചിരുന്നു. നഷ്‍ടം പെരുകുന്നതിന് ഇതും കാരണമായിട്ടുണ്ട്.

You must be logged in to post a comment Login