വായു ചുഴലിക്കാറ്റ്; ഗുജറാത്തില്‍ നിന്ന് പതിനായിരത്തിലേറെ പേരെ ഒഴിപ്പിച്ചു

 

അറബിക്കടലില്‍ രൂപം കൊണ്ട ‘വായു’ ചുഴലിക്കാറ്റിനെതുടര്‍ന്ന് ഇന്ത്യയുടെ തീരപ്രദേശങ്ങളിൽ കനത്ത ജാഗ്രത. ഗുജറാത്തിലാണ് ഏറെ ശക്തിയിൽ വായു ചുഴലിക്കാറ്റ് ആഞ്ഞടിക്കുന്നത്. കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പിനെത്തുടര്‍ന്ന് ഒഴിപ്പിച്ചത് പതിനായിരത്തിലേറെ പേരെയാണ്. അടിയന്തര സാഹചര്യം കണക്കിലെടുത്താണ് കച്ച്‌ ജില്ലയില്‍ നിന്നു മാത്രമാണ് ഇത്രയധികം പേരെ ഒഴിപ്പിച്ചിരിക്കുന്നത്. 408 ഗ്രാമങ്ങളെ ചുഴലിക്കാറ്റ് ബാധിക്കാനിടയുണ്ട്.

വ്യാഴാഴ്ച രാവിലെയാണ് ചുഴലിക്കാറ്റ് ഗുജറാത്ത് തീരം തൊടുന്നതായി കണക്ക് കൂട്ടുന്നത്. 165 കി.മീറ്ററിലേറെ വേഗതയിലായിരിക്കും വായു ചുഴലിക്കാറ്റ് ആഞ്ഞടിക്കുന്നത്. പോര്‍ബന്തര്‍, വരാവല്‍, മഹുവ, ദിയു എന്നിവിടങ്ങളിലാണ് വായു ചുഴലിക്കാറ്റ് വീശിയടിക്കാന്‍ ഏറെ സാധ്യതയുള്ളതായി കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകിയിരിക്കുന്നത്. 230 അഭയകേന്ദ്രങ്ങൾ ആളുകളെ മാറ്റിപാർപ്പിക്കുന്നതിനായി തുറന്നിട്ടുണ്ട്.

മുന്‍കരുതലായി കര, നാവിക, തീരസംരക്ഷണ സേനകളെ ഗുജറാത്ത് തീരത്ത് വിന്യസിച്ചിരിക്കുകയാണ്. വ്യോമസേനയുടെ സി-17 വിമാനം യമുനാനഗര്‍ മേഖലയില്‍ നിലയുറപ്പിച്ചിരിക്കുകയാണ്. ആകെ 700 സൈനികരെ വിവിധ മേഖലകളിലായി വിന്യസിച്ചിട്ടുണ്ട്. സൈന്യത്തിനു പുറമേ ദുരന്തനിവാരണ സേനയുടെ 20 യൂണിറ്റുകളെയും വിന്യസിച്ചിട്ടുണ്ട്. അടിയന്തര സാഹചര്യം നേരിടാന്‍ വൈദ്യസംഘത്തെയും സജ്ജമാക്കിയിരിക്കുകയാണ്. 60 ലക്ഷം ആളുകളെയെങ്കിലും വായു ചുഴലിക്കാറ്റ് ബാധിക്കാൻ സാധ്യതയുള്ളതായാണ് ഗുജറാത്ത് സര്‍ക്കാര്‍ കണക്കു കൂട്ടുന്നത്.

You must be logged in to post a comment Login