വിന്‍ഡീസ് ടൂറില്‍ ഇന്ത്യയ്‍ക്കൊപ്പം ധോണിയില്ല; രണ്ട് മാസം സൈന്യത്തിനൊപ്പം

 

മുംബൈ: അന്താരാഷ്ട്ര ക്രിക്കറ്റില്‍ നിന്ന് വിരമിക്കുന്നതുമായി ബന്ധപ്പെട്ട ഊഹാപോഹങ്ങള്‍ ശക്തമാകുന്നതിനിടെ വെസ്റ്റ് ഇന്‍ഡീസിനെതിരായ ഇന്ത്യന്‍ ടീമില്‍ നിന്ന് മഹേന്ദ്ര സിങ് ധോണി പിന്‍വാങ്ങി. സ്വമേധയാ ടീമില്‍ പിന്‍വാങ്ങുന്നതായി ധോണി ബിസിസിഐയെ അറിയിക്കുകയായിരുന്നു എന്നാണ് റിപ്പോര്‍ട്ടുകള്‍. രണ്ട് മാസക്കാലം ടെറിട്ടോറിയല്‍ ആര്‍മിയിലെ തന്‍റെ റെജിമെന്‍റിനൊപ്പം ചെലവഴിക്കാനാണ് ധോണിയുടെ തീരുമാനം.

വിന്‍ഡീസിനെതിരായ പരമ്പരയില്‍ താന്‍ കളിക്കുന്നില്ലെന്ന കാര്യം ധോണി ബിസിസിഐ അധികൃതരെ അറിയിച്ചതായാണ് വിവരം. ധോണി ക്രിക്കറ്റില്‍ നിന്ന് വിരമിക്കണമെന്ന ആവശ്യം വിവിധ കോണുകളില്‍ ശ്കതമായി ഉയരുന്നതിനിടെയാണ് ധോണിയുടെ തീരുമാനം. എന്നാല്‍ വിന്‍ഡീസ് ടൂറില്‍ നിന്ന് പിന്‍വാങ്ങിയെന്നത് കൊണ്ട് ധോണി ക്രിക്കറ്റില്‍ നിന്ന് വിരമിക്കുകയാണെന്ന ഊഹാപോഹങ്ങള്‍ക്ക് അര്‍ത്ഥമില്ലെന്ന് ബിസിസിഐയിലെ ചില കേന്ദ്രങ്ങള്‍ വ്യക്തമാക്കുന്നു.

വെസ്റ്റ് ഇന്‍ഡീസ് പര്യടനത്തിനായുള്ള ഇന്ത്യന്‍ ടീമിനെ നാളെയാണ് ബിസിസിഐ പ്രഖ്യാപിക്കുക. ഇതിന് മുന്നോടിയായാണ് എൺഎസ് ധോണി തന്‍റെ കാര്യം ബിസിസിഐയെ അറിയിച്ചിരിക്കുന്നത്. ഈ സാഹചര്യത്തില്‍ ധോണിക്ക് പകരം റിഷഭി് പന്തിനെ വിക്കറ്റ് കീപ്പര്‍ സ്ഥാനം ഏല്‍പ്പിക്കാനാണ് സാധ്യത. ആദ്യപതിനൊന്നില്‍ ഇല്ലെങ്കില്‍ പോലും പന്തിന് ആവശ്യമായ നിര്‍ദ്ദേശങ്ങള്‍ നല്‍കിക്കൊണ്ട് ധോണി ടീമിനൊപ്പം തുടരുമെന്നാണ് ചില കേന്ദ്രങ്ങളില്‍ നിന്ന് ലഭിക്കുന്ന വിവരം. വൃദ്ധിമാന്‍ സാഹയെ ടെസ്റ്റിനുള്ള റിസര്‍വ് കീപ്പറാക്കി നിലനിര്‍ത്തിയേക്കും.

” മൂന്ന് കാര്യങ്ങളില്‍ വ്യക്തത വരുത്താനുണ്ട്. ഒന്ന് എംഎസ് ധോണിയുടെ വിരമിക്കലുമായി ബന്ധപ്പെട്ടതാണ്. നിലവില്‍ വിരമിക്കലുമായി ബന്ധപ്പെട്ട യാതൊരു തീരുമാനവും ധോണിയോ സെലക്ടര്‍മാരോ കൈക്കൊണ്ടിട്ടില്ല. ടെറിട്ടോറിയല്‍ ആര്‍മിയിലെ പാരച്യൂട്ട് റെജിമെന്‍റില്‍ ലഫ്റ്റനന്‍റ് കേണലാണ് അദ്ദേഹം. രണ്ട് മാസക്കാലം തന്‍റെ റെജിമെന്‍റിനൊപ്പം ചെലവഴിക്കാനാണ് ധോണി ആഗ്രഹിക്കുന്നത്. ഇത് നേരത്തേ തന്നെ തീരുമാനിച്ച കാര്യമാണ്. വിന്‍ഡീസ് പര്യടനവുമായി ബന്ധപ്പെട്ട ധോണിയുടെ തീരുമാനം ക്യാപ്റ്റന്‍ വിരാട് കോഹ്ലിയെയും മുഖ്യസെലക്ടറായ എംഎസ്കെ പ്രസാദിനെയും അറിയിച്ചിട്ടുണ്ട്.”- മുതിര്‍ന്ന ബിസിസിഐ ഉദ്യോഗസ്ഥന്‍ അറിയിച്ചു.

ഓഗസ്റ്റ് മൂന്ന് മുതലാണ് ഇന്ത്യയുടെ വെസ്റ്റ് ഇന്‍ഡീസ് പര്യടനം ആരംഭിക്കുന്നത്. ഏകദിന മത്സരങ്ങള്‍ക്കൊപ്പം മൂന്ന് ടി-ട്വന്‍റി മത്സരങ്ങളും രണ്ട് ടെസ്റ്റ് മത്സരങ്ങളും അടങ്ങുന്നതാണ് പര്യടനം. അതേസമയം വെസ്റ്റ് ഇന്‍ഡീസ് പര്യടനത്തിനുള്ള ഇന്ത്യന്‍ ടീമിനെ നാളെയാണ് പ്രഖ്യാപ്പിക്കുക. എംഎസ്കെ പ്രസാദ് അധ്യക്ഷനായുള്ള സെലക്ഷന്‍ കമ്മിറ്റിയാണ് ടീമിനെ പ്രഖ്യാപിക്കുക. ധോണി സ്വമേധയാ ഒഴിവായതോടെ സെലക്ടര്‍മാരെ സംബന്ധിച്ച് വലിയ ആശയക്കുഴപ്പമാണ് അവസാനിച്ചിരിക്കുന്നത്.

You must be logged in to post a comment Login