വിന്‍ഡീസ് പര്യടനത്തില്‍ ഇന്ത്യന്‍ ടീമിനെ വിരാട് കോഹ്‍ലി തന്നെ നയിക്കും

 

മുംബൈ: ലോകകപ്പിന് പിന്നാലെ നടക്കുന്ന വിന്‍ഡീസ് പര്യടനത്തില്‍ ഇന്ത്യന്‍ ടീമിനെ വിരാട് കോഹ്‍ലി തന്നെ നയിക്കും. അന്താരാഷ്ട്ര ക്രിക്കറ്റിലെ ഏറ്റവും മികച്ച ബാറ്റ്സ്മാനായ കോഹ്‍ലി തന്നെ ഏകദിനവും ടി-ട്വന്‍റിയും ടെസ്റ്റ് ക്രിക്കറ്റും അടക്കമുള്ള എല്ലാ ഫോര്‍മാറ്റിലും ഇന്ത്യയെ നയിക്കുകയെന്നാണ് ഏറ്റവും ഒടുവില്‍ പുറത്ത് വരുന്ന റിപ്പോര്‍ട്ടുകള്‍. അടുത്ത മാസമാണ് ഇന്ത്യ വെസ്റ്റ് ഇന്‍ഡീസ് പര്യടനം നടത്തുന്നത്.

ഇന്ത്യൻ ടീമിനെ നയിക്കാൻ രണ്ട് ക്യാപ്റ്റൻമാരെ പരിഗണിച്ചേക്കുമെന്ന് നേരത്തേ റിപ്പോർട്ടുകളുണ്ടായിരുന്നു. ഏകദിന ടീമിനെ രോഹിത് ശർമയും ട്വൻറി20, ടെസ്റ്റ് ടീമുകളെ വിരാട് കോഹ്ലിയും നയിക്കട്ടെയെന്നായിരുന്നു ആലോചനകൾ. എന്നാല്‍ ഇക്കാര്യം സംബന്ധിച്ച് ഔദ്യോഗികമായ ഒരു വിവരവും പുറത്തുവന്നിട്ടില്ല. അതേസമയം ഇത്തരം അസംബന്ധങ്ങള്‍ക്കെല്ലാം ഞായറാഴ്ച വരെ മാത്രമേ ആയുസ്സുണ്ടാവുകയുള്ളൂ എന്ന് ബിസിസിഐയുമായി ബന്ധപ്പെട്ട വൃത്തങ്ങള്‍ വ്യക്തമാക്കി.

വിവിധ ഫോര്‍മാറ്റുകള്‍ കൈകാര്യം ചെയ്യുന്നതിനായി രണ്ട് ക്യ്പാറ്റന്മാരെ നേരത്തേയും ഇന്ത്യന്‍ ടീം പരീക്ഷിച്ചിട്ടുണ്ട്. 2016ല്‍ ടെസ്റ്റ് ടീമിനേയും ഏകദിന ടീമിനേയും നയിച്ചത് രണ്ട് ക്യാപ്റ്റന്മാരാണ്. ഏകദിനത്തില്‍ എംഎസ് ധോണിയും ടെസ്റ്റില്‍ വിരാട് കോഹ്‍ലിയുമായിരുന്നു നായകന്മാര്‍. ഇതിനും മുമ്പ് 2008ല്‍ ധോണിയും അനില്‍ കുംബ്ലെയും ക്യാപ്റ്റന്‍സി പങ്കുവെച്ചിട്ടുണ്ട്. എന്നാല്‍ ഇത്തരത്തില്‍ നായകത്വം പങ്കുവെക്കുന്ന രീതി ഫലം കണ്ടില്ലെന്ന നിഗമനത്തിലാണ് ബിസിസിഐ എത്തിച്ചേര്‍ന്നത്.

ലോകത്തിലെ ഒന്നാം നമ്പർ ബാറ്റ്സ്മാനായ വിരാട് കോഹ്ലി നായകനെന്ന നിലയിൽ വലിയ പരാജയമാണെന്ന് ആർക്കും അഭിപ്രായമില്ല. എന്നാൽ ഇന്ത്യൻ ടീമിൻെറ തുടരെത്തുടരെയുള്ള മത്സരങ്ങളും മറ്റും താരത്തിന് കൂടുതൽ ജോലിഭാരം നൽകുന്നുണ്ട്. കോഹ്ലി തന്നെ ഇത് പലതവണ തുറന്ന് പറഞ്ഞിട്ടുണ്ട്. ഏകദിന ടീമിനെ രോഹിത് നയിക്കാനെത്തുമ്പോൾ കോഹ്ലിയുടെ ബാറ്റിങ് കരിയറിനും അത് കൂടുതൽ ഗുണം ചെയ്യുമെന്ന് അഭിപ്രായപ്പെടുന്നവരുണ്ട്. ലോകകപ്പ് റിവ്യൂ യോഗത്തിന് ശേഷം മാത്രമേ ഇക്കാര്യത്തിൽ ഔദ്യോഗികമായി കൂടുതൽ വിവരങ്ങൾ പുറത്ത് വരികയുള്ളൂ.

You must be logged in to post a comment Login