വിമതരെ കാണാതെ ഡി കെ ശിവകുമാർ ബെംഗളൂരുവിലേയ്ക്ക് മടങ്ങുന്നു

 

ബെംഗളൂരു: ആറു മണിക്കൂറോളം മുംബൈയിലെ ഹോട്ടലിന് മുന്നിൽ കാത്തിരുന്നിട്ടും വിമത എംഎൽഎമാരെ കാണാനുള്ള നീക്കം പരാജയപ്പെട്ട കോൺഗ്രസ് നേതാവ് ഡി കെ ശിവകുമാര്‍ ബെംഗളൂരുവിലേയ്ക്ക് മടങ്ങുന്നു. ഇന്നു രാവിലെ എംഎൽഎമാരെ കാണാനായി മുംബൈ റിനൈസൻസ് ഹോട്ടലിൽ എത്തിയ ശിവകുമാറിനെ പോലീസ് തടയുകയായിരുന്നു.

ഇന്ന് രാവിലെ ഏഴരയോടെയാണ് ഹോട്ടലിന് മുന്നിൽ ഡി കെ ശിവകുമാറിന്‍റെ നേതൃത്വത്തിലുള്ള കോൺഗ്രസ് നേതാക്കള്‍ ഹോട്ടലിന് മുന്നിൽ എത്തിയത്. എന്നാൽ ശിവകുമാറിൽ നിന്നും കര്‍ണാടക മുഖ്യമന്ത്രി എച്ച് ഡി കുമാരസ്വാമിയിൽ നിന്നും തങ്ങള്‍ക്ക് ഭീഷണിയുണ്ടെന്ന് ചൂണ്ടിക്കാട്ടി വിമത എംഎൽഎമാര്‍ ഇന്നലെ മുംബൈ പോലീസ് കമ്മീഷണര്‍ക്ക് പരാതി നല്‍കിയിരുന്നു. ഇതേത്തുടര്‍ന്ന് കോൺഗ്രസ് നേതാക്കളെ പോലീസ് തടയുകയായിരുന്നു.

കനത്ത മഴയെ അവഗണിച്ച് ആറ് മണിക്കൂറോളം ശിവകുമാറും സംഘവും ഹോട്ടലിന് മുന്നിൽ കാത്തുനിന്നെങ്കിലും വിമത എംഎൽഎമാരെ കാണാൻ സാധിച്ചില്ല. ഇവര്‍ക്ക് പിന്തുണയുമായി കൂടുതൽ കോൺഗ്രസ് പ്രവര്‍ത്തകരും പിന്നാലെ ബിജെപി പ്രവര്‍ത്തകരും ഹോട്ടലിന് മുന്നിൽ എത്തിയതോടെ പോലീസ് സ്ഥലത്ത് നിരോധനാജ്ഞ പ്രഖ്യാപിക്കുകയായിരുന്നു. ശിവകുമാര്‍ ഹോട്ടലിൽ മുറി ബുക്ക് ചെയ്തെങ്കിലും മോശം സാഹചര്യം കണക്കിലെടുത്ത് ഹോട്ടൽ അധികൃതര്‍ അദ്ദേഹത്തിന് മുറി നിഷേധിക്കുകയും ചെയ്തു. ഇതേത്തുടര്‍ന്ന് ഹോട്ടലിന് മുന്നിൽ പ്രതിഷേധവുമായി തമ്പടിച്ച പ്രവര്‍ത്തകരെ പോലീസ് അറസ്റ്റ് ചെയ്തു നീക്കുകയായിരുന്നു.

മഹാരാഷ്ട്രയിൽ നിന്നുള്ള കോൺഗ്രസ് നേതാവ് മിലിന്ദ് ദിയോറ അടക്കമുള്ളവരെ പോലീസ് പിന്നീട് വിട്ടയച്ചു. തുടര്‍ന്ന് മുംബൈ പോലീസ് ഡി കെ ശിവകുമാറഇനെ വിമാനത്താവളത്തിൽ എത്തിക്കുകയായിരുന്നു. ശിവകുമാറിനെ ബെംഗളൂരുവിലേയ്ക്ക് തന്നെ തിരിച്ചയയ്ക്കുമെന്നായിരുന്നു പോലീസിന്‍റെ വിശദീകരണം.

അതേസമയം, അനുനയ നീക്കങ്ങള്‍ക്കിടെ കർണാടകയിൽ രണ്ട് എംഎൽഎമാർ കൂടി രാജിവെച്ചു. കെ.സുധാകർ, എം ടി ബി നാഗരാജു എന്നീ എംഎൽഎമാരാണ് കോൺഗ്രസ് – ജെഡിഎസ് സര്‍ക്കാരിന്‍റെ ആധി കൂട്ടി അംഗത്വം രാജിവെച്ചത്. തങ്ങളുടെ രാജി സ്വീകരിക്കുന്നില്ലെന്ന് ചൂണ്ടിക്കാട്ടി വിമത എംഎൽഎമാർ സ്പീക്കർക്കെതിരെ സുപ്രീം കോടതിയിൽ ഹർജി സമർപ്പിച്ചിട്ടുണ്ട്. മൊത്തം 16 എംഎൽഎമാരാണ് കര്‍ണാടകയിൽ രാജിക്കത്ത് നല്‍കിയിരിക്കുന്നത്. കൂടുതൽ എംഎൽഎമാര്‍ രാജി വെച്ചേക്കുമെന്ന സൂചനയുമുണ്ട്.

സർക്കാർ ഉടൻ പിരിച്ചു വിടണമെന്ന് ബിജെപി ഗവർണറോട് ആവശ്യപ്പെട്ടിട്ടുണ്ട്. ബിജെപിക്ക് വിശ്വാസ വോട്ട് തേടേണ്ട ആവശ്യമില്ലെന്നും സർക്കാർ രൂപീകരിക്കാൻ കഴിയുമെന്നും ബിജെപി അധ്യക്ഷൻ ബി. എസ് യെഡ്യൂരപ്പ അവകാശപ്പെട്ടു.

എന്നാൽ രാജിവെച്ച എംഎൽഎമാരെ ഈ മാസം 17 ന് കാണുമെന്നും രാജി അതിന് മുൻപ് രാജി സ്വീകരിക്കില്ലെന്നുമാണ് സ്പീക്കർ രമേശ് കുമാറിന്‍റെ പ്രതികരണം. രാജിക്കത്തുകള്‍ ഒന്നും സ്വീകരിച്ചിട്ടില്ലെന്നും ഒറ്റ രാത്രി കൊണ്ട് ഇക്കാര്യത്തിൽ തീരുമാനമെടുക്കാൻ കഴിയില്ലെന്നുമായിരുന്നു അദ്ദേഹത്തിന്‍റെ പ്രതികരണം.

You must be logged in to post a comment Login