വോഡഫോൺ ഐഡിയ്‌ക്ക് പിന്നാലെ ജിയോയും നിരക്ക് വർധിപ്പിക്കാനൊരുങ്ങുന്നു

അടുത്തമാസം മുതൽ വോഡഫോൺ ഐഡിയ നിരക്ക് വർധന പ്രഖ്യാപിച്ചതിന് പിന്നാലെ ഡാറ്റ ചാർജ് കൂട്ടാനൊരുങ്ങി ഇന്ത്യയിലെ ഏറ്റവും വലിയ മൊബൈൽ സേവന ദാതാക്കളായ റിലയൻസ് ജിയോ. നിലവിലെ സാമ്പത്തിക പ്രതിസന്ധി മറികടക്കാൻ നിരക്ക് വർധനയിലൂടെ സാധിക്കുമെന്നാണ് കമ്പനി വിശ്വസിക്കുന്നത്.

ഉപയോക്‌താക്കളെ വലിയ തോതിൽ ബാധിക്കാത്ത രീതിയിലുള്ള നിരക്ക് വർധനയാകും ഉണ്ടാകുകയെന്ന് റിലയൻസ് ജിയോ വ്യക്തമാക്കി. സർക്കാരും ട്രായിയും ആവശ്യപ്പെടുന്ന രീതിയിൽ മാത്രമേ നിരക്ക് വർധന ഉണ്ടാകുകയുള്ളൂവെന്നും അധികൃതർ പറഞ്ഞു. അതേസമയം, നിരക്കുവർധന എന്ന് മുതലെന്ന് വ്യക്തമാക്കിയിട്ടില്ല.

കോൾ, ഡാറ്റ നിരക്കുകൾ ഉയർത്താനാണ് റിലയൻസ് ജിയോ ആലോചന നടത്തുന്നത്. ഇതിലൂടെ സാമ്പത്തിക പ്രതിസന്ധി മറികടക്കാൻ കഴിയുമെന്ന വിശ്വാസത്തിലാണ് കമ്പനി. വരുമാനത്തിൽ കനത്ത നഷ്‌ടം സംഭവിച്ചതോടെയാണ് നിരക്ക് വർധന സംബന്ധിച്ച ചർച്ചകൾ ടെലികോം മേഖലയിൽ ആരംഭിച്ചത്.

അടുത്തമാസം മുതൽ നിരക്കിൽ വർധനയുണ്ടാകുമെന്നാണ് വോഡഫോൺ ഐഡിയ ലിമിറ്റഡ് (വിഐഎൽ ) വ്യക്തമാക്കിയത്. ടെലികോം മേഖലയിൽ സാമ്പത്തിക പ്രതിസന്ധിയുണ്ടെന്നും നിലവിലെ സാഹചര്യം മാറ്റാനുള്ള ശ്രമങ്ങൾ നടക്കുകയാണെന്നും കമ്പനി അധികൃതർ കഴിഞ്ഞ ദിവസം പറഞ്ഞിരുന്നു.

You must be logged in to post a comment Login