ശ്രീലങ്കയിൽ ഏറ്റുമുട്ടൽ; 15 പേര്‍ കൊല്ലപ്പെട്ടു

 

കൊളംബോ: ശ്രീലങ്കയിൽ സുരക്ഷാ സേന നടത്തിയ റെയ്‍ഡിൽ ഏറ്റുമുട്ടൽ. സംഭവത്തിൽ കുട്ടികള്‍ ഉള്‍പ്പെടെ 15 പേര്‍ കൊല്ലപ്പെട്ടു. ഇന്നലെ വൈകുന്നേരം അംമ്പാര ജില്ലയിലെ സെയിന്തമരുതിലായിരുന്നു സംഭവം.

സ്ഫോടക വസ്‍തുക്കളുണ്ടെന്ന വിവരത്തെ തുടര്‍ന്നാണ് സൈന്യവും പോലീസും സംയുക്തമായി തെരച്ചിൽ നടത്തിയത്. ഇതിനിടെയാണ് ഒരു കൂട്ടം ആളുകള്‍ സുരക്ഷാ സേനയ്ക്കു നേരെ നിറയൊഴിച്ചത്. മൂന്ന് ചാവേറുകൾ പൊട്ടിത്തെറിച്ചു. ശ്രീലങ്കൻ ഭീകരസംഘടനയായ നാഷണൽ തൗഹീദ് ജമാഅത്ത് തന്നെയാണ് അക്രമണത്തിന് പിന്നിലെന്നും സുരക്ഷ വൃത്തങ്ങള്‍ പറഞ്ഞു.

സംഭവ സ്ഥലത്തു നിന്ന് ബോംബ് നിര്‍മ്മിക്കുന്ന വസ്തുക്കൾ, നിരവധി ജലാറ്റിൻ സ്റ്റിക്കുകള്‍ , മെറ്റൽ ബോളുകള്‍ തുടങ്ങിയവ കണ്ടെത്തിയിട്ടുണ്ട്. ഏറ്റുമുട്ടലിനൊടുവിൽ മൂന്ന് പേരെ അറസ്റ്റ് ചെയ്തിട്ടുണ്ട്. ഇസ്ലാമിക് സ്റ്റേറ്റുമായി ബന്ധമുണ്ടെന്ന സംശയിക്കുന്ന 140 പേരെ പോലീസ് നിരീക്ഷിക്കുകയാണ്.

അതേസമയം ശ്രീലങ്കയിലെ സ്ഫോടന പരമ്പരകളിൽ 76 പേര്‍ അറസ്റ്റിലായി. സിറിയ, ഈജിപ്ത് എന്നി രാജ്യങ്ങളിൽ നിന്നുള്ള വിദേശികളും ഇതിൽ ഉള്‍പ്പെടുന്നു. ഭീകരാക്രമണത്തെ തുടര്‍ന്ന് പ്രഖ്യാപിച്ച കര്‍ഫ്യൂ നീട്ടി. ഐഎസ് പതാകകള്‍ കണ്ടെത്തിയതിനെ തുടര്‍ന്നാണ് കര്‍ഫ്യൂ നീട്ടാൻ സര്‍ക്കാര്‍ തീരുമാനിച്ചത്.

ആക്രമണത്തിന് നേതൃത്വം നല്‍കിയ മുഖ്യസൂത്രധാരന്‍ സഹ്റാന്‍ ഹാഷിമും കൊല്ലപ്പെട്ടതായി ലങ്കന്‍ പ്രസിഡന്‍റ് മൈത്രിപാല സിരിസേനെ സ്ഥിരീകരിച്ചിരുന്നു. ഈസ്റ്റര്‍ ദിനത്തില്‍ കൊളംബോയിലെ ഹോട്ടലിലുണ്ടായ സ്ഫോടനത്തില്‍ ഇയാള്‍ കൊലപ്പെട്ടെന്നാണ് മിലിട്ടറി ഇന്‍റലിജന്‍സിന്‍റെ കണ്ടെത്തല്‍.

ഏറ്റവും ഒടുവില്‍ ലഭിക്കുന്ന വിവരം അനുസരിച്ച് 359 പേരാണ് ഏട്ടിടങ്ങളിലായി ഈസ്റ്റര്‍ ദിനത്തില്‍ നടന്ന സ്ഫോടനങ്ങളില്‍ കൊല്ലപ്പെട്ടത്. മൂന്ന് ക്രിസ്ത്യന്‍ പള്ളികളിലും മൂന്ന് ആഢംബര ഹോട്ടലുകളിലുമായിരുന്നു ചാവേര്‍ സ്ഫോടനം നടന്നത്.

You must be logged in to post a comment Login