ഹാമ്മർ ത്രോ മത്സരത്തിനിടെ കുട്ടി മരിച്ച സംഭവം: 4 പേരുടെ അറസ്റ്റ്

 

കോട്ടയം: പാലായിൽ കായികമത്സരത്തിനിടെ ഹാമ്മര്‍ ത്രോ മത്സരത്തിനുപയോഗിക്കുന്ന ഹാമ്മര്‍ തലയിലിച്ച സംഭവത്തിൽ പ്രതികളായവരുടെ അറസ്റ്റ് ഉടൻ. മരിച്ച അഫീലിന്‍റെ മാതാപിതാക്കള്‍ ജുഡീഷ്യൽ അന്വേഷണം ആവശ്യപ്പെട്ട് മുഖ്യമന്ത്രിയ്ക്ക് പരാതി നല്‍കിയതിന് പിന്നാലെയാണ് കേസിൽ നടപടിയ്ക്ക് വഴിയൊരുങ്ങുന്നത്. പോലീസ് അന്വേഷണം ഇഴഞ്ഞു നീങ്ങുന്നുവെന്ന് ആരോപിച്ചായിരുന്നു മുഖ്യമന്ത്രിയ്ക്ക് പരാതി നല്‍കിയത്.

ജാവലിൻ ത്രോ, ഹാമ്മര്‍ ത്രോ മത്സരങ്ങളുടെ ചുമതലക്കാരും റഫറിമാരും ഉള്‍പ്പെടെ നാലുപേരാണ് പ്രതിപ്പട്ടികയിലുള്ളത്. കോഴിക്കോട് മലപ്പുറം സ്വദേശികളായ ജോസഫ്, നാരായണൻ കുട്ടി, കാസിം, മാര്‍ട്ടിൻ എന്നിവരെയാണ് അന്വേഷണസംഘം അറസ്റ്റ് ചെയ്യുക. ചോദ്യം ചെയ്യലിനായി പാലായിലേയ്ക്ക് വിളിച്ചു വരുത്തുന്ന ഇവരെ അറസ്റ്റ് ചെയ്യുമെന്നാണ് വിവരം. ചോദ്യം ചെയ്യലിന് ഹാജരാകാനായി ഇവര്‍ക്ക് നോട്ടീസ് നല്‍കും.

മനഃപൂര്‍വ്വമല്ലാത്ത നരഹത്യയ്ക്കാണ് ഇവര്‍ക്കെതിരെ കേസെടുത്തിരിക്കുന്നത്. ഹാമ്മര്‍ ത്രോ, ജാവലിൻ ത്രോ മത്സരങ്ങള്‍ അശാസ്ത്രീയമായ രീതിയിൽ ഒരേ സ്ഥലത്ത് സംഘടിപ്പിച്ചതാണ് അപകടത്തിന് ഇടയാക്കിയതെന്നാണ് കണ്ടെത്തൽ. അറസ്റ്റ് ചെയ്യുന്ന പ്രതികള്‍ക്ക് അന്നു തന്നെ ജാമ്യം ലഭിച്ചേക്കും. ഇതിനാൽ അറസ്റ്റ് ചെയ്യുന്ന ദിവസം തന്നെ ഇവരെ മജിസ്ട്രേറ്റിന് മുന്നിൽ ഹാജരാക്കുമെന്നാണ് വിവരം. ഇവിടെ നിന്ന് പ്രതികള്‍ക്ക് ജാമ്യമെടുക്കാം.

You must be logged in to post a comment Login