3 വയസുകാരന് പരിക്കേറ്റ സംഭവം: അച്ഛനും അമ്മയ്ക്കുമെതിരെ വധശ്രമത്തിന് കേസ്

 

കൊച്ചി: ആലുവയിൽ പശ്ചിമ ബംഗാള്‍ സ്വദേശിയായ മൂന്ന് വയസുകാരന് ഗുരുതരമായി പരിക്കേറ്റ സംഭവത്തില്‍ അച്ഛനും അമ്മയ്ക്കും എതിരെ വധശ്രമത്തിന് കേസെടുത്തു. ജുവനൈൽ ജസ്റ്റിസ് ആക്ട് പ്രകാരമുള്ള വകുപ്പുകളും ചുമത്തിയാണ് പോലീസ് കേസെടുത്തിരിക്കുന്നത്. ശരീരത്തിലെ മറ്റ് മുറിവുകൾ മര്‍ദനത്തെ തുടർന്ന് സംഭവിച്ചതാണെന്ന പ്രാഥമിക നിഗമനത്തെ തുടര്‍ന്ന് കുട്ടിയുടെ മാതാപിതാക്കളെ കസ്റ്റഡിയിലെടുത്തിട്ടുണ്ട്. ഇന്നലെ വൈകീട്ടോടെയാണ് കുട്ടിയെ ഗുരുതര പരിക്കേറ്റ നിലയില്‍ ആശുപത്രിയില്‍ പ്രവേശിപ്പിച്ചത്.

അതേസമയം തലക്ക് ഗുരുതരമായി പരിക്കേറ്റ കുട്ടിയുടെ ശസ്ത്രക്രിയ പൂർത്തിയായതായി ഡോക്ടര്‍മാര്‍ അറിയിച്ചു. കുട്ടിയുടെ ആരോഗ്യനിലയില്‍ നേരിയ പുരോഗതി ഉള്ളതായാണ് ഡോക്ടർമാർ വ്യക്തമാക്കുന്നത്. അതേസമയം ആന്തരിക രക്തസ്രാവം നിയന്ത്രണവിധേയമായിട്ടില്ല. ഗുരുതര പരിക്കുകളോടെയാണ് ഇന്നലെ കുട്ടിയെ ആശുപത്രിയിൽ പ്രവേശിപ്പിച്ചത്. തൊടുപുഴയിൽ ഏഴു വയസുകാരൻ ക്രൂര പീഡനമേറ്റ് മരിച്ച സംഭവത്തിന് പിന്നാലെയാണ് സമാന സംഭവം കൊച്ചിയിൽ നടന്നത്.

കുട്ടിയുടെ ജീവൻ ഇപ്പോൾ വെന്റിലേറ്റർ സഹായത്തോടെയാണ് നിലനിർത്തുന്നത്. എറണാകുളത്താണ് കുട്ടി മാതാപിതാക്കളോടൊപ്പം താമസിക്കുന്നത്. കുട്ടിയുടെ തലക്കാണ് ഗുരുതര പരിക്കേറ്റിരിക്കുന്നത്. വീടിന്റെ ടെറസിൽ നിന്ന് താഴെ വീണാണ് പരിക്കേറ്റതെന്ന് മാതാപിതാക്കൾ ആശുപത്രി അധികൃതരെ അറിയിച്ചു. എന്നാൽ, കുട്ടിയുടെ ശരീരത്തിൽ ക്രൂര പീഡനമേറ്റതിന്റെ പാടുകൾ വ്യക്തമായി കാണാം. കുട്ടിയുടെ ശരീരം മരുന്നുകളോട് പ്രതികരിക്കുന്നില്ലെന്നും ഡോക്ടർമാർ വ്യക്തമാക്കി.

കുട്ടിയെ കോട്ടയം മെഡിക്കൽ കോളജിലേക്ക് മാറ്റണമെന്ന് പിതാവ് വാശി പിടിച്ചിരുന്നു. എന്നാൽ, കുട്ടിയെ മറ്റൊരു ആശുപത്രിയിലേക്ക് മാറ്റാൻ കഴിയുന്ന അവസ്ഥയിലല്ലെന്ന് ഡോക്ടർമാർ മാതാപിതാക്കളെ ബോധിപ്പിച്ചു. കുട്ടിയുടെ പൃഷ്ഠ ഭാഗത്ത് പൊള്ളലേറ്റതായി കണ്ടെത്തി. കാലുകളിൽ മുറിവേറ്റ പാടുകളും കണ്ടെത്തിയതോടെ ആശുപത്രി അധികൃതർ ചൈൽഡ് ലൈൻ വഴി പോലീസിൽ വിവരമറിയിക്കുകയായിരുന്നു.

You must be logged in to post a comment Login