Samsung Galaxy M30s ഇന്ത്യയിലെത്താൻ ഇനി ഒരു ദിവസം മാത്രം

കൊറിയൻ ടെക്നോളജി ഭീമന്മാരായ സാംസങ് തങ്ങളുടെ ഗാലക്സി എം30 സീരിസിലെ അപ്ഡേറ്റ് ചെയ്ത മോഡലുകൾ നാളെ പുറത്തിറക്കാൻ തയ്യാറെടുക്കുകയാണ്. ഇ-കോമേഴ്‌സ് കമ്പനിയായ ആമസോൺ ഇന്ത്യയാണ് വലിയ ബാറ്ററിയും പുതിയ ക്യാമറ സംവിധാനവുമുള്ള എം30 വിപണിയിലെത്തിക്കുന്ന തീയതി പുറത്തുവിട്ടത്.

ആമസോൺ ഇന്ത്യ വെബ്സൈറ്റിലെ വിവരങ്ങളനുസരിച്ച് സാംസങ് ഗാലക്സി എം30s സെപ്റ്റംബർ 18നു ഇന്ത്യയിലെത്തും. സ്മാർട്ഫോൺ സ്വന്തമാക്കാൻ ആഗ്രഹിക്കുന്നവർക്ക് ഏറ്റവുമാദ്യം അലെർട്ടുകൾ ലഭിക്കാൻ ആമസോൺ സൈറ്റിലെ “നോട്ടിഫൈ മി” ഓപ്ഷൻ ഉപയോഗപ്പെടുത്താവുന്നതാണ്.

6000mAh ബാറ്ററിയും സൂപ്പർ അമോൾഡ് ഡിസ്‌പ്ലേയുമാണ് ഗാലക്സി എം30s ന്റെ പ്രധാന ആകർഷണങ്ങൾ. ഒക്റ്റാ-കോർ എക്സൈനോസ് 9 സീരീസ് പ്രോസസറാണ് ഫോണിന് ശക്തിയേകുന്നത്. ഗാലക്സി എം30s എക്സൈനോസ് 9610 പ്രവർത്തിപ്പിക്കാനും സാധ്യതയുണ്ടെന്നാണ് വിവരം. ഫാസ്റ്റ് ചാർജിങ് സംവിധാനമുള്ള ഫോണിന് ഇരുപത്തിനായിരത്തിൽ താഴെ വിലയാണ് പ്രതീക്ഷിക്കപ്പെടുന്നത്.

മൂന്ന് റിയർ ക്യാമറ സെറ്റപ്പോടെയാണ് ഗാലക്സി എം30s വരുന്നത്. 48MP പ്രൈമറി സെൻസറും 8MP, 5MP സെക്കൻഡറി സെൻസറുമുള്ള ട്രിപ്പിൾ ലെൻസ് ക്യാമറയാണ് ഫോണിനുണ്ടാവുക എന്നൊരു ശ്രുതിയുണ്ട്. 6.4-ഇഞ്ചുള്ള ഫുൾ HD+ സൂപ്പർ അമോൾഡ് ഇൻഫിനിറ്റി യു ഡിസ്‌പ്ലേയോ അല്ലെങ്കിൽ സെൽഫികൾക്കായി 13 എംപി ഫ്രന്റ് ക്യാമറയുള്ള യു-കട്ടിലുള്ള പഞ്ച് ഹോൾ സ്‌ക്രീനോ ആയിരിക്കും എം30s സ്മാർട്ഫോണിനുണ്ടാവുക.

രണ്ട് റാം, സ്റ്റോറേജ് ഓപ്ഷനുകളിലാണ് ഫോൺ അവതരിപ്പിക്കാൻ സാധ്യത. 4GB റാമും 64GB സ്റ്റോറേജും അല്ലെങ്കിൽ 6GB റാമും 128GB സ്റ്റോറേജും ആയിരിക്കും കോമ്പിനേഷനുകൾ. രണ്ട് വാരിയന്റ്‌സുകളും മൈക്രോ എസ്ഡി കാർഡ് സപ്പോർട്ട് ചെയ്യും. ഈയടുത്ത കാലത്ത് പുറത്തിറങ്ങിയ മറ്റു സാംസങ് മോഡലുകളെ പോലെ സാംസങ് ഗാലക്സി എം30sയും ആൻഡ്രോയിഡ് 9.0 പൈ OS ബേസ് ചെയ്തുള്ള OneUI റൺ ചെയ്യും.

6000 mAh ബാറ്ററി ഗാലക്സി എം30s ഫോണിനെ ഡ്രൈയാവാതെ നോക്കും 18W ഫാസ്റ്റ് ചാർജിങ് സപ്പോർട്ടുമുണ്ട്. മുൻപിറങ്ങിയ ഗാലക്സി എം30യിൽ 5000 mAh ബാറ്ററിയും 15W ഫാസ്റ്റ് ചാർജിങ് സപ്പോർട്ടുമാണുണ്ടായിരുന്നത്.

ഈ വർഷം ജനുവരിയിലാണ് ഗാലക്സി എം10, ഗാലക്സി എം20 എന്നീ മോഡലുകളുമായി സാംസങ് ഗാലക്സി എം സീരീസ് അവതരിപ്പിച്ചത്. പിന്നീട് ഫെബ്രുവരിയിൽ ഈ മോഡലുകളുടെ പിൻഗാമിയായ ഗാലക്സി എം30 യെയും വിപണിയിലെത്തിച്ചു. ഗാലക്സി എം10ന്റെ വില 7,990 യും ഗാലക്സി എം20ന്റെ വില 9,990 രൂപയുമാണ്.

സാംസങിന്റെ ഇന്ത്യയിലെ കമ്പനി വെബ്സൈറ്റിൽ മടക്കുകയും നിവർത്തുകയും ചെയ്യാൻ കഴിയുന്ന സ്മാർട്ഫോണായ ഗാലക്സി ഫോൾഡും ലിസ്റ്റ് ചെയ്തിട്ടുണ്ട്. ഉടൻ തന്നെ ഇന്ത്യൻ വിപണിയിൽ ഫോൺ എത്തും എന്നതിനുള്ള സൂചനയാണിത്. അതേസമയം, സാംസങ് ഇതുവരെ മോഡലിന്റെ ഇന്ത്യയിലെ വില പുറത്തുവിട്ടിട്ടില്ല.

ഈ വർഷം ഫെബ്രുവരിയിലാണ് 4.6 ഇഞ്ചിന്റേയും 7.3 ഇഞ്ചിന്റേയും സ്‌ക്രീനുകളുമായി സാംസങ്ങ് തങ്ങളുടെ ആദ്യ ഫോള്‍ഡബിള്‍ സ്‌ക്രീന്‍ സ്മാര്‍ട്ഫോണ്‍ ആയ ഗ്യാലക്സി ഫോള്‍ഡ് അവതരിപ്പിച്ചത്. ഗ്യാലക്‌സി സീരിസിന്റെ പത്താം വാര്‍ഷികത്തില്‍ സാന്‍ ഫ്രാന്‍സിസ്‌കോയിലെ ബില്‍ ഗ്രഹാം ഓഡിറ്റോറിയത്തില്‍ നടന്ന ചടങ്ങിലായിരുന്നു പുതിയ ഫോണിനെ പരിചയപ്പെടുത്തിയത്. ഏപ്രിലിൽ ഫോൺ ഉപയോക്താക്കളുടെ കയ്യിലെത്തിക്കുമെന്ന് സാംസങ് പറഞ്ഞെങ്കിലും ഡിസ്‌പ്ലേയിലും ഹിഞ്ജിലും ചില കുറവുകൾ റിവ്യൂവേഴ്സ് ചൂണ്ടിക്കാണിച്ചതിന് ശേഷം കമ്പനി ഈ യൂണിറ്റുകൾ തിരിച്ചു വിളിക്കുകയായിരുന്നു. ഇൻ ഹൌസ് ട്രീറ്റ്മെന്റിന് ശേഷം പുതിയ ഫോള്‍ഡ് ഫോണുകള്‍ എന്ന് റിലീസ് ചെയ്യുമെന്ന് സാംസങ് ഇതുവരെ പുറത്തുവിട്ടിട്ടില്ല. എന്നാല്‍ അവസാന ടെസ്റ്റുകളും കഴിഞ്ഞെന്നും റീ ലോഞ്ച് ഉടന്‍ ഉണ്ടാവുമെന്നും റിപ്പോർട്ടുകളുണ്ട്.

അമേരിക്കന്‍ വിപണിയില്‍ 1,980 ഡോളര്‍ വില വരുന്ന ഫോണിന് ആറ് ക്യാമറകളാണുള്ളത്. മൂന്ന് കാമറകൾ പുറകുവശത്തും രണ്ടെണ്ണം ഉൾവശത്തും ഒന്ന് ഏറ്റവും മുകളിലുമാണ്. 128 ജിബി റാം, 7എന്‍എം ഒക്ടാകോര്‍ പ്രൊസസര്‍, 512 ജിബി സ്റ്റേറേജ്, 4380 എംഎഎച്ച് ബാറ്ററി എന്നിവയാണ് ഫോര്‍ഡബിള്‍ ഫോണിന്റെ സവിശേഷതകള്‍.

You must be logged in to post a comment Login