KERALALATEST

അക്രമ രാഷ്ട്രീയത്തിനെതിരെ കെ കെ രമയുടെ മധുര പ്രതികാരം

കണ്ണൂര്‍: കേരളത്തിലെ അക്രമ രാഷ്ട്രീയത്തിനെതിരെ കെ.കെ.രമ നിയമസഭയിലേക്ക്. വടകരയില്‍നിന്ന് എല്‍ഡിഎഫ് സ്ഥാനാര്‍ഥി മനയത്ത് ചന്ദ്രനെ പരാജയപ്പെടുത്തിയാണ് രമ ആര്‍എംപി എംഎല്‍എ ആയി നിയമസഭയിലേക്ക് എത്തുന്നത്. കഴിഞ്ഞ തിരഞ്ഞെടുപ്പില്‍ എല്‍ഡിഎഫ് സ്ഥാനാര്‍ഥി സി.കെ.നാണു 9511 വോട്ട് ഭൂരിപക്ഷം നേടിയിരുന്നെങ്കില്‍ ഇത്തവണ രമയുടെ ഭൂരിപക്ഷം 7014 ആണ്. അങ്ങനെ 2008 ല്‍ ഒഞ്ചിയത്തെ സിപിഎം വിമതര്‍ ചേര്‍ന്നു രൂപീകരിച്ച ആര്‍എംപിക്കു ചരിത്രത്തില്‍ ആദ്യമായി എംഎല്‍എയെ ലഭിച്ചിരിക്കുകയാണ്.
രാഷ്ട്രീയമായും ആര്‍ എം പി എന്ന രാഷ്ട്രീയ പാര്‍ട്ടിയുടെ രൂപീകരണവും അത് രാഷ്ട്രീയ കേരളത്തില്‍ എത്രത്തോളം സ്വാധീനം ചെലുത്തിയെന്നതിനുമുള്ള തെളിവാണ് ഇത്തവണത്തെ നിയമസഭാ തിരഞ്ഞെടുപ്പ് ഫലം. രക്തസാക്ഷികളുടെ ചരിത്രം പറയുന്ന ഒഞ്ചിയത്തിന്റെ മണ്ണില്‍ ടി.പി ചന്ദ്രശേഖരന്‍ എന്ന സി.പി.എം പ്രവര്‍ത്തകന്‍ 51 വെട്ടുകളേറ്റു പിടഞ്ഞു വീണിട്ട് ഒമ്പത് വര്‍ഷം പിന്നിടാന്‍ രണ്ടു ദിവസം മാത്രം ബാക്കി നില്‍ക്കെയാണ് വടകരയുടെ മണ്ണില്‍ ടിപിയുടെ പത്‌നി കെ കെ രമ ചരിത്രം കുറിക്കുന്നത്.
ടി.പി ചന്ദ്രശേഖരന്റെ ഭാര്യ കെ.കെ രമയുടെ ഇത്തവണത്തെ നിയമസഭാ മത്സരം ഇടതുപക്ഷത്തേയും പ്രത്യേകിച്ച് സി.പി.എമ്മിനേയും സംബന്ധിച്ച് നിര്‍ണായകമാണ്. വടകര മണ്ഡലം രൂപീകരിച്ചത് മുതല്‍ ഇടതിനൊപ്പം ചേര്‍ന്ന് നിന്ന മണ്ഡലത്തിലാണ് ഇത്തവണ കെ.കെ രമ യു.ഡി.എഫ് പിന്തുണയോടെ വടകരയില്‍ മത്സരിച്ചത്. കഴിഞ്ഞ തവണ ഒറ്റയ്ക്ക് മത്സരിച്ച് നേടിയ 20504 വോട്ടിന്റെ ആത്മവിശ്വാസം തന്നെയാണ് അതിനുപിന്നില്‍. യു.ഡി.എഫില്‍ നിന്നും എല്‍ഡിഎഫിലെത്തിയ എല്‍.ജെ.ഡിയിലെ മനയത്ത് ചന്ദ്രനാണ് ഇടത് സ്ഥാനാര്‍ഥിയായി കെ.കെ രമയ്‌ക്കെതിരേ മത്സരിച്ചത്.
ഫലം വരുമ്പോള്‍ അത് വടകരയില്‍ ടി.പി ചന്ദ്രശേഖരന്റെ കൊലപാതകികള്‍ക്കുള്ള പകരം വീട്ടലായിരിക്കുമെന്ന് കെ കെ രമ നേരെത്തെ തന്നെ പറഞ്ഞിരുന്നു. മെയ് നാലിനാണ് ടി.പിയുടെ ഒമ്പതാം ചരമവാര്‍ഷികം. ഈ ദിനം ടിപിക്കുള്ളതാണെന്ന് കാണിച്ചുകൊടുക്കുകയാണ് കെകെ രമ.
മണ്ഡലം പിറവിയെടുത്തത് മുതല്‍ സോഷ്യലിസ്റ്റുകളെ മാത്രം നിയമസഭയിലെത്തിച്ച വടകര ഇടതിന്റെ കോട്ടയെന്നായിരുന്നു അറിയപ്പെട്ടിരുന്നത്. ടി.പി ചന്ദ്രശേഖരന്റെ കൊലപാതകത്തോടെയും ആര്‍ എം പിയെന്ന രാഷ്ട്രീയ പാര്‍ട്ടിയുടെ പിറവിയോടെയും ഒഞ്ചിയമുള്‍പ്പെടെയുള്ള ഇടത് കോട്ടകള്‍ തകര്‍ന്ന് വീഴുകയായിരുന്നു.
സോഷ്യലിസ്റ്റുകള്‍ക്ക് നിര്‍ണായക സ്വാധീനമുള്ള മണ്ഡലത്തില്‍ ഇടതുപക്ഷത്തോടൊപ്പം എല്‍.ജെ.ഡി ചേര്‍ന്നതോടെ കരുത്ത് വര്‍ധിച്ചതായായിരുന്നു മുന്നണി പ്രതീക്ഷ, കഴിഞ്ഞ തവണ ഒറ്റയ്ക്ക് മത്സരിച്ച ആര്‍ എം പിയ്ക്ക് യു ഡി എഫിഫ് പിന്തുണ നല്‍കിയതോടെ തീപാറുന്ന മത്സരത്തിനാണ് വടകര സാക്ഷ്യംവഹിച്ചത്.
കൊലപാത രാഷ്ട്രീയത്തിനെതിരെ ശക്തമായ ശബ്ദമുയര്‍ത്തിക്കൊണ്ടായിരുന്നു രമയുടെ പ്രചാരണം. ഒപ്പം ടി പി ചന്ദ്രശേഖരനെന്ന വൈകാരിക വിഷയവും വോട്ടാകുമെന്ന പ്രതീക്ഷ യുഡിഎഫിനും ആര്‍ എം പിക്കും ഉണ്ടായിരുന്നു. ഒടുവില്‍ ആ പ്രതീക്ഷകളെല്ലാം യാഥാത്ഥ്യമായി. സിപിഎമ്മിനെ സംബന്ധിച്ച് വടകരയില്‍ തോല്‍ക്കുകയെന്നാല്‍ ടി പി ചന്ദ്രശേഖരനോട് തോല്‍ക്കുന്നതിന് സമം. അക്രമ രാഷ്ട്രീയത്തിനെതിരായ ഏറ്റവും വലിയ പ്രതീകം നിയമസഭയിലുണ്ടായാല്‍ അത് സി.പി.എമ്മിന് എക്കാലവും തിരിച്ചടിയാണ്.

Related Articles

Back to top button