BREAKINGNATIONAL

ആഘോഷത്തിനിടെ അപ്രതീക്ഷിതം, വിവാഹവേദിയില്‍ സ്പാര്‍ക്ക്‌ലര്‍ ഗണ്‍ പൊട്ടിത്തെറിച്ചു, വരന് പരിക്ക്

വിവാഹാഘോഷങ്ങള്‍ കളര്‍ ആക്കാന്‍ സ്പാര്‍ക്ക്‌ലര്‍ ഗണ്‍ മുതല്‍ പലതരത്തിലുള്ള വസ്തുക്കള്‍ വിവാഹവേദിയില്‍ ഉപയോഗിക്കുന്നത് ഇന്ന് പതിവാണ്. എന്നാല്‍, പലപ്പോഴും ഇത്തരം വസ്തുക്കള്‍ വലിയ അപകടങ്ങള്‍ ക്ഷണിച്ചു വരുത്താറുണ്ട്. അത്തരത്തില്‍ ഒരു വീഡിയോ അടുത്തിടെ സോഷ്യല്‍ മീഡിയയില്‍ വൈറലായി.
വിവാഹാഘോഷങ്ങള്‍ക്കിടയില്‍ സ്പാര്‍ക്ക്‌ലര്‍ ഗണ്ണുപയോഗിച്ച നവദമ്പതികള്‍ക്ക് ഗുരുതരമായ പരിക്കേല്‍ക്കുകയായിരുന്നു. വീഡിയോ വ്യാപകമായി പ്രചരിച്ചതോടെ ആഘോഷവേളയില്‍ ഇത്തരം വസ്തുക്കള്‍ ഉപയോഗിക്കുന്നതിന്റെ അപകടങ്ങളെക്കുറിച്ച് സോഷ്യല്‍ മീഡിയ ഉപയോക്താക്കള്‍ക്കിടയില്‍ ആശങ്ക ഉയര്‍ത്തുകയും ചെയ്തു.
വരമാല ചടങ്ങിന് ശേഷം വേദിയില്‍ നില്‍ക്കുന്ന നവദമ്പതികളെയാണ് വീഡിയോയുടെ തുടക്കത്തില്‍ കാണാന്‍ കഴിയുക. ശേഷം ഇരുവരുടെയും കയ്യില്‍ സ്പാര്‍ക്ക്‌ലര്‍ ഗണ്‍ നല്‍കുകയും ഇരുവരും അത് ഓണ്‍ ആക്കി പിടിക്കുകയും ചെയ്യുന്നു. എന്നാല്‍, പെട്ടെന്ന് തീര്‍ത്തും അപ്രതീക്ഷിതമായി വരന്റെ കയ്യില്‍ ഇരുന്ന തോക്ക് പൊട്ടിത്തെറിക്കുന്നു. ഭയന്നുപോയ വരനും വധുവും കയ്യിലെ തോക്കുകള്‍ വലിച്ചെറിഞ്ഞെങ്കിലും പൊട്ടിത്തെറിയില്‍ വരന്റെ കൈക്ക് ഗുരുതരമായി പരിക്കേറ്റു. വേദിയിലുണ്ടായിരുന്നവരെല്ലാം ഭയചകിതരാകുന്നതും വീഡിയോയില്‍ കാണാം.
‘ഇത് നിര്‍ത്തുക’ എന്ന അടിക്കുറിപ്പോടെ @ritik.editsx എന്ന അക്കൗണ്ടാണ് വീഡിയോ ഇന്‍സ്റ്റാഗ്രാമില്‍ പങ്കിട്ടത്. വീഡിയോ ഇതിനോടകം 23.5 ദശലക്ഷം ആളുകള്‍ കാണുകയും 517,000-ലധികം ലൈക്കുകള്‍ ലഭിക്കുകയും ചെയ്തു.
സംഭവത്തിന്റെ ഗൗരവം കണക്കിലെടുത്ത് ചില ഉപയോക്താക്കള്‍ വിമര്‍ശനവും പരിഹാസവും നിറഞ്ഞ കമന്റുകള്‍ വീഡിയോയ്ക്ക് താഴെ പോസ്റ്റ് ചെയ്തു. ഇത്തരം അപകടകരമായ വസ്തുക്കള്‍ ആഘോഷവേളകളില്‍ ഉപയോഗിച്ച് എന്തിനാണ് വലിയ ദുരന്തങ്ങള്‍ ഇരന്നു വാങ്ങുന്നത് എന്നായിരുന്നു ഒരു ഉപയോക്താവ് കുറിച്ചത്. വിവാഹം ആഘോഷമാക്കുന്നതിന് പകരം നവദമ്പതികള്‍ ദീപാവലി ആഘോഷിക്കുകയാണ് എന്ന് പരിഹസിച്ചവരും നിരവധിയാണ്.

Related Articles

Back to top button