BREAKING NEWSKERALALATEST

ഇടുക്കി ഇനി ഔഷധ സസ്യങ്ങളുടെ കലവറ, ഒരുങ്ങുന്നു ഔഷധ പാര്‍ക്ക്

ഇടുക്കി: നമുക്ക് ചുറ്റും കാണുന്ന സസ്യങ്ങള്‍ ഒരുതരത്തില്‍ അല്ലെങ്കില്‍ മറ്റൊരു തരത്തില്‍ ആരോഗ്യത്തെ പ്രദാനം ചെയ്യുന്നതാണ്. കേരളം ഔഷധ സസ്യങ്ങളുടെ കലവറയാണ്. ആരോഗ്യ സംരക്ഷണത്തിനായി ആയുര്‍വേദത്തില്‍ പരമപ്രധാനമായ ഒരു സ്ഥാനമാണ് ഔഷധസസ്യങ്ങള്‍ക്കുള്ളത്. പരമ്പരാഗതമായ ആയുര്‍വേദ ചികിത്സാരീതിയ്ക്ക് ലോകമെമ്പാടും പ്രചാരമേറുന്ന കാലം കൂടിയാണിത്. കേരളത്തിന്റെ നാട്ടിന്‍ പുറങ്ങളിലും വനപ്രദേശങ്ങളിലും വീട്ടുവളപ്പിലും ധാരാളം ഔഷധ സസ്യങ്ങള്‍ ഉണ്ടായിരുന്നു. എന്നാല്‍ പ്രകൃതിയുടെ നാശം ഔഷധ സസ്യങ്ങളെ ഇല്ലാതാക്കുകയാണ് ഉണ്ടായത്. ഔഷധസസ്യങ്ങള്‍ വീട്ടുമുറ്റത്ത് വളര്‍ത്തി നമുക്ക് ഈ പ്രശ്‌നം പരിഹരിക്കാവുന്നതാണെങ്കിലും ആരും ഇതിനൊന്നും തയ്യാറാകാറില്ല.
ഒട്ടുമിക്ക രോഗങ്ങള്‍ക്കും മറുമരുന്ന് പ്രധാനം ചെയ്യുന്ന ഇത്തരം ഔഷധസസ്യങ്ങളുടെ നിലിനില്‍പ്പ് ലക്ഷ്യമിട്ട് ഔഷധസസ്യങ്ങളെ സംരക്ഷിക്കാന്‍ ഇടുക്കി ജില്ലയില്‍ അഞ്ച് ഹെര്‍ബല്‍ പാര്‍ക്കുകള്‍ സ്ഥാപിക്കുകയാണ്. അറക്കുളം, കോലാനി ഹോമിയോ ഡിസ്‌പെന്‍സറികള്‍, രാജാക്കാട്, വഴിത്തല, കുടയത്തൂര്‍ ആയുര്‍വേദ ആശുപത്രികള്‍ എന്നിവിടങ്ങളിലാണ് ഹെര്‍ബല്‍ പാര്‍ക്കുകള്‍ വരുന്നത്. 16 ഇനം ഔഷധച്ചെടികള്‍ നട്ടുപരിപാലിക്കുകയും ജനങ്ങള്‍ക്ക് അവബോധം പകരുകയുമാണ് പദ്ധതിയുടെ ലക്ഷ്യം.
ആയുഷ് മിഷനും ജില്ലാ ആരോഗ്യ,ആയുര്‍വേദം, ഹോമിയോ വകുപ്പുകളും ഹരിതകേരളവും ചേര്‍ന്നാണ് പദ്ധതി നടപ്പാക്കുന്നത്. നെല്ലി, അശ്വഗന്ധ, കുറുന്തോട്ടി, കീഴാര്‍നെല്ലി, ബ്രഹ്മി, ചിറ്റമൃത്, മഞ്ഞള്‍, കറ്റാര്‍വാഴ, മുത്തിള്‍, ആര്യവേപ്പ്, ശതാവരി, ഇഞ്ചി, ആവണക്ക്, തുളസി, കരിനൊച്ചി, ആടലോടകം എന്നിവയാണ് ഹെര്‍ബല്‍ പാര്‍ക്കിലുണ്ടാവുക. തദ്ദേശ സ്ഥാപനത്തിലെ ഹരിതകര്‍മസേന അംഗങ്ങള്‍ക്കായിരിക്കും ഇതിന്റെ പരിപാലനച്ചുമതല.
മറ്റ് വിലയേറിയ ചികിത്സാ രീതികളെയും മരുന്നുകളെയും അപേക്ഷിച്ച് നമ്മുടെ സ്വാഭാവിക ശരീര സംവിധാനവുമായി സമന്വയിപ്പിച്ച് നന്നായി പ്രവര്‍ത്തിച്ചേക്കാവുന്ന ആയുര്‍വേദ പരിഹാരങ്ങള്‍ കൂടിയാണ് ഇത്തരം ഔഷധസസ്യങ്ങളുടെ ഉപയോഗം. മനസും ശരീരവും തമ്മിലുള്ള സന്തുലിതാവസ്ഥ മെച്ചപ്പെടുത്തുവാന്‍ സഹായിക്കുന്ന ആരോഗ്യ ഗുണങ്ങള്‍ ധാരാളം അടങ്ങിയ ഇത്തരം ഔഷധസസ്യങ്ങളുടെ സംരക്ഷണത്തിന് ഹെര്‍ബല്‍ പാര്‍ക്കുകള്‍ വളരെ അത്യാവശ്യമാണ്.

Related Articles

Back to top button

Adblock Detected

Please consider supporting us by disabling your ad blocker