ദില്ലി: ജമ്മു കശ്മീര് നിയമസഭ തെരഞ്ഞെടുപ്പിലെ ആദ്യ ഘട്ട പോളിംഗ് നാളെ. 90 ല് 24 മണ്ഡലങ്ങളാണ് നാളെ വിധിയെഴുതുന്നത്. മെഹബൂബ മുഫ്തിയുടെ മകള് ഇല്ത്തിജ മുഫ്തി, സിപിഎം നേതാവ് മുഹമ്മദ് യൂസഫ് തരിഗാമി തുടങ്ങിയവരാണ് ആദ്യഘട്ടം ജനവിധി തേടുന്നവരിലെ പ്രമുഖര്. നാഷണല് കോണ്ഫറന്സും കോണ്ഗ്രസും സഖ്യമായാണ് തെരഞ്ഞെടുപ്പില് മത്സരിക്കുന്നത്. പിഡിപി ഒറ്റക്കാണ് പോരാട്ടം. ഇക്കുറി സൗത്ത് കശ്മീരില് ബിജെപിയും സ്ഥാനാര്ത്ഥികളെ നിര്ത്തിയിട്ടുണ്ട്.
ദോഡ, അനന്ത്നാഗ്, പുല്വാമ, കുല്ഗാം, ഷോപ്പിയാന് ജില്ലകളിലായി 24 മണ്ഡലങ്ങളിലാണ് ആദ്യ ഘട്ടത്തില് പോളിംഗ് നടക്കുന്നത്. അതേസമയം, പൂഞ്ച്, കത്വവ എന്നിവിടങ്ങളില് സുരക്ഷസേനയും ഭീകരരും തമ്മില് ഏറ്റുമുട്ടല് തുടരുന്ന സാഹചര്യത്തില് ജമ്മുകശ്മീര് കനത്ത ജാഗ്രതയിലാണ്. എഞ്ചിനീയര് റഷീദിന്റെ എഐപിയും ജമാത്തെ ഇസ്ലാമിയും കൈകോര്ക്കാന് തീരുമാനിച്ചത് ചില മണ്ഡലങ്ങളില് കോണ്ഗ്രസ് നാഷണല് കോണ്ഫറന്സ് സഖ്യത്തെ ബാധിച്ചേക്കും. ഹരിയാനയില് നാമനിര്ദ്ദേശപത്രിക പിന്വലിക്കാനുള്ള സമയം ഇന്നലെ അവസാനിച്ചിരുന്നു. കോണ്ഗ്രസുമായുള്ള സഖ്യചര്ച്ചകള് പരാജയപ്പെട്ടതിനെ തുടര്ന്ന് എല്ലാ സീറ്റുകളിലും ആംആദ്മി പാര്ട്ടി സ്ഥാനാര്ത്ഥികളെ നിര്ത്തിയിട്ടുണ്ട്.
