ആഫ്രിക്കയില് വ്യാപിച്ചുകൊണ്ടിരിക്കുന്ന എംപോക്സിനെതിരെ(മുമ്പത്തെ മങ്കിപോക്സ്) ഇക്കഴിഞ്ഞ ബുധനാഴ്ച ലോകാരോഗ്യസംഘടന ആരോഗ്യ അടിയന്തരാവസ്ഥ പ്രഖ്യാപിച്ചിരുന്നു. രോഗികളുടെ എണ്ണവും മരണവും ക്രമാതീതമായി ഉയരുന്ന പശ്ചാത്തലത്തിലാണ് ലോകാരോഗ്യസംഘടനയുടെ ഇടപെടല്. നിലവിലെ വ്യാപനത്തിന് കാരണമായിട്ടുള്ള പുതിയ വകഭേദം ദ്രുതഗതിയിലാണ് പടരുന്നതെന്നാണ് റിപ്പോര്ട്ടുകള്.
clade Ib എന്ന വകഭേദമാണ് ആഫ്രിക്കയുള്പ്പെടെയുള്ള സ്ഥലങ്ങളിലെ രോഗവ്യാപനത്തിനുപിന്നില്. സ്വീഡനിലും ഇതേ വകഭേദം തന്നെയാണ് വ്യാപിക്കുന്നതെന്ന് അധികൃതര് വ്യക്തമാക്കിയിരുന്നു. 2022-ലെ രോഗവ്യാപനത്തിന് കാരണമായിരുന്നത് clade IIb വകഭേദമാണ്. അന്ന് 116 രാജ്യങ്ങളില് നിന്നായി 100,000 പേരെയാണ് രോഗംബാധിച്ചത്. മരണപ്പെട്ടത് 200 പേരും. ഇന്ത്യയില് ഇരുപത്തിയേഴുപേര് രോഗബാധിതരാവുകയും ഒരാള് മരിക്കുകയും ചെയ്തിരുന്നു.
മുമ്പത്തെ വകഭേദത്തെ അപേക്ഷിച്ച് തീവ്രവ്യാപനശേഷിയാണ് clade Ib-ക്ക് ഉള്ളതെന്ന് വിദഗ്ധര് പറയുന്നു. clade IIb-യിലെ മരണനിരക്ക് ഒരുശതമാനമായിരുന്നെങ്കില് ഇപ്പോഴത്തെ വകഭേദത്തിന് മരണസാധ്യത പത്തുശതമാനം കൂടുതലാണ്. നിലവിലെ വ്യാപനത്തിന് തുടക്കമാകുന്നത് കഴിഞ്ഞ ജനുവരി മുതലാണ്. റിപ്പബ്ലിക് ഓഫ് കോംഗോയില് മാത്രം 27,000 പേരെ എംപോക്സ് ബാധിക്കുകയും 1,100 മരണങ്ങള് ഉണ്ടാവുകയും ചെയ്തു. ഈ വര്ഷം ഇതുവരെയുള്ള കണക്കെടുക്കുമ്പോള് മാത്രം രോഗികളുടെനിരക്ക് 15,000-വും മരണനിരക്ക് 548-ഉം ആയിട്ടുണ്ട്. അയല്രാജ്യങ്ങളായ കെനിയ, റുവാന്ഡ, ഉഗാണ്ട എന്നിവിടങ്ങളിലും രോഗവ്യാപനമുണ്ട്.
അതിനിടെ ആഫ്രിക്കയില് പടരുന്ന എംപോക്സ് പാകിസ്താനിലും സ്ഥിരീകരിച്ചതായി പാക് ആരോഗ്യ മന്ത്രാലയം വ്യക്തമാക്കി. ഏഷ്യയില് ആദ്യമായാണ് ഈ രോഗം കണ്ടെത്തുന്നത്. മൂന്നുപേര്ക്കാണ് രോഗബാധ കണ്ടെത്തിയത്. വേഗം പകരാന് സാധ്യതയുള്ള പുതിയ എംപോക്സ് വകഭേദമാണ് സ്ഥിരീകരിച്ചത്. ആഫ്രിക്കയ്ക്കുപുറത്ത് പുതിയ വകഭേദം സ്ഥിരീകരിക്കുന്ന രണ്ടാമത്തെ രാജ്യമാണ് പാകിസ്താന്. വ്യാഴാഴ്ച സ്വീഡനിലും രോഗബാധ റിപ്പോര്ട്ടുചെയ്തിരുന്നു.
മുമ്പത്തെ എംപോക്സ് ലക്ഷണങ്ങളില് നിന്ന് വ്യത്യസ്തമാണ് ഇക്കുറി പ്രത്യക്ഷമാകുന്നതെന്നും വിദഗ്ധര് പറയുന്നുണ്ട്. നേരത്തേ നെഞ്ചിലും കൈകാലുകളിലും കുമിളകളായിരുന്നു പ്രധാനലക്ഷണമെങ്കില് ഇപ്പോഴത്തേത് നേരിയതോതില് ജനനേന്ദ്രിയ ഭാഗത്ത് കുമിളകള് വരുന്ന രീതിയിലാണ്. അതുകൊണ്ടുതന്നെ രോഗം തിരിച്ചറിയാന് വൈകുന്നുവെന്നും വിദഗ്ധര് കണക്കാക്കുന്നു.
2022 മുതല് ലോകത്തിന്റെ പലഭാഗങ്ങളിലും മങ്കിപോക്സ് വ്യാപനമുണ്ടെങ്കിലും കഴിഞ്ഞ കുറച്ചുനാളുകളായി തീവ്രവ്യാപനമുണ്ട്. വെസ്റ്റ്, സെന്ട്രല്, ഈസ്റ്റ് ആഫ്രിക്കന് രാജ്യങ്ങളിലാണ് രോഗവ്യാപനമുള്ളത്. അമേരിക്കയിലും യൂറോപ്പിലും രോഗികളുടെ നിരക്കില് വര്ധനയുണ്ട്.
2009 മുതല് ഇതുവരെ ഏഴുതവണയാണ് ആരോഗ്യ അടിയന്തരാവസ്ഥ പ്രഖ്യാപിച്ചിരിക്കുന്നത്. H1N1 പന്നിപ്പനി, പോളിയോവൈറസ്, സിക വൈറസ്, എബോള, കോവിഡ്, എംപോക്സ് എന്നിവയ്ക്കാണ് ഇതുവരെ അടിയന്തിരാവസ്ഥ പ്രഖ്യാപിച്ചത്. ഇതില് അവസാനമായി 2022-ല് പ്രഖ്യാപിച്ചതും എംപോക്സിന് എതിരെയാണ്. അടിയന്തരാവസ്ഥ പ്രഖ്യാപിക്കുകയെന്നാല് ലോകാരോഗ്യസംഘടനയുടെ ഏറ്റവുംവലിയ ജാഗ്രതാനിര്ദേശങ്ങളിലൊന്നാണ്.
ദശകങ്ങളായി കോംഗോയില് എംപോക്സ് വ്യാപനമുണ്ട്. എന്നല് ഈ വര്ഷം ജനുവരി മുതല് ജൂണ് വരെയുള്ള കണക്കുകള്മാത്രം കഴിഞ്ഞവര്ഷം മൊത്തത്തില് ഉണ്ടായതിനേക്കാള് കൂടുതലാണ്.
മങ്കിപോക്സ് എന്ന പേരിനുപിന്നിലെ വംശീയതയും തെറ്റിദ്ധാരണയ്ക്കുള്ള സാധ്യതയുമുണ്ടെന്ന വാദങ്ങള് വന്നതോടെയാണ് ലോകാരോഗ്യസംഘടന പേരുമാറ്റാന് തീരുമാനിച്ചത്.
എന്താണ് എംപോക്സ്
മൃഗങ്ങളില് നിന്ന് മനുഷ്യരിലേക്ക് വൈറസ് വഴി പകരുന്ന ഒരു രോഗമാണ് എംപോക്സ്. തീവ്രത കുറവാണെങ്കിലും 1980ല് ലോകമെമ്പാടും ഉന്മൂലനം ചെയ്യപ്പെട്ടതായി പ്രഖ്യാപിക്കപ്പെട്ട ഓര്ത്തോപോക്സ് വൈറസ് അണുബാധയായ വസൂരിയുടെ ലക്ഷണങ്ങളുമായി എംപോക്സിന്റെ ലക്ഷണങ്ങള്ക്ക് സാദൃശ്യമുണ്ട്. പ്രധാനമായും മധ്യ, പടിഞ്ഞാറന് ആഫ്രിക്കയിലാണ് ഈ രോഗം കാണപ്പെടുന്നത്. 1958ലാണ് ആദ്യമായി കുരങ്ങുകളില് രോഗം സ്ഥിരീകരിച്ചത്. 1970ല് ഡെമോക്രാറ്റിക് റിപ്പബ്ലിക് ഓഫ് കോംഗോയില് 9 വയസുള്ള ആണ്കുട്ടിയിലാണ് മനുഷ്യരില് എംപോക്സ് ആദ്യമായി കണ്ടെത്തിയത്.
രോഗ പകര്ച്ച
രോഗം ബാധിച്ച മൃഗങ്ങളുടെ രക്തം, ശരീര സ്രവങ്ങള് എന്നിവ വഴി നേരിട്ടുള്ള സമ്പര്ക്കത്തിലൂടെ മൃഗങ്ങളില് നിന്ന് മനുഷ്യരിലേക്ക് മങ്കിപോക്സ് പകരാം. അണ്ണാന്, എലികള്, വിവിധ ഇനം കുരങ്ങുകള് എന്നിവയുള്പ്പെടെ നിരവധി മൃഗങ്ങളില് എംപോക്സ് വൈറസ് അണുബാധയുടെ തെളിവുകള് കണ്ടെത്തിയിട്ടുണ്ട്. വനമേഖലയിലോ സമീപത്തോ താമസിക്കുന്ന ആളുകള്ക്ക് രോഗബാധിതരായ മൃഗങ്ങളുമായുള്ള സമ്പര്ക്കമുണ്ടായാല് രോഗബാധയുണ്ടാകാനുള്ള സാധ്യതയുണ്ട്.
രോഗബാധിതനായ ഒരാളുടെ ശ്വാസകോശ സ്രവങ്ങളുമായുള്ള അടുത്ത സമ്പര്ക്കത്തിലൂടെയാണ് മനുഷ്യരില് നിന്ന് മനുഷ്യരിലേക്ക് രോഗം പകരുന്നത്. ക്ഷതങ്ങള്, ശരീര സ്രവങ്ങള്, ശ്വസന തുള്ളികള്, കിടക്ക പോലുള്ള വസ്തുക്കള് എന്നിവയുമായുള്ള അടുത്ത സമ്പര്ക്കം, രോഗം ബാധിച്ചയാളുമായുള്ള ലൈംഗിക ബന്ധം എന്നിവയിലൂടെ എംപോക്സ് വൈറസ് ഒരാളില് നിന്ന് മറ്റൊരാളിലേക്ക് പകരുന്നത്.
പ്ലാസന്റ വഴി അമ്മയില് നിന്ന് കുഞ്ഞിലേക്കോ അല്ലെങ്കില് ജനനസമയത്തോ, അതിനുശേഷമോ കുഞ്ഞുമായുള്ള അടുത്ത സമ്പര്ക്കത്തിലൂടെയും രോഗസംക്രമണം സംഭവിക്കാം. ലോകമെമ്പാടും വസൂരിക്കുള്ള വാക്സിനേഷന് നിര്ത്തലാക്കിയതിനാല് പൊതുജനങ്ങളില് വസൂരിക്കെതിരെയുള്ള പ്രതിരോധശേഷി കുറയുന്നത്നെ എംപോക്സിനെതിരേയുള്ള പ്രതിരോധശേഷി കുറയ്ക്കുന്നതിനും കാരണമായേക്കാം.
ലക്ഷണങ്ങള്
സാധാരണഗതിയില് എംപോക്സിന്റെ ഇന്കുബേഷന് കാലയളവ് 6 മുതല് 13 ദിവസം വരെയാണ്. എന്നാല് ചില സമയത്ത് ഇത് 5 മുതല് 21 ദിവസം വരെയാകാം. 2 മുതല് 4 ആഴ്ച വരെ ലക്ഷണങ്ങള് നീണ്ടു നില്ക്കാറുണ്ട്. മരണനിരക്ക് പൊതുവെ കുറവാണ്.
പനി, തീവ്രമായ തലവേദന, കഴലവീക്കം, നടുവേദന, പേശി വേദന, ഊര്ജക്കുറവ് എന്നിവയാണ് പ്രാരംഭ ലക്ഷണങ്ങള്. പനി വന്ന് 13 ദിവസത്തിനുള്ളില് ദേഹത്ത് കുമിളകള് പ്രത്യക്ഷപ്പെടാന് തുടങ്ങുന്നു. മുഖത്തും കൈകാലുകളിലുമാണ് കൂടുതല് കുമിളകള് കാണപ്പെടുന്നത്. ഇതിനുപുറമെ കൈപ്പത്തി, ജനനേന്ദ്രിയം, കണ്ജങ്ക്റ്റിവ, കോര്ണിയ എന്നീ ശരീരഭാഗങ്ങളിലും ഇവ കാണപ്പെടുന്നു.
രോഗം ഗുരുതരമാകുന്നത് രോഗിയുടെ ആരോഗ്യനില, പ്രതിരോധശേഷി, രോഗത്തിന്റെ സങ്കീര്ണതകള് എന്നിവയെ ആശ്രയിച്ചിരിക്കുന്നു. സാധാരണയായി കുട്ടികളിലാണ് രോഗം ഗുരുതരമാകുന്നതായി കാണപ്പെടുന്നത്. അണുബാധകള്, ബ്രോങ്കോന്യുമോണിയ, സെപ്സിസ്, എന്സെഫലൈറ്റിസ്, കോര്ണിയയിലെ അണുബാധ എന്നിവയും തുടര്ന്നുള്ള കാഴ്ച നഷ്ടവും ഈ രോഗത്തിന്റെ സങ്കീര്ണതകളില് ഉള്പ്പെടുന്നു. രോഗലക്ഷണങ്ങളില്ലാതെയുള്ള അണുബാധ എത്രത്തോളം സംഭവിക്കാം എന്നത് അജ്ഞാതമാണ്.
ചികിത്സ
വൈറല് രോഗമായതിനാല് എംപോക്സിന് പ്രത്യേക ചികിത്സ ലഭ്യമല്ല. രോഗലക്ഷണങ്ങള് ലഘൂകരിക്കുന്നതിനും, രോഗം മൂലമുണ്ടാകുന്ന സങ്കീര്ണതകള് കൈകാര്യം ചെയ്യുന്നതിനും, ദീര്ഘകാല പ്രത്യാഘാതങ്ങള് തടയുന്നതിനും എംപോക്സിന്റം ലക്ഷണങ്ങള് കണ്ടാല് ചികിത്സ തേടേണ്ടത് അത്യാവശ്യമാണ്. എംപോക്സിന്റെ വാക്സിനേഷന് നിലവിലുണ്ട്
പ്രതിരോധം
അസുഖം ബാധിച്ച സമയത്തും അവയുടെ മൃതശരീരങ്ങള് കൈകാര്യം ചെയ്യുന്ന സമയത്തും വന്യമൃഗങ്ങളുമായുള്ള സുരക്ഷിതമല്ലാത്ത സമ്പര്ക്കം ഒഴിവാക്കുക. അവയുടെ മാംസം, രക്തം, മറ്റ് ഭാഗങ്ങള് എന്നിവയുമായുള്ള സമ്പര്ക്കവും ഒഴിവാക്കണം. ഇതോടൊപ്പം മൃഗങ്ങളുടെ മാംസം കഴിക്കുന്നതിനു മുമ്പ് നന്നായി വേവിച്ചിട്ടുണ്ട് എന്ന് ഉറപ്പു വരുത്തണം.
രോഗബാധിതരായ മനുഷ്യരുമായി അടുത്തിടപഴകുന്നതാണ് എംപോക്സ് വൈറസ് അണുബാധയ്ക്കുള്ള ഏറ്റവും പ്രധാനപ്പെട്ട കാരണം. വൈറസ് ബാധയുണ്ടെന്ന് സംശയിക്കുന്നതോ സ്ഥിരീകരിച്ചതോ ആയ രോഗികളെ പരിചരിക്കുന്ന ആരോഗ്യ പ്രവര്ത്തകരും രോഗബാധിതരുടെ സ്രവങ്ങള് കൈകാര്യം ചെയ്യുന്നവരും രോഗപ്പകര്ച്ച ഒഴിവാക്കുന്നതിനായി നിര്ബന്ധമായും സാധാരണ സ്വീകരിക്കുന്ന അണുബാധ നിയന്ത്രണ മുന്കരുതലുകളെടുക്കണം