ന്യൂഡല്‍ഹി : ഭീകര സംഘടനയായ ഇസ്ലാമിക് സ്റ്റേറ്റുമായുള്ള (ഐഎസ്) ബന്ധത്തിന്റെ പേരില്‍ ബുധനാഴ്ച അറസ്റ്റിലായവര്‍ കേരളത്തില്‍ നിന്നടക്കം യുവാക്കളെ റിക്രൂട്ട് ചെയ്യാന്‍ ലക്ഷ്യമിട്ടിരുന്നതായി ദേശീയ അന്വേഷണ ഏജന്‍സിക്കു (എന്‍ഐഎ) വിവരം ലഭിച്ചു. സമൂഹമാധ്യമങ്ങളായ ടെലഗ്രാം, ഇന്‍സ്റ്റഗ്രാം, ഹൂപ് എന്നിവയിലൂടെ ഐഎസ് ആശയങ്ങള്‍ പ്രചരിപ്പിച്ചാണ് ഇവര്‍ യുവാക്കളെ ലക്ഷ്യമിട്ടത്.
കേരളത്തിനു പുറമേ കര്‍ണാടക, ജമ്മു കശ്മീര്‍ എന്നിവിടങ്ങളില്‍ നിന്നുള്ളവരെയും റിക്രൂട്ട് ചെയ്യാന്‍ പദ്ധതിയിട്ടു. ഐഎസിന്റെ ഇന്ത്യന്‍ ഘടകം രൂപീകരിക്കുകയായിരുന്നു ലക്ഷ്യം. കശ്മീര്‍, കര്‍ണാടക എന്നിവിടങ്ങളില്‍ നിന്ന് അറസ്റ്റിലായ 4 പേര്‍ കഴിഞ്ഞ മാസങ്ങളില്‍ കേരളത്തിലടക്കം പല തവണ പോയതായാണു വിവരം. ഇവരെ ഇന്നലെ ചോദ്യം ചെയ്യലിനായി ഡല്‍ഹിയിലെ എന്‍ഐഎ ആസ്ഥാനത്തെത്തിച്ചു.ഐഎസുമായുള്ള ബന്ധത്തിന്റെ പേരില്‍ കഴിഞ്ഞ മാര്‍ച്ചില്‍ അറസ്റ്റിലായ മലയാളി മുഹമ്മദ് അമീന്‍ (അബു യഹിയ) ആണ് സംഘത്തിനു നേതൃത്വം നല്‍കിയിരുന്നത്. സിറിയ, ഇറാഖ് എന്നിവിടങ്ങളിലെ ഐഎസ് സംഘങ്ങള്‍ക്കൊപ്പം പ്രവര്‍ത്തിച്ചിരുന്ന അമീന്‍ പിന്നീട് ഇന്ത്യയിലേക്കു മടങ്ങിയെത്തി. തുടര്‍ന്ന് ഡല്‍ഹി കേന്ദ്രീകരിച്ചു പ്രവര്‍ത്തിച്ച ഇയാള്‍ യുവാക്കളെ റിക്രൂട്ട് ചെയ്യാനുള്ള പദ്ധതിയൊരുക്കി. കശ്മീര്‍ സന്ദര്‍ശിച്ച അമീന്‍ അവിടെയുള്ള മുഹമ്മദ് വഖാര്‍ ലോണ്‍ (വില്‍സണ്‍ കശ്മീരി) എന്നയാള്‍ക്കൊപ്പം ഭീകരപ്രവര്‍ത്തനങ്ങള്‍ക്കുള്ള ഫണ്ട് ശേഖരിച്ചു. അമീന്‍ പിടിയിലായതോടെയാണു സംഘത്തിലെ മറ്റുള്ളവരെക്കുറിച്ചുള്ള വിവരങ്ങള്‍ എന്‍ഐഎക്കു ലഭിച്ചത്.2016 ല്‍ കാസര്‍കോട് തൃക്കരിപ്പൂര്‍ പടന്നയിലെ ഷിയാസും ഭാര്യ അജ്മലയും ഒന്നര വയസ്സുണ്ടായിരുന്ന മകനും അടക്കം 12 പേര്‍ സിറിയയിലെത്തി ഐഎസില്‍ ചേര്‍ന്നതായി കണ്ടെത്തിയിരുന്നു. അജ്മലയുടെ മാതൃ സഹോദരനാണ് ബുധനാഴ്ച മംഗളൂരുവില്‍ അറസ്റ്റിലായത്.
BREAKING NEWSKERALA
