എവിടെയെങ്കിലും യാത്ര പോകുമ്പോള്‍ കഴിയാന്‍ സൗജന്യമായി ഒരടിപൊളി ഹോട്ടല്‍ മുറി കിട്ടുക. അങ്ങനെ സംഭവിച്ചാല്‍ സന്തോഷമാകും അല്ലേ? അത് തന്നെയാണ് ഈ ദമ്പതികള്‍ക്കും സംഭവിച്ചത്. അമേരിക്കന്‍ ടൂറിസ്റ്റുകളായ ദമ്പതികള്‍ക്കാണ് സ്‌പെയിനിലെ ഐബിസയില്‍ ഒരു രാത്രി സൗജന്യ താമസം ലഭിച്ചത്. സംഗതി സൗജന്യമാണ് മുറിയെങ്കിലും അതങ്ങനെ വെറുതെ കിട്ടിയതായിരുന്നില്ല.
‘എ പ്രെറ്റി കൂള്‍ ഹോട്ടല്‍ ടൂര്‍’ എന്ന TikTok പേജിന് പിന്നിലെ ട്രാവല്‍ ബ്ലോഗര്‍മാരായ മാര്‍ഗരറ്റും കോറി ബിനെര്‍ട്ടുമാണ് ആ ദമ്പതികള്‍. സ്‌പെയിനിലേക്ക് യാത്ര തിരിച്ചപ്പോള്‍ ‘പാരഡിസോ ഐബിസ ആര്‍ട്ട് ഹോട്ടലി’ല്‍ ഒരു രാത്രി സൗജന്യ താമസം കിട്ടുമെന്ന് കണ്ടതോടെ ഇരുവരും വലിയ ആവേശത്തിലായിരുന്നു. എന്നാല്‍, യഥാര്‍ത്ഥത്തില്‍ എന്താണ് ആ ഹോട്ടല്‍ മുറി എന്ന് അറിഞ്ഞതോടെ ആ ആവേശം അമ്പരപ്പായി മാറുകയായിരുന്നു. ആ ഹോട്ടല്‍മുറി ഗ്ലാസിന്റേതായിരുന്നു. ഹോട്ടലിലേക്ക് കയറിച്ചെന്ന ഉടനെ തന്നെയാണ് ഈ മുറി. അതായത്, ഹോട്ടലില്‍ ആര് വന്നാലും അവര്‍ക്കെല്ലാം ചില്ലിന്റെ ഉള്ളിലൂടെ അതിനകത്ത് താമസിക്കുന്നവരെ കാണാന്‍ സാധിക്കും എന്നര്‍ത്ഥം.
എന്തിനാണ് ഇങ്ങനെയൊരു മുറി സൗജന്യമായി നല്‍കുന്നത് എന്നല്ലേ? അത് ഒരു ആര്‍ട്ട് ഇന്‍സ്റ്റലേഷന്റെ ഭാ?ഗമാണ്. ആ മുറിയില്‍ താമസിക്കുന്നവര്‍ ആ ആര്‍ട്ട് ഇന്‍സ്റ്റലേഷന്റെ ഭാ?ഗവുമാണ്. ആ മുറിയിലെന്തൊക്കെയുണ്ടോ അതെല്ലാം അവിടെ എത്തുന്ന അതിഥികള്‍ക്ക് ഗ്ലാസിലൂടെ കാണാം. മാത്രമല്ല, രാത്രി ഇനി മര്യാദയ്ക്ക് ആരും കാണാതെ ഉറങ്ങാം എന്ന് കരുതിയാലോ അതും സാധിക്കില്ല. രാത്രിയില്‍ മുറിയില്‍ ലൈറ്റണക്കില്ല. രാത്രിയിലും അതിഥികള്‍ക്ക് മുറിയിലുള്ളവരെ കാണാമെന്ന് സാരം.
യാത്രയുടെ വീഡിയോ ഇവര്‍ യൂട്യൂബില്‍ പങ്കുവച്ചിട്ടുണ്ട്. അതില്‍ ഹോട്ടല്‍ മുറിയില്‍ നിന്നുള്ള ദൃശ്യങ്ങളും കാണാം. നിരവധിപ്പേരാണ് ഈ വീഡിയോയ്ക്ക് കമന്റുകള്‍ നല്‍കിയിരിക്കുന്നത്.
